ശബരിമല യുവതീപ്രവേശനത്തിന്റെ മറവില്‍ ബി.ജെ.പി സംസ്ഥാനത്ത് വിമോചന സമരത്തിന്റെ അന്തരീക്ഷം സൃഷ്ടിക്കാന്‍ ശ്രമിക്കുകയാണെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. വിമോചന സമരത്തിന്റെ ന്യൂജെന്‍പതിപ്പാണ് ആര്‍.എസ്.എസ് നടത്തുന്നു. മന്ത്രിമാരെ ആക്രമിക്കാന്‍ ശ്രമിക്കുന്നത് അതിന്റെ ഭാഗമായാണ്. ജനാധിപത്യ സ്ഥാപനങ്ങള്‍ക്ക് നേരെയും ആക്രമണം നടത്തുന്നു. വിമോചന സമരകാലത്ത് ഇതെല്ലാം നടന്നിരുന്നു. കലാപം നടത്താന്‍ ആസൂത്രിതശ്രമം നടത്തുന്നു. നിരോധനാജ്ഞ ലംഘിക്കാന്‍ ശ്രമിച്ചതിനാണ് കെ.സുരേന്ദ്രനെ അറസ്റ്റ് ചെയ്തത്. സുപ്രീംകോടതി വിധി നടപ്പാക്കാന്‍ നിരോധനാജ്ഞ ഉള്‍പ്പെടെ പ്രഖ്യാപിക്കണമെന്ന് കേന്ദ്രംഭരിക്കുന്ന ബി.ജെ.പി സര്‍ക്കാരിന്റെ ആഭ്യന്തരമന്ത്രാലയമാണ് ആവശ്യപ്പെട്ടതെന്നും കോടിയേരി പറഞ്ഞു.

അക്രമകാരികളെ പുറത്തിറക്കി കലാപമുണ്ടാക്കാനുള്ള നീക്കം അനുവദിക്കില്ല. ജനങ്ങള്‍ ഇതിനെതിരെ രംഗത്ത് വരും. അഞ്ച് ശതമാനം ആളുകളാണ് ബി.ജെ.പിക്കൊപ്പമുള്ളത്. ബാക്കിയുള്ളവര്‍ സമരത്തിനെതിരാണ്. അവര്‍ മൗനംപാലിക്കുന്നത് കൊണ്ടാണ് ഇവര്‍ അക്രമത്തിന് മുതിരുന്നത്. 91ല്‍ യുവതികളെ കയറ്റരുതെന്ന് ഹൈക്കോടതി ഉത്തരവിട്ടത് അന്നത്തെ എല്‍.ഡി.എഫ് സര്‍ക്കാര്‍ നടപ്പാക്കി. ഇപ്പോള്‍ സുപ്രീംകോടതി പറഞ്ഞ ഉത്തരവും നടപ്പാക്കും. വിധിക്കെതിരെ ജനങ്ങളെ ഇറക്കി സമരം നടത്തിയാല്‍ സര്‍ക്കാരിന് ഒന്നും ചെയ്യാനാവില്ല.

ജനങ്ങളെ ബുദ്ധിമുട്ടിക്കാതെ കേന്ദ്രഗവണ്‍മെന്റിന് ഓര്‍ഡിനന്‍സ് ഇറക്കിയാല്‍ തീരാവുന്ന പ്രശ്‌നമേ ഉള്ളൂ. അത് ചെയ്യാതെ ജനങ്ങളെ കബളിപ്പിക്കുകയാണ് ചെയ്യുന്നത്. വിഷയം ഉന്നയിച്ച് എന്‍.എസ്.എസ് നടത്തുന്ന സമരം ആര്‍.എസ്.എസിനൊപ്പമല്ല. എന്‍.എസ്.എസ് അക്രമം നടത്തുകയുമില്ല. അവര്‍ ഉന്നയിച്ച ആവശ്യങ്ങള്‍ നടപ്പാക്കുന്നതിന്റെ ഭാഗമായാണ് ദേവസ്വംബോര്‍ഡ് സഹായ ഹര്‍ജി ഉള്‍പ്പെടെ നല്‍കുന്നത്.