ശബരിമലയില്‍ സമാധാനപരമായി മണ്ഡല മകരവിളക്ക് തീര്‍ത്ഥാടനം പൂര്‍ത്തിയാക്കാന്‍ എല്ലാവരും സഹകരിക്കണമെന്ന് മുഖ്യമന്ത്രി പിണറായി വിജയന്‍ അഭ്യര്‍ത്ഥിച്ചു.ഇവിടെ ഉണ്ടാവുന്ന അനിഷ്ടസംഭവങ്ങള്‍ സംസ്ഥാനത്തിന്റെ യശസിന് കോട്ടമുണ്ടാക്കും. തീര്‍ത്ഥാടന കേന്ദ്രത്തിന്റെ കീര്‍ത്തിക്ക് മങ്ങലുമേല്പിക്കും.
ശബരിമലയില്‍ ഒരിക്കലും സംഭവിക്കാന്‍ പാടില്ലാത്ത കാര്യങ്ങളാണ് തുലാമാസ പൂജയുടെയും ചിത്തിര ആട്ടപൂജയുടെയും വേളയിലുണ്ടായത്.
ശബരിമലയെ അക്രമത്തിന്റെയും കലാപത്തിന്റെയും കേന്ദ്രമായി മാറാന്‍ അനുവദിച്ചുകൂടാ. ശബരിമലയില്‍ സംഘര്‍ഷമുണ്ടാക്കാനും അതിന്റെ അടിസ്ഥാനത്തില്‍ സംസ്ഥാനത്താകമാനം കലാപമുണ്ടാക്കാനും ചിലര്‍ക്ക് താത്പര്യമുണ്ടാവും. അവരുടെ കൈകളില്‍ കേരളം ഒരിക്കലും പെട്ടുപോകരുത്. ജനങ്ങളില്‍ ആശങ്കയും ചേരിതിരിവും ഉണ്ടാക്കും വിധം തെറ്റായ വാര്‍ത്തകള്‍ പ്രസിദ്ധീകരിക്കാതിരിക്കാന്‍ മാദ്ധ്യമങ്ങളും ശ്രദ്ധിക്കണം. നവമാദ്ധ്യമങ്ങളിലൂടെ തെറ്റായ വാര്‍ത്തകള്‍ പ്രസിദ്ധീകരിച്ച് ജനജീവിതം അസ്വസ്ഥമാക്കാനുള്ള ഇടപെടലുകളും ചില ഭാഗങ്ങളില്‍ ഉയരുന്നുണ്ട്. അത്തരം പ്രവര്‍ത്തനങ്ങളെ ജാഗ്രതയോടെ നിരീക്ഷിക്കാനും ബന്ധപ്പെട്ടവരുടെ ശ്രദ്ധയില്‍പ്പെടുത്താനും പ്രത്യേകം ശ്രദ്ധിക്കണം.

കേരളം കണ്ടതില്‍ ഏറ്റവും വലിയ പ്രളയക്കെടുതിയെയാണ് നാം അതിജീവിച്ചത്. നാടിന്റെ പൊതു താത്പര്യമായിക്കണ്ട് നാം ഉയര്‍ത്തിയ യോജിപ്പാണ് അതിനെ മറികടക്കാന്‍ സാഹചര്യമുണ്ടാക്കിയത്. ആ യോജിപ്പ് ഇക്കാര്യത്തിലും ഉയര്‍ത്തിപ്പിടിച്ച് മുന്നോട്ടുപോകാനാവണം. എല്ലാ വിശ്വാസികള്‍ക്കും അവരുടെ വിശ്വാസങ്ങള്‍ സംരക്ഷിച്ച് ജീവിക്കാനുള്ള അവസരം ഉണ്ടാകേണ്ടതുണ്ട്. അത് ഇല്ലാത്തവര്‍ക്ക് അങ്ങനെ ജീവിക്കാനും. ഈ പരസ്പര ബഹുമാനമാണ് മതനിരപേക്ഷ ജീവിതത്തിന്റെ അടിത്തറയായി നില്‍ക്കുന്നത്. ഭരണഘടന വിഭാവനം ചെയ്യുന്ന മൂല്യങ്ങളില്‍ അടിയുറച്ചു നിന്നുകൊണ്ട് ഇത്തരം കാര്യങ്ങള്‍ നടപ്പാക്കാനാണ് സര്‍ക്കാര്‍ പരിശ്രമിക്കുന്നത്. ശബരിമലയിലെ സുരക്ഷാക്രമീകരണങ്ങളുമായി മുഴുവന്‍ ഭക്തജനങ്ങളും സഹകരിക്കണമെന്നും മുഖ്യമന്ത്രി അഭ്യര്‍ത്ഥിച്ചു.