സാലറി ചലഞ്ച്... ദുരിതാശ്വാസനിധിയിലേക്ക് പെന്ഷന്കാര്ക്ക് ഇഷ്ടമുള്ള തുക നല്കാമെന്ന് ധനവകുപ്പ് ഉത്തരവ് പുറപ്പെടുവിച്ചു
സാലറി ചലഞ്ചിലെ തിരിച്ചടിയുടെ വെളിച്ചത്തില് പെന്ഷന് ചലഞ്ചില് ഒരു മാസത്തെ തുക നല്കണമെന്ന നിര്ബന്ധത്തില് നിന്ന് സര്ക്കാര് പിന്നാക്കം പോയി. ഒരു മാസത്തെ പെന്ഷന് തുക നല്കാം. അല്ലെങ്കില് ഇഷ്ടമുള്ള തുകയുമാകാം.
സമ്മതിച്ച തുക ദുരിതാശ്വാസനിധിയിലേക്ക് നല്കാമെന്ന വ്യവസ്ഥ ഉള്പ്പെടുത്തി പെന്ഷന്കാരുടെ വിഹിതം ഈടാക്കുന്നത് സംബന്ധിച്ച് ധനവകുപ്പ് ഉത്തരവ് പുറപ്പെടുവിച്ചു. സാലറി ചലഞ്ചില് സുപ്രീംകോടതിയില് നിന്ന് തിരിച്ചടിയേറ്റ സാഹചര്യത്തിലാണ് പെന്ഷന്കാരുടെ കാര്യത്തില് ധനവകുപ്പ് മാറ്റം വരുത്തിയത്. പെന്ഷന്കാരുടെ സമ്മതപത്രം വാങ്ങി മാത്രമേ തുക ഈടാക്കാവൂവെന്നും നിര്ദേശിച്ചിട്ടുണ്ട്. ഒരു മാസത്തെ തുകയാണ് നേരത്തേ അവരോട് സര്ക്കാര് ആവശ്യപ്പെട്ടിരുന്നത്. പെന്ഷന്കാരുടെ അപേക്ഷയില്ലാതെ ഒരു കാരണവശാലും പെന്ഷനില് നിന്ന് ഒരു തുകയും സംഭാവനയായി കുറവ് ചെയ്യാന് പാടില്ലെന്ന് ധനവകുപ്പിന്റെ ഉത്തരവില് പറയുന്നു.
അതേസമയം, സര്ക്കാര് ജീവനക്കാരുടെ കാര്യത്തില് ഒരു മാസത്തെ തുക എന്ന നിലപാടില് സര്ക്കാര് ഉറച്ചുനില്ക്കുകയാണ്. അതില് കുറഞ്ഞ തുകയാണെങ്കില് മുഖ്യമന്ത്രിയുടെ ദുരിതാശ്വാസനിധിയിലേക്ക് നല്കാമെന്നും സാലറി ചലഞ്ചായി നല്കാന് കഴിയില്ലെന്നുമാണ് ഇപ്പോഴും നിലപാട്. പെന്ഷന്കാരുടെ അപേക്ഷ പ്രകാരം ഒരു മാസത്തെയോ അവര് സമ്മതിച്ച അത്രയുമോ പെന്ഷന് തുക അവര് സമ്മതിച്ച കാലപരിധിയില് ഈടാക്കണമെന്ന് ധനവകുപ്പ് ട്രഷറി ഓഫിസര്മാര്ക്ക് നിര്ദേശം നല്കി. ഇത് പ്രത്യേക അക്കൗണ്ടിലേക്ക് മാറ്റണം. സംഭാവന നല്കിയ തുകയുടെ രസീത് ട്രഷറിയില് നിന്ന് തന്നെ നല്കണം. സംഭാവന നല്കാന് ആഗ്രഹിക്കുന്ന പെന്ഷന്കാര് പ്രത്യേക അപേക്ഷഫോറം പൂരിപ്പിച്ച് ട്രഷറിയില് നല്കണം. ബാങ്ക് വഴി പെന്ഷന് വാങ്ങുന്നവര് ഒരു മാസത്തെ പെന്ഷന് തുകയോ സമ്മതിച്ച തുകയോ സംഭാവന നല്കുന്നതിന് അപേക്ഷ തൊട്ടുത്ത ട്രഷറിയില് നല്കണം. ട്രഷറി ഓഫിസര് അത് അക്കൗണ്ടിലേക്ക് വരവ് ചെയ്യണം.
പുനര്നിര്മാണത്തിന് 30,000 കോടി രൂപ വേണമെന്നും 3800 കോടി രൂപ ജീവനക്കാരില് നിന്നും പെന്ഷന്കാരില് നിന്നും ഒരുമാസ വിഹിതം വഴി സമാഹരിക്കാനാണ് ലക്ഷ്യമെന്നും ഉത്തരവില് പറയുന്നു.
"
https://www.facebook.com/Malayalivartha
