ശബരിമല സന്നിധാനത്ത് ആര്‍.എസ്.സിന്റെ നേതൃത്വത്തില്‍ ബി.ജെ.പി ഉള്‍പ്പെടെ നടത്തിയ സമരം സി.പി.എം ഒത്തുതീര്‍പ്പാക്കിയതായി കോണ്‍ഗ്രസ്. ആര്‍.എസ്.എസ് അനുകൂല സംഘടനായ അയ്യപ്പസേവാ സമാജത്തിന് പമ്പയിലും നിലയ്ക്കലിലും അന്നദാനം നടത്താന്‍ ദേവസ്വം ബോര്‍ഡ് അനുമതി നല്‍കിയത് ഇത് ശരിവയ്ക്കുകയാണെന്നും കോണ്‍ഗ്രസ് ആരോപിക്കുന്നു.

എന്നാല്‍ ദേവസ്വം ബോര്‍ഡിന്റെ നിയന്ത്രണത്തിലും ഉത്തരവാദിത്തത്തിലുമാണ് ശബരിമലയുമായി ബന്ധപ്പെട്ട എല്ലാ അന്നദാനങ്ങളും നടക്കുന്നതെന്ന് ബോര്‍ഡ് പ്രസിഡന്റ് എ.പത്മകുമാര്‍ പ്രതികരിച്ചു. അന്നദാനം സംഭാവന സ്വീകരിച്ചാണ് നടത്തുന്നത്. നിയമപരമായും ഹൈക്കോടതി ഉത്തരവിന്റെ അടിസ്ഥാനത്തിലുമാണ് അന്നദാനം നടത്തുന്നതെന്നും അദ്ദേഹം പറഞ്ഞു.

സാമ്പത്തിക പ്രശ്‌നങ്ങള്‍ ഉള്ളത് കൊണ്ടാണ് അയ്യപ്പസേവാ സമാജം ഉള്‍പ്പെടെയുള്ള സംഘടനകളുടെ സഹായം ബോര്‍ഡ് സ്വീകരിച്ചിട്ടുള്ളത്. നാളെ മുതല്‍ അന്നദാനം തുടങ്ങുമെന്ന് ബോര്‍ഡ് രേഖാമൂലം അനുമതി നല്‍കിയെന്നും അയ്യപ്പ സേവാ സമാജം നേതാവ് അയ്യപ്പദാസ് അറിയിച്ചു. ആര്‍.എസ്.എസുമായി സി.പി.എം ഉണ്ടാക്കിയ ഒത്തുതീര്‍പ്പിന്റെ ഫലമായാണ് ബി.ജെ.പി സമരം സെക്രട്ടറിയേറ്റിന് മുന്നിലേക്ക് മാറ്റിയതെന്ന് കോണ്‍ഗ്രസ് ആക്ഷേപിക്കുന്നു. ഹൈക്കോടതി നിര്‍ദ്ദേശ പ്രകാരം മൂന്ന് വര്‍ഷത്തിലധികമായി ദേവസ്വം ബോര്‍ഡ് നടത്തിവന്ന അന്നദാനം മതിയായ ഫണ്ടില്ലെന്ന് ചൂണ്ടിക്കാട്ടിയാണ് അയ്യപ്പസേവാ സമാജത്തിന് നല്‍കിയത്. എന്നാല്‍ ഹൈക്കോടതിയുടെ നിര്‍ദ്ദേശം മറികടന്നാണ് അയ്യപ്പസേവാ സമാജത്തിന് കരാര്‍ നല്‍കിയതെന്ന് കോണ്‍ഗ്രസ് ആരോപിക്കുന്നു. 

മുമ്പ് അന്നദാനം നടത്തിയിരുന്നത് വിവിധ സംഘടനകളാണ്്. പണപ്പിരിവും അതില്‍ ക്രമക്കേടും നടക്കുന്നെന്ന് ഈ സംഘടകള്‍ക്കെതിരെ ആരോപണങ്ങള്‍ ഉയര്‍ന്നതോടെയാണ് മൂന്ന് വര്‍ഷം മുമ്പ് ഹൈക്കോടതി ഇടപെട്ടത്. അന്നദാനം ദേവസ്വം ബോര്‍ഡ് നടത്തണമെന്നാണ് അന്ന് കോടതി പറഞ്ഞത്. തുടര്‍ന്ന് ദേവസ്വം ബോര്‍ഡ് സൗകര്യങ്ങള്‍ ഒരുക്കുകയായിരുന്നു. നടവരവ് ഇക്കുറി കുറഞ്ഞതിനാല്‍ അന്നദാനവുമായി മുന്നോട്ട് പോകാനാവില്ലെന്നാണ് ദേവസ്വം ബോര്‍ഡ് നിലപാട്. അന്നദാനം നടത്താമെന്ന് വാഗ്ദ്ധാനം ചെയ്ത് രംഗത്ത് വന്നത് അയ്യപ്പസേവാ സമാജം മാത്രമാണെന്നും അതുകൊണ്ടാണ് കരാര്‍ നല്‍കിയതെന്നുമാണ് ദേവസ്വം ബോര്‍ഡ് വൃത്തങ്ങള്‍ വിശദീകരിക്കുന്നു.

ഹിന്ദു ഐക്യവേദി മുന്‍ അധ്യക്ഷനും മുന്‍ ബി.ജെ.പി അദ്ധ്യക്ഷനായിരുന്ന കുമ്മനം രാജശേഖരനാണ് അയ്യപ്പസേവാ സമാജം ആരംഭിച്ചത്. കോടതിയുടെ അനുമതിയില്ലാതെ അന്നദാന കരാര്‍ നല്‍കുന്നത് ശരിയല്ലെന്ന് കോണ്‍ഗ്രസ് നേതൃത്വം ആരോപിച്ചു. വരുന്ന ദിവസങ്ങളില്‍ ശുഭവാര്‍ത്തയുണ്ടാകുമെന്ന ദേവസ്വം ബോര്‍ഡ് പ്രസിഡന്റ് എ.പദ്മകുമാറിന്റെ പ്രസ്താവന ഇതിനോടൊപ്പം കൂട്ടിവായിക്കണം. ചിത്തിര ആട്ടത്തിന് സന്നിധാനത്ത് സ്ത്രീയെ മര്‍ദ്ദിച്ചത് അടക്കമുള്ള സംഘര്‍ഷം നടത്തിയ ആര്‍.എസ്.എസ് നേതാവ് വത്സന്‍ തില്ലങ്കേരിയെ മുഖ്യമന്ത്രി പിന്തുണച്ചതും സമരം സെക്രട്ടറിയേറ്റിന് മുന്നിലേക്ക് മാറ്റിയതും ഒത്തുതീര്‍പ്പിന്റെ ഭാഗമാണെന്നും കോണ്‍ഗ്രസ് നേതാക്കള്‍ ആരോപിച്ചു.