ശബരിമല ദര്ശനത്തിനെത്തിയ കെ.സുരേന്ദ്രനെ പൊലീസ് അറസ്റ്റ് ചെയ്തതിനെ തുടര്ന്ന് സര്ക്കാരിനെതിരെ ബി.ജെ.പി നിലപാട് ശക്തമാക്കി, ദേവസ്വം മന്ത്രി കടകംപള്ളി സുരേന്ദ്രന് പങ്കെടുത്ത തിരുവനന്തപുരത്തെ യോഗം ബി.ജെ.പി കൗണ്സിലര്മാര് അലങ്കോലമാക്കി
കെ. സുരേന്ദ്രന്റെ അറസ്റ്റിന് പിന്നാലെ സര്ക്കാരിനെതിരായ നിലപാട് ബി.ജെ.പി കടുപ്പിക്കുന്നു. ഇതിന്റെ ഭാഗമായി ദേവസ്വം മന്ത്രി കടകംപള്ളി സുരേന്ദ്രന്റെ യോഗം ബി.ജെ.പി കൗണ്സിലര്മാര് അലങ്കോലമാക്കി. സ്ഥലത്ത് വലിയ സംഘര്ഷാവസ്ഥയാണ് നിലനിന്നത്. തിരുവനന്തപുരം നഗരസഭയുടെ 2019-20 സാമ്പത്തിക വര്ഷത്തെ വികസന സെമിനാര് പട്ടം സെന്റ് മേരീസ് ഓഡിറ്റോറിയത്തില് ദേവസ്വം ട്യൂറിസം വകുപ്പ് മന്ത്രി വേദിയിലേക്ക് എത്തിയപ്പോഴാണ് ബി.ജെ.പി കൗണ്സിലങ്ങങ്ങള് യോഗം അലങ്കോലപ്പെടുത്തിയത്. ജില്ലയുടെ ചുമതലയുള്ള മന്ത്രി എന്ന നിലയിലാണ് കടകംപള്ളിയെ ഉദ്ഘാടനത്തിന് ക്ഷണിച്ചത്. എന്നാല് സെമിനാറുമായി യാതൊരു ബന്ധവുമില്ലാത്ത വിഷയം ഉന്നയിച്ചാണ് ബി.ജെ.പി കൗണ്സിലര്മാരും പ്രവര്ത്തകരും പരിപാടിയില് അക്രമത്തിന് ശ്രമിച്ചത്. പൊലീസ് ഇടപെട്ടാണ് ഇവരെ നിയന്ത്രിച്ചത്.
സര്ക്കാര് നിര്ദ്ദേശപ്രകാരം പദ്ധതി രൂപീകരണ നടപടിക്രമങ്ങള് സമയബന്ധിതമായി പൂര്ത്തീകരിച്ചാണ് വികസന സെമിനാറിലേക്ക് നഗരസഭ എത്തിയത്. 100 വാര്ഡ് സഭകളും സമയബന്ധിതമായി പൂര്ത്തിയാക്കാനായി. നഗരത്തിന്റെ വരും സാമ്പത്തിക വര്ഷത്തെ വികസന പ്രവര്ത്തനങ്ങള്ക്ക് അന്തിമ രൂപം നല്കുന്ന ഈ വികസന സെമിനാര് അലങ്കോലപ്പെടുത്തുന്നതിലൂടെ വരും വര്ഷത്തെ നഗര വികസനത്തെ അട്ടിമറിക്കാനാണ് ബി.ജെ.പി അംഗങ്ങള് ശ്രമിച്ചതെന്ന് മേയര് വി.കെ പ്രശാന്ത് ആരോപിച്ചു.
പ്രതിഷേധക്കാരെ ബി.ജെ.പി കൗണ്സിലര് ഗോപന് ഇടപെട്ട് ശാന്തരാക്കാന് ശ്രമിച്ചെങ്കിലും നടന്നില്ല. പിന്നീട് പൊലീസ് എത്തിയാണ് സ്ഥിതിഗതികള് നിയന്ത്രിച്ചത്. നഗരത്തിലെ വിവിധ വാര്ഡുകളിലെ തെരഞ്ഞെടുക്കപ്പെട്ട പ്രതിനിധികള് പങ്കെടുത്ത വികസന സെമിനാര് മന്ത്രി പിന്നീട് ഉദ്ഘാടനം ചെയ്തു. തുടര്ന്ന് പ്രത്യേക വര്ക്കിങ് ഗ്രൂപ്പുകള് ചേരുകയും പദ്ധതി പ്രവര്ത്തനങ്ങള്ക്ക് രൂപം നല്കുകയും ചെയ്തു. നഗരസഭ സ്റ്റാഡിംഗ് കമ്മിറ്റി ചെയര്മാന്മാര് ആസൂത്രണ സമിതി അംഗങ്ങള് ഉള്പ്പടെ വന് ജനപങ്ങളിത്തമുണ്ടായി. അനാവശ്യ വിവാദങ്ങളുണ്ടാക്കി നഗരസഭാ വികസന പ്രവര്ത്തനങ്ങളെ അട്ടിമറിക്കുന്നതിലൂടെ നഗരത്തിലെ ജനങ്ങളെ ബി.ജെ.പി വെല്ലുവിളിക്കുകായാണെന്നും അക്രമത്തെ നഗരസഭ അപലപിക്കുന്നതായും മേയര് പറഞ്ഞു.
https://www.facebook.com/Malayalivartha
