നിയമസഭാ സ്പീക്കര്‍ പി. ശ്രീരാമകൃഷ്ണന്റെ ഏകാധിപത്യ നടപടികള്‍ അംഗീകരിക്കാനാവില്ലെന്ന് പ്രതിപക്ഷ നേതാവ് രമേശ് ചെന്നിത്തല. പ്രതിപക്ഷ ബഹളത്തെ തുടര്‍ന്ന് നിയമസഭ പിരിഞ്ഞതിനു പിന്നാലെ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

ശബരിമല വിഷയം ഉന്നയിച്ച് നിയമസഭയില്‍ മൂന്നാം ദിനവും വീണ്ടും പ്രതിപക്ഷ പ്രതിഷേധം. ശബരിമലയില്‍ അടിസ്ഥാന സൗകര്യമൊരുക്കണമെന്ന് ആവശ്യപ്പെട്ട് കൊണ്ട് ഇന്നും പ്രതിപക്ഷം അടിയന്തര പ്രമേയത്തിന് നോട്ടീസ് നല്‍കിയിരിക്കുകയാണ്. എന്നാല്‍ ഒരേ വിഷയം ചര്‍ച്ച ചെയ്യാനാകില്ലെന്ന് സ്പീക്കര്‍ പി. ശ്രീരാമകൃഷ്ണന്‍ അറിയിക്കുകയുണ്ടായി. പ്രതിപക്ഷം മര്യാദയുടേയും മാന്യതയുടേയും പരിധി ലംഘിക്കുന്നുവെന്ന് സ്പീക്കര്‍ കുറ്റപ്പെടുത്തിയിരുന്നു.

ചോദ്യോത്തര വേള ഒഴിവാക്കി വിഷയം ചര്‍ച്ച ചെയ്യണമെന്നായിരുന്നു പ്രതിപക്ഷത്തിന്റെ ആവശ്യം. എന്നാല്‍ ശബരിമല വിഷയത്തില്‍ വിശദമായ ചര്‍ച്ച നടന്നുവെന്നും സഭ തടസപ്പെടുത്തരുതെന്നും സ്പീക്കര്‍ ആവശ്യപ്പെടുകയായിരുന്നു.

എന്നാല്‍ സ്പീക്കര്‍ പ്രതിപക്ഷത്തിന്റെ അവകാശങ്ങള്‍ നിഷേധിക്കുകയാണെന്നാണ് രമേശ് ചെന്നിത്തല പറഞ്ഞു. സഭയില്‍ ഒരേ വിഷയം നിരവധി തവണ ചര്‍ച്ച ചെയ്തിട്ടുണ്ട്. സ്പീക്കര്‍ മുന്‍വിധിയോടെ കാര്യങ്ങള്‍ പറയുന്നു. പ്രതിപക്ഷം സഹകരിക്കാത്തതുകൊണ്ട് സഭ പിരിഞ്ഞുവെന്നാണ് സ്പീക്കര്‍ പറയുന്നത്. അത് ശരിയല്ല. മുഖ്യമന്ത്രിക്കപ്പുറം സ്പീക്കര്‍ക്ക് പ്രവര്‍ത്തിക്കാനാവുന്നില്ല. ഞങ്ങളുടെ ചോദ്യങ്ങള്‍ മുഖ്യമന്ത്രിക്ക് ഭയമാണ്. അവര്‍ക്ക് പലതും മറച്ചു പിടിക്കാനുണ്ട്. അതുകൊണ്ടാണ് ഞങ്ങള്‍ക്ക് അവസരം നല്‍കാത്തത്. പ്രതിപക്ഷത്തിന്റെ ജനാധപത്യ അവകാശത്തെ ചവിട്ടിമെതിക്കുന്ന ഒരു നടപടിയും അംഗീകരിക്കാനാവില്ല.
ആരുടെയും ഔദാര്യമല്ല ഞങ്ങള്‍ ചോദിക്കുന്നത്. ഭരണഘടനാ പരമായ നിയമസഭാ ചട്ടങ്ങള്‍ പ്രകാരമുള്ള അവകാശങ്ങളാണ് ഞങ്ങള്‍ ചോദിച്ചത്. അതിനുപോലും ഞങ്ങള്‍ക്ക് അവസരം നല്‍കുന്നില്ലെങ്കില്‍ പിന്നെന്താണ് മാര്‍ഗമെന്നും അദ്ദേഹം ചോദിക്കുന്നു. സ്പീക്കര്‍ പ്രതിപക്ഷത്തിന് നീതി നല്‍കണം. പ്രതിപക്ഷത്തോടുള്ള സമീപനത്തില്‍ അദ്ദേഹം മാറ്റം വരുത്തണമെന്നും ചെന്നിത്തല ആവശ്യപ്പെട്ടു.