പ്രധാന ഇടത്താവളമായ നിലക്കലില്‍ പാര്‍ക്കിങ്ങിന് സൗകര്യം വിപുലീകരിക്കാനുള്ള പ്രവര്‍ത്തനങ്ങള്‍ ഇനിയും പൂര്‍ത്തിയായില്ല. ശൗചാലയങ്ങളില്‍ അടക്കം വെള്ളം എത്തിക്കാനുള്ള പ്രവര്‍ത്തനങ്ങളും പാതിവഴിയിലാണ്. പാര്‍ക്കിങ് സൗകര്യം വര്‍ധിപ്പിക്കാന്‍ നിലക്കല്‍ എസ്‌റ്റേറ്റിലെ 1400 റബര്‍ മരങ്ങളാണ് വെട്ടിനീക്കുന്നത്. ഇതില്‍ പകുതിയോളം മാത്രമേ ഇനിയും വെട്ടിമാറ്റാന്‍ കഴിഞ്ഞിട്ടുള്ളൂ. 1400 മരങ്ങള്‍ കൂടി വെട്ടിയാല്‍ 4000 മുതല്‍ 5000 വരെ വാഹനങ്ങള്‍ അധികമായി പാര്‍ക്ക് ചെയ്യാന്‍ കഴിയും. കഴിഞ്ഞ സീസണില്‍ 50,000 വരെ വാഹനങ്ങളാണ് ഒരേസമയം നിലക്കലില്‍ പാര്‍ക്ക് ചെയ്തത്. പതിനായിരത്തോളം വാഹനങ്ങള്‍ പമ്പയിലും പരിസരങ്ങളിലുമായും പാര്‍ക്ക് ചെയ്തിരുന്നു. ഇത്തവണ പമ്പയിലെ പാര്‍ക്കിങ് പൂര്‍ണമായി തടഞ്ഞിരിക്കുകയാണ്.
ഉന്നത ഉദ്യോഗസ്ഥരുടെയും മറ്റ് വി.ഐ.പികളുടെയും വാഹനങ്ങള്‍ മാത്രമാണ് ഇവിടേക്ക് കടത്തിവിടുന്നത്. ഇത്തവണ ശബരിമലയില്‍ എത്തുന്ന മുഴുവന്‍ വാഹനങ്ങളും നിലക്കലില്‍ പാര്‍ക്ക് ചെയ്യേണ്ടിവരുന്ന സാഹചര്യത്തില്‍ ലക്ഷ്യമിടുന്ന പ്രവര്‍ത്തനങ്ങള്‍ പൂര്‍ണതോതില്‍ ആയാല്‍ പോലും സൗകര്യങ്ങള്‍ തീര്‍ത്തും അപര്യാപ്തമാകും. ജലദൗര്‍ലഭ്യമാണ് നിലക്കല്‍ നേരിടുന്ന വലിയ പ്രശ്‌നം. പൂര്‍ണമായും ടാങ്കറുകളിലാണ് നിലക്കലിലേക്ക് വെള്ളം എത്തിക്കുന്നത്. സീസണ്‍ മുഴുവനും ഇതുതന്നെയാകും അവസ്ഥ.
നിലക്കലിലെ മൂന്ന് കുളങ്ങളില്‍നിന്നും ഇപ്പോള്‍ വെള്ളം ലഭിക്കുന്നുണ്ടെങ്കിലും വേനല്‍ കടുക്കുമ്പോള്‍ കുളങ്ങള്‍ വറ്റുകയോ ലഭ്യത കുറയുകയോ ചെയ്യും. സീതത്തോട്ടില്‍നിന്നും പമ്പയില്‍നിന്നും എട്ട് വീതം ടാങ്കറുകളിലാണ് ഇപ്പോള്‍ വെള്ളം എത്തിക്കുന്നത്. അഞ്ചുലക്ഷം ലിറ്ററിന്റെ മൂന്ന് ടാങ്കുകളാണ് ഇവിടെയുള്ളത്. ഇതില്‍ ഒന്നിന്റെ നിര്‍മാണം ഇനിയും പൂര്‍ത്തിയായിട്ടില്ല. ഒന്നിന്റെ കമീഷനിങ് അടുത്ത ദിവസം നടക്കും. ഇതിനൊപ്പം ജലവിതരണത്തിനുള്ള പൈപ്പുകള്‍ സ്ഥാപിക്കാന്‍ കഴിയാത്തതാണ് ഇപ്പോള്‍ പ്രശ്‌നം. ഭൂരിഭാഗം ശൗചാലയങ്ങളിലും ഇനിയും വെള്ളമെത്തിയിട്ടില്ല. വാട്ടര്‍ കിയോസ്‌ക്കുകളും ഭാഗികമായേ പ്രവര്‍ത്തിക്കുന്നുള്ളൂ.