ഏനാമാവ് ബണ്ട് പൊട്ടിയെന്ന വ്യാജപ്രചരണം: ജനങ്ങള് പരിഭ്രാന്തരാകരുതെന്ന് കളക്ടര്
വ്യാജവാര്ത്ത വിശ്വസിക്കരുത്. പ്രളയക്കെടുതി ഓരോ ദിവസവും ദുരിതം വിതച്ചുകൊണ്ട് നീങ്ങുമ്പോള് ഭീതി ജനിപ്പിക്കുന്ന വ്യാജ പ്രചരണങ്ങളും കൊഴുക്കുന്നു. ഏനാമാവ് ബണ്ട് പൊട്ടിയെന്ന തരത്തില് പ്രചരിക്കുന്ന വാര്ത്ത അടിസ്ഥാന രഹിതമെന്ന് ജില്ലാ ഭരണകുടം വ്യക്തമാക്കി. ജനങ്ങള് ആശങ്കപ്പെടേണ്ട സ്ഥിതിയില്ലെന്നും പരിസരത്തുള്ളവര് മാറിത്താമസിക്കേണ്ടതില്ലെന്നും ജില്ലാ കളക്ടര് ടി.വി. അനുപമ അറിയിച്ചു. മുല്ലപ്പെരിയാര് പൊട്ടിയെന്ന വ്യാജ വാര്ത്ത സൃഷ്ടിച്ച ഭീതിയ്ക്കു പുറമെ ഏനാമാവ് ബണ്ട് പൊട്ടിയെന്നും തൃശ്ശൂര് മുഴുവന് വെള്ളത്തിലാകുമെന്നും ജനങ്ങള് കൂട്ടത്തോടെ അപകടത്തിലാകുമെന്നുമാണ് ഏറ്റവും ഒടുവിലായി പ്രചരിക്കുന്ന വ്യാജ വാര്ത്ത. വാര്ത്ത സംവിധാനങ്ങള് ഇല്ലാത്തതിനാല് വാര്ത്തകളുടെ സത്യാവസ്ഥ മനസിലാക്കാതെ ജനങ്ങള് സോഷ്യല് മീഡിയ വഴി പ്രചരിക്കുന്ന വ്യാജ വാര്ത്തയില് ഭീതിയില് കഴിയുകയാണ്. പലരും വാര്ത്തയുടെ യാഥാര്ത്ഥ്യം മനസിലാക്കാതെ വ്യാപകമായി ഷെയര് ചെയ്യപ്പെടുന്നുമുണ്ട്. ഈ സാഹചര്യത്തിലാണ് ഫെയ്സ്ബുക്ക് വഴി വിശദീകരണവുമായി ജില്ലാ കളക്ടര് തന്നെ രംഗത്തെത്തിയത്.
മഴ കനത്തപ്പോള് തന്നെ ഏനാമാവ് ബണ്ട് തുറന്നുവിട്ടിരുന്നു. വെള്ളം അധികമായി ഒഴുകിയെത്തുന്നതിനാല് ബണ്ടിനു മുകളിലൂടെ ഒഴുകിയിരുന്നു. ഇതേതുടര്ന്ന് സമീപ പ്രദേശങ്ങളിലും വെള്ളം കയറിയിട്ടുണ്ട്. എന്നാല് ബണ്ടിന്റെ സുരക്ഷിതത്വത്തില് യാതൊരു വിധ ആശങ്കയുമില്ലെന്ന് അധികൃതര് വ്യക്തമാക്കി. അതേസമയം ബണ്ടിന്റെ സുരക്ഷ പരിഗണിച്ച് അവിടേക്കുള്ള വാഹനഗതാഗതം നിയന്ത്രിച്ചിട്ടുണ്ട്
https://www.facebook.com/Malayalivartha