കനത്തമഴയും സുരക്ഷ സന്നാഹങ്ങളും കര്‍ശന നിയന്ത്രണങ്ങളും ശബരിമല തീര്‍ഥാടകരെ വലക്കുന്നു. വെള്ളിയാഴ്ച രാവിലെ ആരംഭിച്ച മഴ എരുമേലിയിലും എരുമേലിപമ്പ പാതയിലും കാനനപാതകളിലും ഇലവുങ്കലടക്കം ശബരിപാതകളിലും തീര്‍ഥാടകരെ ദുരിതത്തിലാക്കി. എരുമേലിയില്‍നിന്ന് പമ്പാവാലിഇലവുങ്കല്‍ വഴിയുള്ള പമ്പ യാത്രയും പൊലീസിന്റെ പരിശോധനകളും വാഹനം തടഞ്ഞിടലും തീര്‍ഥാടകരെ പ്രതിസന്ധിയിലാക്കിയെന്ന് ആക്ഷേപം ഉയര്‍ന്നിട്ടുണ്ട്. ദേവസ്വം ബോര്‍ഡും ഇക്കാര്യത്തില്‍ അതൃപ്തി അറിയിച്ചു. വാഹനങ്ങള്‍ക്ക് പാസ് ഏര്‍പ്പെടുത്തിയതിനാല്‍ പരിശോധനക്ക് കൂടുതല്‍ സമയം വേണ്ടിവരുന്നു. നിലക്കലില്‍നിന്ന് പമ്പയിലേക്കുള്ള യാത്രക്ക് മഴ തടസ്സം സൃഷ്ടിക്കുന്നതായി സുരക്ഷ ഉദ്യോഗസ്ഥര്‍ അറിയിച്ചു. ശനിയാഴ്ച മുതല്‍ രാത്രിയിലും കടുത്ത നിയന്ത്രണങ്ങള്‍ ഏര്‍പ്പെടുത്തും.

അതേസമയം, നിലവിലെ സുരക്ഷ സംവിധാനങ്ങളില്‍ വീട്ടുവീഴ്ച പാടില്ലെന്ന് രഹസ്യാന്വേഷണ വിഭാഗം ആവര്‍ത്തിച്ച് മുന്നറിയിപ്പ് നല്‍കി. എരുമേലി, പമ്പ, നിലക്കല്‍, സന്നിധാനം എന്നിവിടങ്ങളിലാണ് കനത്ത സുരക്ഷ തുടരേണ്ടതെന്നും നിര്‍ദേശമുണ്ട്. എരുമേലിയില്‍ അടിസ്ഥാന സൗകര്യത്തിന്റെ കുറവ് ബുദ്ധിമുട്ട് സൃഷ്ടിക്കുന്നു. പ്രക്ഷോഭം ഭയന്ന് കച്ചവടക്കാര്‍ സ്ഥലം ലേലം ബഹിഷ്‌കരിച്ചതിനാല്‍ ഭക്ഷണസാധനങ്ങള്‍ക്ക് ബുദ്ധിമുട്ട് നേരിട്ടേക്കാം. നിലവില്‍ ഹോട്ടലുകള്‍ പരിമിതമാണ്. വ്യാഴാഴ്ച ദേവസ്വം ബോര്‍ഡ് നടത്തിയ ലേലത്തിലും സ്ഥലം എടുക്കാന്‍ ആളില്ലാതായി.
സുരക്ഷിതത്വം ഉറപ്പുവരുത്തണമെന്നാണ് കച്ചവടക്കാരുടെ ആവശ്യം. ദേവസ്വം ബോര്‍ഡ് അതിന് തയാറല്ല. നിലവില്‍ എരുമേലിയിലും പമ്പ റൂട്ടിലും സൗകര്യം പരിമിതമാണ്. പമ്പയില്‍ കുളിക്കാന്‍പോലും കഴിയാത്തതിനാല്‍ തീര്‍ഥാടകര്‍ എരുമേലിയില്‍ കൊരട്ടി മണിമലയാറിനെയാണ് ആശ്രയിക്കുന്നത്. എന്നാല്‍, പരമാവധി സൗകര്യമൊരുക്കിയിട്ടുണ്ടെന്നാണ് ദേവസ്വം അധികൃതര്‍ പറയുന്നത്. മഴ തുടര്‍ന്നാല്‍ രാത്രി എരുമേലിയില്‍നിന്ന് പമ്പക്കുള്ള വനയാത്ര ബുദ്ധിമുട്ടായേക്കുമെന്നും തീര്‍ഥാടകര്‍ ജാഗ്രത പുലര്‍ത്തണമെന്നും സുരക്ഷ ഉദ്യോഗസ്ഥര്‍ അറിയിച്ചിട്ടുണ്ട്.