ആദ്യത്തെ ആവേശത്തിന് ശേഷം സര്‍ക്കാര്‍ സമവായ നീക്കത്തിന് ശ്രമിക്കുമ്പോള്‍ ഏറെ വേദനിക്കപ്പെട്ട പന്തളം കൊട്ടാരം നിലപാട് മാറ്റി. ശബരിമല വിഷയത്തില്‍ സര്‍ക്കാര്‍ ഇന്ന് വിളിച്ച അവലോകനയോഗത്തില്‍ പങ്കെടുക്കില്ലെന്ന് പന്തളം കൊട്ടാരം പ്രതിനിധി ശശികുമാരവര്‍മ. ശബരിമല സംരക്ഷണജാഥക്ക് നല്‍കിയ സ്വീകരണത്തിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

യോഗത്തെക്കുറിച്ച് തങ്ങള്‍ക്ക് അറിയിപ്പ് ലഭിച്ചിട്ടില്ല. ലഭിച്ചാലും പങ്കെടുക്കില്ല. സുപ്രീംകോടതി വിധി വരുന്ന അന്നുതന്നെ തിരക്കുപിടിച്ച് യോഗം നടത്തേണ്ട ആവശ്യമില്ല. മുന്‍ വര്‍ഷങ്ങളില്‍ യോഗം ചേര്‍ന്നത് ഭക്തരുടെ സൗകര്യങ്ങള്‍ക്കായിട്ടാണ്. ഇപ്പോള്‍ വിളിക്കുന്നത് പൊലീസിനെ വിന്യസിക്കാനാണ്. ഭക്തരുടെ താല്‍പര്യത്തിനെങ്കില്‍ പൊലീസിനെ മാറ്റണം.

ശബരിമല യുവതീ പ്രവേശനം സംബന്ധിച്ചാണ് പന്തളം കൊട്ടാരം സര്‍ക്കാരുമായി തെറ്റുന്നത്. സര്‍ക്കാര്‍ വിളിച്ച ആദ്യ ചര്‍ച്ചയില്‍ പോലും പന്തളം കൊട്ടാരവും തന്ത്രി കുടുംബവും പങ്കെടുത്തില്ല. തുടര്‍ന്ന് രഹ്ന ഫാത്തിമ ശബരിമലയില്‍ എത്തിയ സമയത്ത് ആചാര ലംഘനമുണ്ടായാല്‍ നടയടയ്ക്കുമെന്ന് തന്ത്രി പറഞ്ഞത് ഏറെ വിവാദമായിരുന്നു. പന്തളം കൊട്ടാരത്തിന്റെ കത്ത് പ്രകാരമാണ് തന്ത്രിയിങ്ങനെ പറഞ്ഞത്. 
അതേസമയം ശബരിമലയില്‍ ക്ഷേത്രം അടച്ചിടുമെന്ന് തന്ത്രി പറഞ്ഞതായ വിവരം അറിയില്ലെന്ന് പന്തളം കൊട്ടാരം നിര്‍വാഹകസംഘം പ്രസിഡന്റ് പി ജി ശശികുമാരവര്‍മയും സെക്രട്ടറി പി എന്‍ നാരായണവര്‍മയും അന്ന് പറഞ്ഞു. ആചാര ലംഘനമുണ്ടായാല്‍ ക്ഷേത്ര നടയടച്ച് ശുദ്ധിക്രിയ ചെയ്യണമെന്നു മാത്രമാണ് കൊട്ടാരം നിര്‍ദേശിച്ചതെന്നാണ് അവര്‍ വ്യക്തമാക്കിയത്.

ശബരിമലയടക്കമുള്ള ക്ഷേത്രങ്ങളില്‍ ദേവസ്വം ബോര്‍ഡിന് ഭരണനിയന്ത്രണ അവകാശം മാത്രമേയുള്ളൂ. തിരുവിതാംകൂര്‍ രാജാവില്‍നിന്ന് ലഭിച്ച മോല്‍ക്കോയ്മ അവകാശത്തിന്റെ അടിസ്ഥാനത്തിലാണ് ദേവസ്വംബോര്‍ഡിന് രൂപം നല്‍കിയത്. ആചാരങ്ങള്‍ സംരക്ഷിക്കുക എന്നതാണ് ബോര്‍ഡിന്റെ ചുമതല. ആചാരലംഘനം അംഗീകരിക്കാനാവില്ല.ശബരിമലയിലെ വരുമാനത്തില്‍ കണ്ണുംനട്ട് ആരൊക്കെയോ ഉണ്ടെന്ന് സംശയിക്കേണ്ടിയിരിക്കുന്നു. 

ശബരിമലയില്‍ നടന്നത് തീര്‍ഥാടനമല്ല. ഭീതി ജനിപ്പിക്കുന്ന അന്തരീക്ഷത്തിലാണ് തീര്‍ഥാടകര്‍ വന്നുപോയത്. അക്രമം നടത്തിയവര്‍ വിശ്വാസികളല്ല. ഇതുസംബന്ധിച്ച് അന്വേഷണം വേണം. ക്ഷേത്രം ആരുടേതെന്ന ചോദ്യത്തിനും പ്രസക്തിയില്ല. എല്ലാ ക്ഷേത്രങ്ങളുടെയും അവസാനവാക്ക് തന്ത്രിയാണ്. ദേവസ്വംബോര്‍ഡ് നിലവില്‍ വന്നശേഷമാണ് മലയരയവിഭാഗത്തെ ശബരിമലയില്‍നിന്ന് ഒഴിവാക്കിയത്. ഇത് കൊട്ടാരത്തിന്റെയോ തന്ത്രി കുടുംബത്തിന്റെയോ നിലപാട് മൂലമല്ലെന്നുമാണ് അവര്‍ വ്യക്തമാക്കിയത്.