ഇടുക്കിയിലെ ജനങ്ങള്‍ ഇപ്പോള്‍ നടത്തന്നത് ജീവന്‍മരണ പോരാട്ടം ആണെന്ന് എം.പി. ജോയ്‌സ് ജോര്‍ജ്ജ്. ദുരിതാശ്വാസ ക്യാമ്പുകളില്‍ ഒന്നും ഇല്ല. ആളുകള്‍ ജീവനും കയ്യില്‍പിടിച്ച് ഓടുകയാണ്. സുരക്ഷിതമായിരിക്കാന്‍ പറ്റുന്ന എല്ലായിടത്തും ക്യാമ്പുകളുണ്ട് പക്ഷേ ഭക്ഷണമില്ല, വസ്ത്രമില്ല. പൊതുജനങ്ങളില്‍ നിന്ന് സഹായം അഭ്യര്‍ത്ഥിക്കുകയാണ്. ഇടപെടാന്‍ പറ്റുന്നവര്‍ ഇടപെടണമെന്നും ആവശ്യപ്പെട്ട് ഇടുക്കി എം.പി. ജോയ്‌സ് ജോര്‍ജ്ജ്.

‘തമിഴ്നാട്ടില്‍ നിന്നും വെള്ളവും ഭക്ഷണവും എത്തിയില്ലായിരുന്നുവെങ്കില്‍ ഞങ്ങളില്‍ പലരും മരിച്ചു പോയെനെ. ആരെങ്കിലുമൊക്കെ സഹായിക്കൂ, ഈ സന്ദേശം കേള്‍ക്കുന്നവര്‍ ആരെങ്കിലുമൊക്കെ ഇടുക്കിയിലേക്ക് വരൂ, ജനങ്ങള്‍ അതീവ ദുരിതത്തിലാണ്.’ വിശപ്പടക്കാന്‍ ഒന്നുമില്ലെന്നാണ് ഇടുക്കി എംപിയുടെ സഹായാഭ്യാര്‍ത്ഥന. എസ് ഒഎസ് സന്ദേശമായാണ് ജോയിസ് ജോര്‍ജ് അഭ്യര്‍ത്ഥന നടത്തിയത്. കേള്‍ക്കുന്ന ആരെങ്കിലും ഇടുക്കിയിലേക്ക് കഴിയുന്ന പോലെ സഹായങ്ങളുമായി എത്തണമെന്നും അദ്ദേഹം ആവശ്യപ്പെട്ടു.

റോഡുകളും പാലങ്ങളും ഉരുള്‍പൊട്ടലില്‍ ഒലിച്ച് പോയതോടെ മറ്റ് ജില്ലകളില്‍ നിന്നും ഇടുക്കിയിലെത്താനുള്ള ഗതാഗതമാര്‍ഗ്ഗങ്ങള്‍ പൂര്‍ണമായും തടസ്സപ്പെട്ടിരിക്കുകയാണ്. മിക്ക പ്രദേശങ്ങളും ഒറ്റപ്പെട്ടു. ആരെയും ബന്ധപ്പെടാന്‍ കഴിയുന്നില്ല. ഉരുള്‍പൊട്ടലിലും മണ്ണിടിച്ചിലിലും മരിച്ചവരുടെ മൃതദേഹങ്ങള്‍ ഇപ്പോഴും ചെളിയില്‍ പുതഞ്ഞ് കിടക്കുകയാണ് എന്നും ജോയിസ് ജോര്‍ജ് എംപി പറയുന്നു.

എന്‍ഡിആര്‍എഫും നേവിയും പലസ്ഥലങ്ങളിലും എത്തിപ്പെടാനാവാതെ മടങ്ങുകയാണ് എന്നും അദ്ദേഹം പറയുന്നു. ജനങ്ങള്‍ ഇന്നേവരെ അനുഭവിക്കാത്ത ദുരിതത്തിലൂടെയാണ് കടന്ന് പോകുന്നതെന്നും സഹായിക്കണമെന്നും അദ്ദേഹം അഭ്യര്‍ത്ഥിച്ചു