സര്ക്കാര് ഭക്തര്ക്ക് വഴങ്ങി, നിയന്ത്രണങ്ങള് പമ്പയില് ഒഴുക്കി, നെയ്യഭിഷേകം പുലര്ച്ച മൂന്നേകാല് മുതല് ഉച്ചയ്ക്ക് 12 വരെ, ഭക്തര്ക്ക് സന്നിധാനത്തെ ദേവസ്വം മുറികളിലും നടപ്പന്തലിലും തങ്ങാം, സമരക്കാരെ എങ്ങും തങ്ങാന് അനുവദിക്കില്ല
ശബരിമലയില് ഭക്തര്ക്ക് ബുദ്ധിമുട്ടുണ്ടാക്കുന്ന നിയന്ത്രണങ്ങള് എടുത്ത് കളയുമെന്ന് ദേവസ്വം ബോര്ഡ് പ്രസിഡന്റ് എ. പത്മകുമാര്. മുഖ്യമന്ത്രിയുടെ ഓഫീസില് നടന്ന ചര്ച്ചയ്ക്ക് ശേഷം മാധ്യമങ്ങളോട് സംസാരിക്കുകയായിരുന്നു. സന്നിധാനത്തും നടപ്പന്തലിലും ദര്ശനത്തിനും അഭിഷേകത്തിനും എത്തുന്നവര്ക്ക് യാതൊരു പ്രയാസവും ഉണ്ടാവില്ല. നെയ്യഭിഷേക സമയം പുലര്ച്ചെ മൂന്നേകാല് മുതല് ഉച്ചയ്ക്ക് 12 മണി വരെ നെയ്യഭിഷേകം നടത്താം.
വിശ്വാസികള്ക്ക് ദേവസ്വം ബോര്ഡിന്റെ മുറികളില് തങ്ങാം. പ്രതിഷേധത്തിനും സമരത്തിനും എത്തുന്നവര്ക്ക് യാതൊരു കാരണവശാലും മുറികള് അനുവദിക്കില്ല. അവരെ നടപ്പന്തലില് തങ്ങാന് അനുവദിക്കുകയുമില്ലെന്നും അദ്ദേഹം വ്യക്തമാക്കി. നിയന്ത്രണങ്ങളിലെ ഇളവ് സംബന്ധിച്ച് ഡി.ജി.പിയുമായും മുഖ്യമന്ത്രിയുടെ പ്രൈവറ്റ് സെക്രട്ടറി എം.വി ജയരാജനുമായാണ് ചര്ച്ച നടത്തിയത്.
ബേസ് ക്യാമ്പായ നിലയ്ക്കലില് പതിനായിരം പേര്ക്ക് വിരിവയ്ക്കാനുള്ള സൗകര്യം ഉണ്ട്. ഇരുപതിനായിരം വാഹനങ്ങള്ക്ക് പാര്ക്ക് ചെയ്യാം. മണിക്കൂറില് അറുപതിനായിരം ലിറ്റര് വെള്ളം ഇവിടെ ലഭ്യമാക്കും. ടോയ്ലറ്റ് സംവിധാനം ഇവിടെയില്ല. മകരവിളക്ക് കഴിയുന്നതോടെ അതിന്റെ നിര്മാണം നടത്തുമെന്നും അദ്ദേഹം അറിയിച്ചു. പമ്പയില് 350 ബയോ ടോയ്ലെറ്റുകള് കൂടി പണിയും പ്രളയം നശിപ്പിച്ച പമ്പയിലെ പ്രശ്നങ്ങള് ടാറ്റാ കണ്സള്ട്ടണ്സിയെ കൊണ്ട് യുദ്ധകാല അടിസ്ഥാനത്തിലാണ് പൂര്ത്തിയാക്കിയതെന്നും പ്രസിഡന്റ് പറഞ്ഞു.
https://www.facebook.com/Malayalivartha
