ശബരിമലയില്‍ മനപ്പൂര്‍വം സംഘര്‍ഷമുണ്ടാക്കാന്‍ സംഘപരിവാര്‍ ശക്തികള്‍ നെയ്‌ത്തേങ്ങ ആയുധമാക്കുന്നെന്ന് ദേവസ്വം മന്ത്രി കടകംപള്ളി സുരേന്ദ്രന്‍ വ്യക്തമാക്കി. തുലാമാസ പൂജകള്‍ക്കും ചിത്തിരആട്ടവിശേഷത്തിനും നടതുറന്നപ്പോഴാണ് ബി.ജെ.പി സംഘപരിവാര്‍ പ്രവര്‍ത്തകര്‍ നെയ്‌ത്തേങ്ങ ഉപയോഗിച്ച് പൊലീസിനെ ഇടിച്ചത്. എന്നാലവര്‍ ഭൂമിയോളം ക്ഷമിച്ചു. ഇത് അവരുടെ ദൗര്‍ബല്യമായി കാണരുത്. സര്‍ക്കാരിന്റെ നിര്‍ദ്ദേശം പൊലീസ് അതുപോലെ പാലിച്ചത് കൊണ്ടാണ് അന്ന് സന്നിധാനത്ത് പ്രശ്‌നങ്ങള്‍ ഉണ്ടാകാതിരുന്നത്. ദര്‍ശനത്തിനെത്തിയ അന്‍പത്തി രണ്ടുകാരിയെ തടയുകയും ആക്രമിക്കുകയും ചെയ്യുന്ന രീതിയില്‍ വരെ കാര്യങ്ങള്‍ എത്തിയത് കൊണ്ടാണ് നിയന്ത്രണങ്ങള്‍ ഏര്‍പ്പെടുത്തിയതെന്നും മന്ത്രി വ്യക്തമാക്കി. 

സന്നിധാനത്ത് ഡ്യൂട്ടിക്കിട്ട വനിതാ പൊലീസ് ഉദ്യോഗസ്ഥരുടെ പ്രായം പരിശോധിച്ചെന്നും അത് സൗഭാഗ്യമാണെന്നും വീമ്പ് പറയുകയും ചെയ്ത സംഘപരിവാര്‍ പ്രവര്‍ത്തകരയല്ലേ ചിത്തിരആട്ടത്തിന് ശേഷം നമ്മള്‍ കണ്ടത്. മൂത്രമൊഴിച്ചും രക്തം ചിന്തിയും സന്നിധാനം അശുദ്ധമാക്കുമെന്ന് പറഞ്ഞ മാന്യന്‍മാരുമുണ്ട്. അദ്ദേഹമിപ്പോള്‍ പമ്പയില്‍ തമ്പടിച്ചിരിക്കുകയാണെന്ന് രാഹുല്‍ ഈശ്വറിനെ പേരെടുത്ത് പറയാതെ മന്ത്രി വിമര്‍ശിച്ചു. കഴിഞ്ഞദിവസം ശബരിമല ദര്‍ശനത്തിനായി നെടുമ്പാശേരിയിലെത്തിയ തൃപ്തിദേശായിയും രാഹുല്‍ ഈശ്വറും തമ്മില്‍ ചിരിച്ചുകൊണ്ട് സൗഹൃദം പങ്കിടുന്ന ചിത്രങ്ങള്‍ ഇന്നലെ ഒരാള്‍ തന്റെ വാട്‌സാപ്പിലേക്ക് അയച്ചുതന്നെന്നും മന്ത്രി വ്യക്തമാക്കി. 

സുരക്ഷയെ കരുതിയാണ് കൊച്ചിയിലെത്തിയ തൃപ്തിയെ പൊലീസ് പുറത്തിറക്കാഞ്ഞതെന്നും മന്ത്രി പറഞ്ഞു. സഞ്ചാരസ്വാതന്ത്ര്യം തടസപ്പെടുന്ന രീതിയിലാണ് അവരെ സംഘപരിവാര്‍ ശക്തികള്‍ തടഞ്ഞത്. അപ്പോള്‍ ശബരിമലയെ തകര്‍ക്കാന്‍ നോക്കുന്നത് ആരാണെന്ന് വ്യക്തമായി. പനമ്പയിലോ, നിലയ്ക്കലോ വെച്ചല്ല അവരെ തടഞ്ഞതെന്ന് ഓര്‍ക്കണമെന്നും മന്ത്രി പറഞ്ഞു.