സുവര്‍ണ്ണാവസരം പരമാവധി മുതലാക്കി ബി ജെ പി. സര്‍ക്കാരിന്റെ ധാര്‍ഷ്ട്യം വിശ്വാസ മനസ്സുകളെ വേദനപ്പിച്ചു. വെല്ലുവിളി ഹൈന്ദവ വിശ്വാസങ്ങള്‍ക്കെതിരെയുള്ള കടന്നുകയറ്റമായി. വിശ്വാസികള്‍ക്കൊപ്പം നിന്നുള്ള പോരാട്ടം ബി ജെ പി ക്കു പ്രതീക്ഷിച്ചതിലുമേറെ നേട്ടമുണ്ടാക്കാന്‍ കഴിഞ്ഞു. തങ്ങളോട് എക്കാലവും അകലം പാലിച്ചിരുന്ന ചില ഹിന്ദു വിഭാഗങ്ങള്‍ അടുപ്പം കാട്ടിത്തുടങ്ങിയതായാണു ബി.ജെ.പിയുടെ വിലയിരുത്തല്‍. ശബരിമല വിഷയത്തില്‍ സംസ്ഥാന സര്‍ക്കാരിന്റെ കടുംപിടിത്തം ബി.ജെ.പിയുടെ വളര്‍ച്ചയ്ക്കായി പരമാവധി പ്രയോജനപ്പെടുത്താന്‍ കേന്ദ്ര നേതൃത്വം.

അപ്രതീക്ഷിത നേട്ടം വോട്ടാക്കിമാറ്റാനാണ് ഇനിയുള്ള ശ്രമം. ഇതിനായി പാര്‍ട്ടിയുടെ ദേശീയ നേതാക്കളടക്കം കേരളത്തിലെത്തും.
ഇപ്പോഴുണ്ടായ ഹൈന്ദവ ധ്രുവീകരണം വോട്ടാക്കാനുള്ള തന്ത്രങ്ങളാവിഷ്‌കരിക്കാന്‍ ബി.ജെ.പി. ദേശീയ നേതൃത്വം സംസ്ഥാന നേതൃത്വത്തിനു നിര്‍ദേശം നല്‍കി. ഇതിന് ഊര്‍ജം പകര്‍ന്ന് വിവിധ ഹിന്ദു സംഘടനകളുടെ ദേശീയ നേതാക്കള്‍ മണ്ഡലകാലത്തിനിടെ ഇവിടെയെത്തും. മണ്ഡലകാലം കഴിഞ്ഞാലുടന്‍ കേരളത്തിലെ ഓരോ ലോക്‌സഭാ മണ്ഡലത്തിന്റെ ചുമതലയുളള ബി.ജെ.പി. നേതാക്കളുമെത്തും.
കേരളത്തിലെ മുഖ്യധാരാ മാധ്യമങ്ങളില്‍ സി പി എം , കോണ്‍ഗ്രസ് കോക്കസ്സുകളുണ്ടെന്നും അവരുടെ അജണ്ടകള്‍ പൊളിച്ചു സ്വന്തം ടിവി ചാനലായ ജനം ടിവിക്കു ലഭിച്ച ജനപ്രീതി ഹിന്ദു വിഭാഗങ്ങള്‍ മാറിച്ചിന്തിക്കുന്നതിന്റെ സൂചനയാണെന്നു ബി.ജെ.പി. കരുതുന്നു. ശബരിമലയില്‍ അയ്യപ്പന്മാരെ ബുദ്ധിമുട്ടിക്കുകയും നെയ്യഭിഷേകം പോലും തടസപ്പെടുത്തുകയും ചെയ്യുന്ന നിയന്ത്രണങ്ങള്‍ ഹൈന്ദവ വിശ്വാസികളെ അസ്വസ്ഥരാക്കിയിട്ടുണ്ട്. ഈ സാഹചര്യം പ്രയോജനപ്പെടുതാനാണ് ഇനിയുള്ള നീക്കങ്ങള്‍. കെ സുരേന്ദ്രന്റെ അറസ്റ്റിനു പിന്നാലെ ഇന്ന് കൂടുതല്‍ നേതാക്കള്‍ ശബരിമലയിലെത്തും. അറസ്റ്റു തുടരാനാണ് ഭാവമെങ്കില്‍ ജയില്‍ നിറക്കല്‍ അടക്കമുള്ള കാര്യങ്ങളിലേക്ക് കടക്കുമെന്ന് നേതാക്കള്‍ പറയുന്നു.
ന്യൂനപക്ഷങ്ങളെക്കൂടി കണ്ടുകൊണ്ടുള്ള മൃദുഹിന്ദുത്വത്തില്‍നിന്നു മാറി കൂടുതല്‍ ശക്തമായ സമീപനം സ്വീകരിക്കണമെന്ന അഭിപ്രായം ശക്തമാണ്. അഞ്ചു ശതമാനം വോട്ട് മറിഞ്ഞാല്‍പ്പോലും ഭരണം അട്ടിമറിക്കപ്പെടുന്ന കേരളത്തില്‍ ശബരിമല വിഷയം മൂലമുണ്ടാകുന്ന വ്യത്യാസം ചെറുതായിരിക്കില്ല.
നിലപാടുകൊണ്ട് സി പി എം പിടിച്ചു നിന്നാലും വലിയൊരു വോട്ടുചോര്‍ച്ചയുണ്ടാകും എന്നാണ് കണക്കുകൂട്ടല്‍. വരുന്ന ലോക്‌സഭാ തെരഞ്ഞെടുപ്പ് മാറ്റത്തിനു കളമൊരുങ്ങുമെന്ന് ബി ജെ പി കണക്കു കൂട്ടുന്നു.
ഇതു തിരിച്ചറിഞ്ഞാണ് ബി.ജെ.പി.ക്കു വേണ്ടി സി.പി.എം. നടത്തുന്ന രാഷ്ട്രീയക്കളിയാണു ശബരിമലയിലെ പ്രധാന വിഷയമെന്നു കോണ്‍ഗ്രസ് ആരോപിക്കുന്നത്. ഓരോ ദിവസവും പോലീസ് നടപടികളിലൂടെ ഓരോ പുതിയ നേതാക്കള്‍ സൂപ്പര്‍ താരങ്ങളാകുന്നു. വിശ്വാസി സമരത്തിലൂടെ ആര്‍ എസ് എസ് പോലും കൂടുതല്‍ സ്വീകാര്യമായി കേരളത്തിന്. വത്സന്‍ തില്ലങ്കേരിയെ വലിയ നേതാവാക്കിയ സര്‍ക്കാര്‍ ബി ജെ പി യെ വളര്‍ത്തുകയല്ലേ എന്ന കോണ്‍ഗ്രസ് ചോദ്യവും ശ്രദ്ധേയമാണ്. കേരളം ബി ജെ പിയിലേക്ക് കൂടുതല്‍ അടുക്കുന്നു എന്ന് വ്യക്തം.