ചരിത്രനിമിഷത്തിനായുള്ള കണ്ണൂരിന്റെ കാത്തിരിപ്പ് അവസാനിക്കാന് ഇനി ദിവസങ്ങള് മാത്രം...
ചരിത്രനിമിഷത്തിനായുള്ള കണ്ണൂരിന്റെ കാത്തിരിപ്പ് അവസാനിക്കാന് ഇനി ദിവസങ്ങള് മാത്രം. ഉദ്ഘാടനത്തിനൊരുങ്ങുന്ന കണ്ണൂര് വിമാനത്താവളത്തില് സമ്പൂര്ണ സജ്ജീകരണമാണ് ഒരുങ്ങിയിട്ടുള്ളതെന്ന് കണ്ണൂര് ഇന്റര്നാഷനല് എയര്പോര്ട്ട് ലിമിറ്റഡ് (കിയാല്) മാനേജിങ് ഡയറക്ടര് വി. തുളസീദാസ് വാര്ത്തസമ്മേളനത്തില് പറഞ്ഞു. ആഗമന നിര്ഗമന യാത്രക്കുള്ള എല്ലാ ഒരുക്കവും പൂര്ത്തിയായി. അന്താരാഷ്ട്രആഭ്യന്തരയാത്രക്കാര് ഒരുമിച്ച് കയറുന്നവിധത്തിലാണ് പാസഞ്ചര് ടെര്മിനല് ഒരുക്കിയിട്ടുള്ളത്. അന്താരാഷ്ട്ര യാത്രക്കാര്ക്ക് കസ്റ്റംസ് ഇമിഗ്രേഷന് സെക്യൂരിറ്റി ചെക്കിങ്ങിനായി സൗകര്യം സജ്ജമായി.
ആറു നിലകളുള്ള ടെര്മിനല് കെട്ടിടത്തില് ആദ്യനിലയില് കിയാല് ഓഫിസ് സമുച്ചയമാണ്. രണ്ടാം നിലയില് ആഗമന ബാഗേജ് മേഖലയില് എല്ലാം സുസജ്ജം. നാലാം നിലയിലെ പുറപ്പെടല് ഹാളില് ഇനി ചെക്കിങ് ക്യൂപോയന്റുകളേ ഒരുക്കാന് ബാക്കിയുള്ളൂ. അഞ്ചാം നിലയിലെ ബോര്ഡിങ് പാസ് നേടിയശേഷമുള്ള പാസഞ്ചര് ഹോള്ഡിങ് മേഖലയില് ചില്ലറജോലികള് ബാക്കിയുണ്ട്. ഒരേസമയം 2000 യാത്രക്കാരെ ഉള്ക്കൊള്ളാനാകുന്നതാണ് പാസഞ്ചര് ടെര്മിനല് സൗകര്യം.
ആഗമനയാത്രക്കാരെ സ്വീകരിക്കാനെത്തുന്നവര്ക്ക് കസ്റ്റംസ് പരിശോധനയുള്പ്പെടെ നേരിട്ട് കാണാനാകുന്നവിധം 200 പേര്ക്ക് ഉപയോഗിക്കാവുന്ന സന്ദര്ശനഗാലറിയും യാത്രയയക്കാന് എത്തുന്നവരുടെ കുടുംബങ്ങള്ക്ക് റണ്വേ കാണാവുന്ന വിധത്തിലുള്ള സന്ദര്ശന ഗാലറിയും ഒരുക്കിയിട്ടുണ്ട്. കസ്റ്റംസ് സംവിധാനം ഡിസംബര് ഒന്നിന് നിലവില്വരും. കണ്ണൂരിലേക്കുള്ള കസ്റ്റംസ് അസി. കമീഷണര്മാരെ നിയോഗിച്ചിട്ടുണ്ട്. വിമാനത്താവള പൊലീസ് സ്റ്റേഷനിലേക്കുള്ള സബ് ഇന്സ്പെക്ടറെ നിയമിച്ചുകഴിഞ്ഞു. സര്വിസുകള് കുറവായതിനാല്, തുടക്കത്തില് വിമാനത്താവളത്തിനുള്ളിലെ ഷോപ്പിങ് സൗകര്യം വൈകും. ഡ്യൂട്ടിഫ്രീ ഷോപ്പുകളും പിന്നീട് തുറക്കും. യാത്രക്കാര്ക്കുള്ള ബാഗേജ് റാപ്പിങ്, പ്രീപേഡ് ടാക്സി എന്നിവ തുടക്കത്തില്തന്നെ ഉണ്ടാകുമെന്നും കിയാല് എം.ഡി അറിയിച്ചു.
ഡിസംബര് ഒമ്പതിന് ഉദ്ഘാടനം ചെയ്യുന്ന കണ്ണൂര് അന്താരാഷ്ട്ര വിമാനത്താവളത്തില്നിന്ന് ജനുവരിയോടെ ദിവസവും 13 വിമാനങ്ങളെങ്കിലും സര്വിസ് നടത്തുന്നവിധത്തില് വിമാന കമ്പനികള് ഷെഡ്യൂള് നല്കിയതായി കണ്ണൂര് ഇന്റര്നാഷനല് എയര്പോര്ട്ട് ലിമിറ്റഡ് (കിയാല്) മാനേജിങ് ഡയറക്ടര് വി. തുളസീദാസ് വാര്ത്തസമ്മേളനത്തില് അറിയിച്ചു.
എയര് ഇന്ത്യ എക്സ്പ്രസിന് പുറമേ ഗോ എയര് അഞ്ച് ഗള്ഫ് രാജ്യങ്ങളിലേക്കുള്ള സര്വിസിന് കേന്ദ്ര വ്യോമയാനമന്ത്രാലയത്തിന് ഷെഡ്യൂള് അയച്ചുകഴിഞ്ഞു. ദോഹ, മസ്കത്ത്, ദമ്മാം, കുവൈത്ത് എന്നിവിടങ്ങളിലേക്കാണ് ഗോ എയര് സര്വിസ് ഉദ്ദേശിക്കുന്നത്. ഇതിന് പുറമേ ബംഗളൂരു, ചെന്നൈ, ഹൈദരാബാദ്, മുംബൈ എന്നിവിടങ്ങളിലേക്കുള്ള ആഭ്യന്തര സര്വിസിനും അപേക്ഷിച്ചിട്ടുണ്ട്.
"
https://www.facebook.com/Malayalivartha
