ശബരിമലയില് പൊലീസ് ഏര്പ്പെടുത്തിയ നിയന്ത്രണങ്ങള് ഭക്തരെ വലയ്ക്കുന്നതിനാല് ബി.ജെ.പി ഹൈക്കോടതിയെ സമീപിക്കുന്നു, ആര്.എസ്.എസിന്റെ നേതൃത്വത്തിലുള്ള ശബരിമല കര്മസമിതി ഗവര്ണര്ക്ക് പരാതി നല്കും
ശബരിമലയില് പൊലീസ് ഏര്പ്പെടുത്തിയ നിയന്ത്രണങ്ങള് ഭക്തരെ വലയ്ക്കുന്നതിനാല് ബി.ജെ.പി ഹൈക്കോടതിയെ സമീപിക്കുന്നു. നിയന്ത്രണങ്ങള് നിയമവഴിയിലൂടെ മാറ്റി രാഷ്ട്രീയ വിജയം കൈവരിക്കുകയാണ് ലക്ഷ്യം. ഇതിനായി ഹര്ജി നല്കും. തീര്ത്ഥാടകരുടെ പ്രാഥമികമായ അവകാശങ്ങളില് പോലും പൊലീസ് ഇടപെടുകയാണ്.
അത് ക്രമസമാധാനപ്രശ്നങ്ങള് ചൂണ്ടിയാണ്. സംസ്ഥാന ജനറല് സെക്രട്ടറി കെ.സുരേന്ദ്രനെ ഇരുമുടിക്കെട്ടുണ്ടായിട്ടും പോകാന് അനുവദിച്ചില്ലെന്ന് മാത്രമല്ല, അറസ്റ്റ് ചെയ്ത് ജയിലില് അടയ്ക്കുകയും ചെയ്തു. ബി.ജെ.പി ആര്.എസ്.എസ് നേതാക്കളെ ഇത്തരത്തില് ദര്ശനത്തിന് അനുവദിക്കുന്നില്ലെന്നും ഹര്ജിയില് വ്യക്തമാക്കും.
ആര്.എസ്.എസിന്റെ നേതൃത്വത്തിലുള്ള ശബരിമല കര്മസമിതി, നിയന്ത്രണങ്ങള് പൂര്ണമായും മാറ്റണമെന്ന് ആവശ്യപ്പെട്ട് ഗവര്ണര് പി.സദാശിവത്തെ കാണാനും തീരുമാനിച്ചിട്ടുണ്ട്. ഇന്ന് ഗവര്ണര് കോട്ടയത്ത് എത്തുന്നുണ്ട്. ഗസ്റ്റ് ഹൗസില് വെച്ച് കര്മസമിതിക്ക് കാണാന് അനുമതി ലഭിച്ചിട്ടുണ്ട്. കുടിവെള്ളവും ശൗചാലയവും അടക്കമുള്ള അത്യാവശ്യ സൗകര്യങ്ങള് ഇല്ലാത്തത് തീര്ത്ഥാടകരെ വലയ്ക്കുകയും അയ്യപ്പഭക്തരുടെ വരവില് ക്രമാതീതമായി കുറവ് വരുകയും ചെയ്യുന്നു. ഇത് ശബരിമലയുടെ നിലനില്പ്പിനെ തന്നെ ബാധിക്കും. ഇക്കാര്യങ്ങള് ഗവര്ണറെ ധരിപ്പിക്കും.
സന്നിധാനത്ത് ഭക്തരെ രാത്രി തങ്ങാന് അനുവദിക്കാത്തതിനാല് നെയ്യഭിഷേകം ചെയ്യാന് കഴിയില്ല. പൊലീസ് ഏര്പ്പെടുത്തിയ ഈ നിയന്ത്രണം ആദ്യം എടുത്ത് കളയണമെന്നായിരുന്നു ആവശ്യം. പൊലീസ് ആദ്യം വഴങ്ങിയില്ലെങ്കിലും ദേവസ്വം മന്ത്രിയും ബോര്ഡും ഇടപെട്ടതോടെ പൊലീസ് ഇളവ് വരുത്തി. നെയ്യഭിഷേകമോ, പടിപൂജയോ ബുക്ക് ചെയ്യാത്തവര്ക്കോ, വൃദ്ധരും ശാരീരിക അവശതകള് ഇല്ലാത്തവര്ക്കോ സന്നിധാനത്ത് തങ്ങാനാവില്ല. അഭിഷേകം ചെയ്യേണ്ടവര് രസീത് കാണാച്ചാല് മതി. അവര്ക്ക് വിരിവെച്ച് സന്നിധാനത്ത് തന്നെ തങ്ങാം.
https://www.facebook.com/Malayalivartha