ശബരിമലയെ കലാപഭൂമിയാക്കാന്‍ ശശികല ടീച്ചര്‍ ശ്രമിച്ചതിനെ തുടര്‍ന്നാണ് പൊലീസ് അറസ്റ്റ് ചെയ്തതെന്ന് ദേവസ്വംമന്ത്രി കടകംപള്ളി സുരേന്ദ്രന്‍. രക്തച്ചൊരിച്ചില്‍ സൃഷ്ടിക്കാന്‍ ശശികല ടീച്ചര്‍ ഗൂഢാലോചന നടത്തുന്നു. അതിനായി നിരന്തരം ശബരിമല സന്ദര്‍ശിക്കുന്നു. ഒരു മാസത്തിനിടെ നാല് തവണ സന്ദര്‍ശിക്കുന്നത് എന്തിനാണ്. അന്‍പത് വര്‍ഷം തുടര്‍ച്ചായായി മലകയറിയിട്ടുള്ള ഗുരുസ്വാമിമാര്‍ പോലും ഇങ്ങിനെ ചെയ്തിട്ടില്ല. ശബരിമലയെ ചോരക്കളമാക്കാനാണ് ബി.ജെ.പിയും ആര്‍.എസ്.എസും ഹിന്ദുഐക്യവേദിയും ശശികല ടീച്ചറും ശ്രമിക്കുന്നത്.

മരക്കൂട്ടത്തിനടുത്ത് വെത്താണ് ശശികല ടീച്ചറെ അറസ്റ്റ് ചെയ്തത്. വിഷം വമിക്കുന്ന ഫണം വിടര്‍ത്തി ആടുന്ന ടീച്ചറോട് മടങ്ങണമെന്നും സന്നിധാനത്തേക്ക് പോകാന്‍ അനുവദിക്കില്ലെന്നും മടങ്ങണമെന്നും പൊലീസ് പല ആവര്‍ത്തി അഭ്യര്‍ത്ഥിച്ചെങ്കിലും അവര്‍ കേള്‍ക്കാത്തതിനെ തുടര്‍ന്നാണ് അറസ്റ്റ് ചെയ്തതെന്നും മന്ത്രി വ്യക്തമാക്കി. 

ശബരിമലയെ ഗൂഢാലോചനയ്ക്കുള്ള വേദിയാക്കരുതെന്ന് പൊലീസ് ശശികല ടീച്ചറോട് ആവര്‍ത്തിച്ച് പറഞ്ഞു. നിയമവ്യവസ്ഥ ലംഘിക്കാന്‍ തുന്നിഞ്ഞതിനെ തുടര്‍ന്നാണ് അറസ്റ്റ് ചെയ്തത്. നടപ്പന്തലില്‍ ഭക്തര്‍ക്ക് നിയന്ത്രണം ഏര്‍പ്പെടുത്തിയിട്ടില്ല. നടന്ന് തളര്‍ന്നെത്തുന്ന ഭക്തര്‍ക്ക് വിശ്രമിക്കാനാണ് നടപ്പന്തല്‍ അല്ലാതെ ആര്‍.എസ്.എസുകാര്‍ക്ക് തമ്പടിക്കാനുള്ളതല്ല.

സുരക്ഷാക്രമീകരണങ്ങളുടെ ഭാഗമായി പൊലീസ് സന്നിധാനത്തെ കടകള്‍ രാത്രി പത്തിന് ശേഷം അടയ്ക്കണമെന്ന് പറഞ്ഞിരുന്നു. എന്നാല്‍ ഡി.ജി.പിയുമായി സംസാരിച്ച് അത് ഒഴിവാക്കിയെന്നും ദേവസ്വം മന്ത്രി അറിയിച്ചു. വോട്ടിന് വേണ്ടിയാണ് ബി.ജെ.പിയും ആര്‍.എസ്.എസും പ്രശ്‌നങ്ങള്‍ സൃഷ്ടിക്കുന്നത്. ദര്‍ശനത്തിനെത്തിയ തൃപ്തി ദേശായിയെ നെടുമ്പാശേരി വിമാനത്താവളത്തിന് പുറത്തെത്തിക്കാന്‍ സംഘപരിവാറുകാര്‍ അനുവദിച്ചില്ലെന്നും മന്ത്രി പറഞ്ഞു.

തൃപ്തിയെ വിമാനത്താവളത്തിന് പുറത്തിറക്കാഞ്ഞത് സുരക്ഷയെ കരുതിയാണ്. തൃപ്തിയുടെ മാത്രമല്ല, ശശികല ടീച്ചറുടെയും സുരക്ഷ ഉറപ്പാക്കേണ്ടതുണ്ട് അതുകൊണ്ടാണ് പൊലീസ് സംയമനം പാലിക്കുന്നതെന്നും മന്ത്രി പറഞ്ഞു. ഇന്നത്തെ ഹര്‍ത്താല്‍ പതിനായിരക്കണക്കിന് അയ്യപ്പഭക്തരെ ബാധിച്ചു. ജനങ്ങളെ മാത്രമല്ല, ഭക്തരെയും വെല്ലുവിളിക്കുകയാണിവര്‍.ആര്‍ക്കെതിരെയാണ് ഇവര്‍ യുദ്ധം നടത്തുന്നതെന്ന് വ്യക്തമല്ലേ? ജനങ്ങള്‍ ഇതെല്ലാം കാണുന്നുണ്ടെന്നും മന്ത്രി പറഞ്ഞു. ശബരിമലയിലെ വികസന പ്രവര്‍ത്തനങ്ങള്‍ക്ക് തടസമാകുന്ന ചില കാര്യങ്ങളുണ്ട്. അവയെല്ലാം നീക്കുകയാണ് ലക്ഷ്യം. നിലയ്ക്കലെ ബയിസ്‌ക്യാമ്പില്‍ സൗകര്യങ്ങള്‍ കൂടുതല്‍ വേണം. അതെല്ലാമാണ് സര്‍ക്കാര്‍ കൂടുതല്‍ ശ്രദ്ധിക്കുന്നതെന്നും മന്ത്രി അറിയിച്ചു.