കാനനപാതയിലൂടെ ഇത്തവണ യുവതികള്ക്ക് സന്നിധാനത്തെത്താം, വനംവകുപ്പ് എല്ലാ സുരക്ഷയും ഒരുക്കി, രാവിലെ എട്ട് മുതല് ഉച്ഛയ്ക്ക് രണ്ട് മണിവരെയാണ് തീര്ത്ഥാടകരെ കയറ്റിവിടുക, അനധികൃതമായി ആരെയും കടത്തിവിടുകയുമില്ല
ശബരിമല യുവതീപ്രവേശനം വിവാദമായി തുടരുമ്പോള് പരമ്പരാഗത കാനന പാതയിലൂടെ യുവതികള്ക്കും സന്നിധാനത്തേക്ക് പോകാമെന്ന് വനംവകുപ്പ് ഉറപ്പ് നല്കുന്നു. ഈ പാതയിലൂടെ സ്ത്രീകളെത്തിയാല് സുരക്ഷ നല്കുമെന്നും അധികൃതര് ഉറപ്പ് നല്കുന്നു. യുവതികളെത്തുമെന്ന് മുന്നറിയിപ്പുള്ളതിനാല് വന് സുരക്ഷാക്രമീകരണങ്ങളാണ് സജ്ജമാക്കിയിരിക്കുന്നത്. തങ്ങളുടെ അനുവാദമില്ലാതെ ആരെയും കാടിനുള്ളില് കയറാന് അനുവദിക്കില്ലെന്നും പ്രശ്നങ്ങള് ഉണ്ടാക്കുന്നവരെ മടക്കി അയയ്ക്കുമെന്നും പെരിയാര് ടൈഗര് റിസര്വ് ഡെപ്യൂട്ടി ഡയറക്ടര് സി.കെ ഹാബി പറഞ്ഞു.
രാവിലെ എട്ട് മുതല് ഉച്ഛയ്ക്ക് രണ്ട് മണിവരെയാണ് തീര്ത്ഥാടകരെ കയറ്റിവിടുക. രണ്ട് മണിക്ക് മുമ്പ് കാനനപാതയിലൂടെ പോയാല് മാത്രമേ രാത്രിക്ക് മുമ്പ് സന്നിധാനത്ത് എത്താനാകൂ. അഴുതക്കടവ് ചെറിയാനവട്ടം, സത്രം സന്നിധാനം എന്നീ പരമ്പരാഗത കാനന പാതകളാണ് പെരിയാര് വെസ്റ്റ് ഫോറന്സ്റ്റ് ഡിവിഷന് കീഴിലുള്ളത്. സീസണ് ആരംഭിക്കുന്നതിന് ഒരു മാസം മുമ്പ് രണ്ട് കാനന പാതകളും യാതയ്ക്കായി തെളിച്ചിരുന്നു. ഫോറസ്റ്റ് ഗാര്ഡുകള് ഉള്പ്പെടെ നൂറിലധികം ഉദ്യോഗസ്ഥരെയാണ് പാതകളില് വനംവകുപ്പ് വിന്യസിച്ചിരിക്കുന്നത്. അനധികൃതമായി പലരും വനത്തിലൂടെ സന്നിധാനത്ത് എത്താന് സാധ്യതയുണ്ടെന്ന് കേന്ദ്രരഹസ്യാന്വേഷണ ഏജന്സി മുന്നറിയിപ്പ് നല്കിയിട്ടുണ്ട്. അതിനാല് എല്ലാവരെയും കര്ശന പരിശോധനയ്ക്ക് ശേഷമേ കടത്തിവിടൂ.
രണ്ട് കാനനപതകളിലും ഇടവിട്ട് ഇടവിട്ട് വിശ്രമകേന്ദ്രങ്ങള് ഉള്പ്പെടെയുള്ള സേവനകേന്ദ്രങ്ങള് സജ്ജമാക്കിയിട്ടുണ്ട്. ആനത്താര ഉള്പ്പെടെയുള്ള റിസര്വ് ഫോറസ്റ്റായതിനാല് ആക്രമണങ്ങള് തടയാന് വലിയ സന്നാഹമാണ് ഒരുക്കിയിരിക്കുന്നത്. കഴിഞ്ഞ വര്ഷം അമ്പതിനായിരത്തോളം ഭക്തരാണ് പരമ്പരാഗത കാനനപാത വഴി സന്നിധാനത്തെത്തിയത്. ഇത്തവണ അതിന്റെ ഇരട്ടിയോളമാകും. യുവതികളെ തടയാന് ഹൈന്ദവ സംഘടനാ പ്രവര്ത്തകര് എത്തുമെന്ന രഹസ്യവിവരം ലഭിച്ചിട്ടുണ്ട്.
https://www.facebook.com/Malayalivartha
