അയ്യപ്പന്മാരെയും പൊലീസിനെയും സര്ക്കാര് ശത്രുക്കളാക്കിയെന്ന് ബി.ജെ.പി സംസ്ഥാന പ്രസിഡന്റ് ശ്രീധരന്പിള്ള, അയ്യപ്പസൗഹൃദ പൊലീസ് സംവിധാനത്തെ തകര്ത്തു, ഇതിനെല്ലാമെതിരെ സമരം ശക്തമാക്കുമെന്നും അദ്ദേഹം വ്യക്തമാക്കി
ബി.ജെ.പി സംസ്ഥാന ജനറല് സെക്രട്ടറി കെ.സുരേന്ദ്രനെതിരെ പൊലീസ് കള്ളക്കേസ് എടുത്തിരിക്കുകയാണെന്ന് സംസ്ഥാന അധ്യക്ഷന് പി.എസ് ശ്രീധരന്പിള്ള ആരോപിച്ചു. ഇതിനെതിരെ നിയമപോരാട്ടം തുടരും. എനിക്കെതിരെയും കള്ളക്കേസ് എടുത്തു. കെ.സുരേന്ദ്രന് ആചാരം പാലിച്ചില്ലെന്നാണ് ഇപ്പോള് ദേവസ്വം മന്ത്രി പറയുന്നത്. ഓരോ ക്ഷേത്രത്തിലും ഓരോ ആചാരമാണെന്ന് ശ്രീധരന്പിള്ള ചൂണ്ടിക്കാട്ടി. ആശയ പോരാട്ടത്തിന് പകരം സ്റ്റാലിനിസം നടപ്പാക്കാനാണ് പിണറായി സര്ക്കാര് ശ്രമിക്കുന്നത്. അത് വിലപ്പോകില്ലെന്നും അദ്ദേഹം ചൂണ്ടിക്കാട്ടി.
ശബരിമലയിലെ പൊലീസ് രാജിനെതിരെ ബി.ജെ.പി ശക്തമായ പ്രക്ഷോഭം നടത്തും. ദേശീയ നേതാക്കളെ ഓരോ ദിവസവും ശബരിമലയിലെത്തിക്കും. സന്നിധാനത്തെ സംവിധാനങ്ങള് അട്ടിമറിക്കാനാണ് പൊലീസിനെ കൊണ്ട് ബൂട്ടിടീച്ചതും തൊപ്പിവപ്പിച്ചതും ഷീല്ഡ് ധരിപ്പിച്ചതും. ഇത് അയ്യപ്പസൗഹൃദ പൊലീസ് സംവിധാനത്തെ തകര്ക്കും. പൊലീസിനെയും ഭക്തരെയും ശത്രുക്കളാക്കുകയാണ് ഡി.ജി.പി ചെയ്തത്. ലാത്തി പിടിച്ചും ബൂട്ട് ധരിച്ചും പൊലീസുകാര്ക്ക് അയ്യപ്പാ എന്ന് വിളിക്കാന് പറ്റില്ല. സി.പി.എം പാര്ട്ടി കോണ്ഗ്രസ് പ്രമേയം ശബരിമലയില് നടപ്പാക്കാന് അനുവദിക്കില്ലെന്നും ശ്രീധരന്പിള്ള വ്യക്തമാക്കി.
ശബരിമലയില് അടിസ്ഥാന സൗകര്യങ്ങള് ഒരുക്കാത്ത സര്ക്കാര് നടപടിക്കെതിരെ ദേവസ്വം ബോര്ഡ് ഓഫീസുകളില് ഉപരോധ സമരം നടത്തുമെന്നും ശ്രീധരന്പിള്ള പറഞ്ഞു. തുലാമാസ മാസപൂജക്കും ചിത്തിര ആട്ട വിശേഷത്തിനും ശബരിമലയില് പ്രക്ഷോഭം നടത്തിയ ബി.ജെ.പി നേതാക്കളെ അറസ്റ്റ് ചെയ്യുമെന്ന് പൊലീസ് വ്യക്തമാക്കിയതിന് പിന്നാലെയാണ് ബിജെപി സമരത്തിന്റെ രീതി മാറ്റുകയാണെന്ന സൂചനയും ശ്രീധരന്പിള്ള നല്കി.
https://www.facebook.com/Malayalivartha