ശബരിമലയില്‍ അയ്യപ്പഭക്തര്‍ക്ക് നെയ്യഭിഷേകം നടത്താനാകാത്ത വിധത്തില്‍ പൊലീസ് ഏര്‍പ്പെടുത്തിയ സുരക്ഷാ നിയന്ത്രണങ്ങളോട് ദേവസ്വം ബോര്‍ഡിന് കടുത്ത എതിര്‍പ്പ്. പ്രസിഡന്റ് എ.പത്മകുമാര്‍ പമ്പയില്‍ നടത്തിയ വാര്‍ത്താസമ്മേളനത്തില്‍ ഇക്കാര്യം പറയാതെ പറഞ്ഞു. പൊലീസ് നിയന്ത്രണങ്ങള്‍ ആലോചിച്ച് തീരുമാനം എടുക്കുമെന്ന് ദേവസ്വം എക്‌സിക്യൂട്ടീവ് ഓഫീസര്‍ സുധീഷ്‌കുമാര്‍ പറഞ്ഞു. അതിനാല്‍ മണ്ഡലമഹോത്സവം ആരംഭിക്കും മുമ്പ് പൊലീസും ബോര്‍ഡും തമ്മില്‍ രണ്ടുതട്ടിലായി. ലേലം വിളിച്ച് എടുത്ത കടകള്‍ നട അടച്ച് കഴിയുമ്പോള്‍ അടയ്ക്കണമെന്ന് പൊലീസ് രാവിലെ നോട്ടീസ് നല്‍കി. അവര്‍ക്ക് വലിയ നഷ്ടമുണ്ടാക്കുമിത്. അതിനാല്‍ അവരെല്ലാം രാവിലെ എക്‌സിക്യൂട്ടീവ് ഓഫീസറെ കണ്ട് പരാതി അറിയിച്ചു.

പൊലീസ് യാതൊരുതരത്തിലുമുള്ള വിട്ടുവീഴ്ചയ്ക്കുമില്ല എന്നാണ് അറിയുന്നത്. കാരണം തുലാമാസ പൂജകള്‍ക്കും ചിത്തിരആട്ടത്തിനും നട തുറന്നപ്പോള്‍ ഉണ്ടായ അനിഷ്ടസംഭവങ്ങള്‍ അവരെ കുഴപ്പത്തിലാക്കിയിരുന്നു. പൊലീസിന് ലഭിച്ച വിവരങ്ങളുടെ അടിസ്ഥാനത്തിലാവും നിയന്ത്രണങ്ങള്‍ ഏര്‍പ്പെടുത്തിയതെങ്കിലും ഭക്തര്‍ക്ക് ബുദ്ധിമുട്ടുണ്ടാക്കുന്ന കാര്യങ്ങള്‍ അംഗീകരിക്കാനാവില്ലെന്ന് ദേവസ്വം പ്രസിഡന്റ് പറഞ്ഞു. നെയ്യഭിഷേകം നടത്താന്‍ ഭക്തര്‍ക്ക് ബുദ്ധിമുട്ടുണ്ടാകും കാരണം രാത്രി നല്‍കുന്ന നെയ് അഭിഷേകം നടത്തി അടുത്തദിവസം രാവിലയേ ലഭിക്കൂ. സന്നിധാനത്ത് ഭക്തരെ തങ്ങാന്‍ അനുവദിക്കാതിരുന്നാല്‍ അഭിഷേകത്തിന് പ്രയാസമാകും. അതിനാല്‍ ഇന്ന് തന്നെ തങ്ങള്‍ തിരുവനന്തപുരത്ത് പോയി മുഖ്യമന്ത്രിയും ദേവസ്വംമന്ത്രിയും ഡി.ജി.പിയുമായും ചര്‍ച്ച നടത്തുമെന്നും പ്രസിഡന്റ് പറഞ്ഞു.

നാളെ സീസണ്‍ ആരംഭിക്കാനിരിക്കെ പ്രസിഡന്റും അംഗങ്ങളും തലസ്ഥാനത്തേക്ക് തിരിക്കുന്നതില്‍ നിന്ന് തന്നെ നിയന്ത്രണങ്ങളോട് അവര്‍ക്ക് യോജിപ്പില്ലെന്നാണ് വ്യക്തമാകുന്നത്. ഇതുവരെ നാലഞ്ച് കടകള്‍ മാത്രമാണ് സന്നിധാനത്ത് ലേലം പോയത് എന്നതും ശ്രദ്ധേയമാണ്. അന്നദാനത്തിനും അപ്പം, അരവണ കൗണ്ടറിനും ഏര്‍പ്പെടുത്തിയ നിയന്ത്രണവും ശരിയല്ലെന്ന ആക്ഷേപം ശക്തമാണ്. കാരണം 24 മണിക്കൂറും ഈ കൗണ്ടറുകള്‍ തുറന്ന് പ്രവര്‍ത്തിച്ചിരുന്നതിനാല്‍ നട അടച്ച ശേഷം രാത്രി ഭക്തര്‍ക്ക് ക്യൂ നിന്ന് ഇവ വാങ്ങാമായിരുന്നു.