വീണ്ടും സൈന്യത്തിന്റെ ഇടപെടല്‍. പ്രളയക്കെടുതിയില്‍ രക്ഷാപ്രവര്‍ത്തനത്തിനു വേഗം കൂട്ടാന്‍ പ്രതികൂല സാഹചര്യത്തിലും സഞ്ചരിക്കുന്ന സൈന്യത്തിന്റെ ടട്രാ ട്രക്കുകള്‍ രംഗത്തിറങ്ങി. രണ്ടു ടട്രാ ട്രക്കുകളാണ് ചാലക്കുടി, ആലുവ മേഖലകളിലെ രക്ഷാപ്രവര്‍ത്തനത്തിനായി പുറപ്പെട്ടിരിക്കുന്നത്. 
ഓരോ ടയറുകളും പ്രത്യേകം പ്രവര്‍ത്തിപ്പിക്കാന്‍ കഴിയുമെന്നതിനാല്‍ ചെളിക്കെട്ടുകളും കുന്നുകളും പടിക്കെട്ടുകള്‍ അടക്കമുള്ള പ്രദേശത്തുകൂടി പ്രയാസമില്ലാതെ സഞ്ചരിക്കാനും ദുരന്തത്തില്‍പ്പെട്ടു കിടക്കുന്നവരെ സഹായിക്കാനും കഴിയും. പ്രത്യേകം പരിശീലനം ലഭിച്ച എട്ടുപേരടങ്ങുന്ന സംഘവും ഇതിലുണ്ട്. നെല്ലിയാമ്പതിയിലെത്തിയ ട്രക്ക് പിന്നീട് മാളയിലേക്കു രക്ഷാ പ്രവര്‍ത്തനത്തിനായി കൊണ്ടുപോയി. പാലക്കാട് മഴ കുറഞ്ഞ സാഹചര്യത്തിലാണ് ട്രക്കുകള്‍ മറ്റ് സ്ഥലത്തെ രക്ഷാപ്രവര്‍ത്തനത്തിനായി കൈമാറാന്‍ തീരുമാനിച്ചത്.
കാര്‍ഗില്‍ പോലുള്ള ദുഷ്‌കര മേഖലകളില്‍ മികവ് തെളിയിച്ച ട്രക്കുകളാണ് ടട്രാ. ഒരാള്‍പ്പൊക്കം വെള്ളത്തിലും ട്രക്കുകള്‍ക്ക് അനായാസം ഏതു പ്രതിസന്ധിയും തരണം ചെയ്തു മുന്നോട്ടു പോകും. എട്ടു ചക്രങ്ങളുള്ള ഈ വാഹനം ചെളിയില്‍ പുതഞ്ഞു പോകുകയുമില്ല. വെള്ളത്തിലൂടെയും ചെളിയിലും കുണ്ടുകളിലും കല്ലുകള്‍ക്കിടയിലൂടെയും സഞ്ചരിക്കുന്ന ട്രക്കുകള്‍ ഏതുതരത്തിലുള്ള രക്ഷാപ്രവര്‍ത്തനം നടത്താനും ശേഷിയുള്ളതാണ്. 
അവശ്യഘട്ടങ്ങളില്‍ മണിക്കൂറില്‍ 80 കിലോ മീറ്റര്‍ വരെ വേഗതയില്‍ സഞ്ചരിക്കാന്‍ സാധിക്കും. നാറ്റോ മാനദണ്ഡങ്ങള്‍ ഉപയോഗിച്ച് നിര്‍മിച്ച ട്രക്കുകളാണ്? ഇത്. കഞ്ചിക്കോട് ഭാരത് എര്‍ത്ത് മൂവ്‌മെന്റ് ലിമിറ്റഡില്‍(ബെമ്ല്‍) നിര്‍മിച്ചതാണ് ഈ സൈനിക ട്രക്കുകള്‍.