ശബരിമലയില്‍ നിരോധനാജ്ഞ ലംഘിച്ചവരെ അറസ്റ്റ് ചെയ്തതില്‍ പ്രതിഷേധിച്ച്‌ കെഎസ്‌ആര്‍ടിസി ബസുകള്‍ക്ക് നേരെ വ്യാപക അക്രമം. കൊട്ടാരക്കരയില്‍ കെഎസ്‌ആര്‍ടിസി ബസിന് നേരെ കല്ലേറ്. തൃശൂരിലേക്ക് പോകുകയായിരുന്ന ബസിന് നേര്‍ക്കായിരുന്നു കല്ലെറിഞ്ഞത്. ആക്രമണത്തില്‍ ബസിന്റെ മുന്‍ഭാഗത്തെ ചില്ല് തകര്‍ന്നു. ഇന്നലെ രാത്രി ശബരിമല നട അടയ്ക്കുന്നതിന് മുമ്ബാണ് സന്നിധാനത്ത് പ്രതിഷേധം ഉണ്ടായത്. നിരോധനാജ്ഞ ലംഘിച്ച്‌ പ്രതിഷേധിച്ചതോടെ പൊലീസ് അന്‍പതോളം പേരെ അറസ്റ്റ് ചെയ്ത് നീക്കുകയായിരുന്നു.

ശബരിമലയില്‍ നാമജപപ്രതിഷേധക്കാരുടെ അറസ്റ്റിനെ തുടര്‍ന്ന് സംസ്ഥാന വ്യപകമായ പ്രതിഷേധമാണ് സംസ്ഥാനത്ത് അരങ്ങേറുന്നത്. തലസ്ഥാനത്ത് മുഖ്യമന്ത്രിയുടെ വസതിക്ക് മുന്നില്‍ ശബരിമല കര്‍മസമിതിയുടെ നേതൃത്വത്തില്‍ പ്രതിഷേധം നടന്നു. ആറന്‍മുളയില്‍ ദേവസ്വം ബോര്‍ഡ് പ്രസിഡന്റ് എ. പത്മകുമാറിന്റെ വസതിയും ഉപരോധിച്ചു. മലപ്പുറം അങ്ങാടിപ്പുറത്ത് പാലക്കാട്- കോഴിക്കോട് ദേശീയപാത നാമജപപ്രതിഷേധക്കാര്‍ ഉപരോധിച്ചു.

വിവിധ ജില്ലകളിലെ നിരവധി പൊലിസ് സ്റ്റേഷനുകള്‍ക്ക് മുന്നിലും പ്രതിഷേധം നടന്നു. നിലയ്ക്കല്‍ നിന്ന് പമ്ബയിലേക്ക് എത്തിയ ബസുകള്‍ക്ക് നേരെയും അക്രമം നടത്താന്‍ ശ്രമം ഉണ്ടായെങ്കിലും പൊലീസ് ഇടപെട്ട് പ്രതിഷേധക്കാരെ നീക്കം ചെയ്യുകയായിരുന്നു. കല്ലേറിനെ തുടര്‍ന്ന് കെഎസ്‌ആര്‍ടിസി ബസ് താത്കാലികമായി നിര്‍ത്തിവച്ചെങ്കിലും വീണ്ടും പുനഃസ്ഥാപിച്ചു. ആലപ്പുഴയില്‍ പൊലീസ് വാഹനത്തിന് നേരെയും അക്രമം ഉണ്ടായി. സംസ്ഥാനത്ത് ഇന്ന് പ്രതിഷേധ ദിനമായി ആചരിക്കുമെന്നാണ് യുവമോര്‍ച്ച പ്രഖ്യാപിച്ചിരിക്കുന്നത്. ഈ സാഹചര്യത്തില്‍ കൂടുതല്‍ പൊലീസിനെ പ്രധാന സ്ഥലങ്ങളില്‍ വിന്യസിക്കാന്‍ തീരുമാനമായിട്ടുണ്ട്.