ശബരിമലയിലെ അറസ്റ്റില്‍ പ്രതിഷേധിച്ച് സംസ്ഥാന വ്യാപകമായി ബി.ജെ.പി, ആര്‍.എസ്.എസ് പ്രവര്‍ത്തകര്‍ പൊലീസ് സ്‌റ്റേഷനുകളിലേക്ക് പ്രതിഷേധ മാര്‍ച്ച് നടത്തി. ആറന്‍മുളയില്‍ ബി.ജെ.പി നേതാവ് ശോഭാ സുരേന്ദ്രന്റെ നേതൃത്വത്തിലായിരുന്നു പ്രതിഷേധം. നാമജപവുമായെത്തിയ പ്രതിഷേധക്കാര്‍ സ്‌റ്റേഷന് മുന്നില്‍ കുത്തിയിരുന്നു. പുലര്‍ച്ചെ ഒന്നരക്ക് ആരംഭിച്ച നാമജപ പ്രതിഷേധം മൂന്നര വരെ നീണ്ടു. തീവ്രവാദികളോടെന്ന പോലെയാണ് പൊലീസ് അയ്യപ്പഭക്തരോട് പെരുമാറുന്നതെന്ന് ശോഭാ സുരേന്ദ്രന്‍ പറഞ്ഞു.

ആറന്‍മുള പൊലീസ് സ്‌റ്റേഷനിലെ പ്രതിഷേധത്തിനു ശേഷം ദേവസ്വം ബോര്‍ഡ് പ്രസിഡന്റ് എ.പത്മകുമാറിന്റെ വീടും ഉപരോധിച്ചു. യുവമോര്‍ച്ച സംസ്ഥാനാധ്യക്ഷന്‍ പ്രകാശ് ബാബുവടക്കമുള്ള പ്രവര്‍ത്തകരും ഉപരോധത്തില്‍ പങ്കെടുത്തു. ആലപ്പുഴ മാന്നാറില്‍ പ്രകടനമായെത്തിയ പ്രതിഷേധക്കാര്‍ പൊലീസ് വാഹനത്തിന്റെ ചില്ല് തകര്‍ത്തു. കോട്ടയത്ത് പാല പള്ളിക്കത്തോട്, പൊന്‍കുന്നം എന്നിവിടങ്ങളില്‍ ബി.ജെ.പി പൊലീസ് സ്‌റ്റേഷനുകള്‍ ഉപരോധിച്ചു. വിവിധയിടങ്ങളില്‍ പ്രതിഷേധ മാര്‍ച്ചും നടത്തി. മലപ്പുറം ജില്ലയിലെ വിവിധ പൊലീസ് സ്‌റ്റേഷനുകളുടെ മുന്നില്‍ നാമജപ പ്രതിഷേധം നടക്കുന്നു.

മുഖ്യമന്ത്രി പങ്കെടുക്കുന്ന പരിപാടികളിലും പ്രതിഷേധിക്കുമെന്ന് ബി.ജെ.പി അറിയിച്ചു. നാമജപ പ്രതിഷേധം സംഘടിപ്പിക്കാനാണ് തീരുമാനം. കോഴിക്കോട് ഇന്ന് രണ്ട് പരിപാടികള്‍ മുഖ്യമന്ത്രിക്ക് ഉണ്ട്. അതിനു ശേഷം അദ്ദേഹം മലപ്പുറത്തേക്ക് പോകും. പ്രതിഷേധ സാധ്യത മുന്നില്‍ കണ്ട് ശക്തമായ സുരക്ഷയാണ് ഒരുക്കുന്നത്. പ്രതിഷേധ സൂചകമായി മുഖ്യമന്ത്രി പങ്കെടുക്കുന്ന കെ.യു.ഡബ്ല്യു.ജെയുടെ പരിപാടിയി നിന്ന് ആശംസാ പ്രസംഗകനായ വി. മുരളീധരന്‍ നേരത്തെ പിന്‍മാറിയിരുന്നു. താമരശ്ശേരിയില്‍ രണ്ട് കെ.എസ്.ആര്‍.ടി.സി ബസ്സുകളുടെ ചില്ല് എറിഞ്ഞു തകര്‍ത്തു. െ്രെഡവര്‍മാര്‍ക്ക് നിസ്സാര പരിക്കേറ്റു. പുലര്‍ച്ചെ ബി.ജെ.പി യുടെ നേതൃത്വത്തില്‍ താമരശ്ശേരി പൊലീസ് സ്‌റ്റേഷന് മുന്നില്‍ ധര്‍ണ്ണ നടത്തിയിരുന്നു. ഇതു കഴിഞ്ഞു പോവുന്നതിനിടെയാണ് ബസ്സുകള്‍ക്ക് നേരെ കല്ലെറിഞ്ഞത്. കൊല്ലം കൊട്ടാരക്കരയിലും ബസിനു നേരെ കല്ലേറുണ്ടായി.