ശബരിമല സമരത്തിലൂടെ രാഷ്ട്രീയ നേട്ടം കൈവരിക്കാന്‍ ഇറങ്ങിത്തിരിച്ച കോണ്‍ഗ്രസിനും ബി.ജെ.പിക്കും കനത്തതിരിച്ചടിയായി തദ്ദേശ ഉപതെരഞ്ഞെടുപ്പ് ഫലം. സംസ്ഥാനത്തെ വിവിധ തദ്ദേശസ്ഥാപനങ്ങളിലെ വാര്‍ഡുകളില്‍ നടന്ന ഉപതെരഞ്ഞെടുപ്പുകളില്‍ എല്‍.ഡി.എഫിന് മികച്ച വിജയം. 39 ല്‍ 27 സീറ്റും ഇടത് മുന്നണി വിജയിച്ചു.

മാത്രമല്ല യു.ഡി.എഫിന്റെയും ബി.ജെ.പിയുടെയും ഏഴ് സീറ്റുകള്‍ പിടിച്ചെടുക്കുകയും ചെയ്തു. ജനവികാരം ഏറ്റവും കൂടുതല്‍ പ്രകടിപ്പിക്കുന്നത് തദ്ദേശതെരഞ്ഞെടുപ്പിലാണ്. അവിടെ മികച്ചവിജയം കൈവരിക്കാനായത് സര്‍ക്കാരിന്റെയും സി.പി.എമ്മിന്റെയും നേ്ട്ടവും മുഖ്യമന്ത്രി പിണറായി വിജയന്റെ ഉറച്ച നിലപാടുകളുമാണ്. എല്‍.എഡി.എഫ് അധികാരത്തില്‍ വന്ന ശേഷം നടന്ന 12 ഉപതെരഞ്ഞെടുപ്പുകളിലും ഭരണമുന്നണി നേട്ടം കൈവരിച്ചു. 

മലപ്പുറം അമരമ്പലം പഞ്ചായത്തില്‍ യു.ഡി.എഫില്‍ നിന്നും എല്‍.ഡി.എഫ് പിടിച്ചെടുത്തു. സി.പി.എമ്മിലെ അനിത രാജു 146 വോട്ടുകളുടെ ഭൂരിപക്ഷത്തിലാണ് ഇവിടെ വിജയിച്ചു. പത്തനംതിട്ടയില്‍ യു.ഡി.എഫ് വിമതന് ജയം. തൃശൂര്‍ വള്ളത്തോള്‍ നഗര്‍ പഞ്ചായത് ഉപതെരെഞ്ഞെടുപ്പില്‍ 343 വോട്ടുകള്‍ക്ക് എല്‍ഡി.എഫ് വിജയിച്ചു. അമ്പലപ്പുഴ തെക്ക് പഞ്ചായത്ത് ആറാം വാര്‍ഡ് എല്‍.ഡി.എഫ് സ്ഥാനാര്‍ഥി ജിത്തു കൃഷ്ണന്‍ 156 വോട്ടിന് വിജയിച്ചു. ഇരിങ്ങാലക്കുട മുനിസിപ്പാലിറ്റി എല്‍.ഡി.എഫ് വിജയിച്ചു. പറപ്പൂക്കര പള്ളം വാര്‍ഡ് ബി.ജെ.പിയില്‍ നിന്ന് എല്‍.ഡി.എഫ് തിരിച്ചുപിടിച്ചു. 

തൃശൂര്‍ കടവല്ലൂര്‍ ഉപതിരഞ്ഞെടുപ്പ് എല്‍ഡി.എഫ് 158 വോട്ടിന് ജയിച്ചു. അമരമ്പലം പഞ്ചായത്ത് ഉപതെരഞ്ഞെടുപ്പില്‍ യുഡിഎഫ് സിറ്റിങ് സീറ്റില്‍ എല്‍ഡിഎഫ് സ്ഥാനാര്‍ഥി വിജയിച്ചു. തൃശൂര്‍ ചേലക്കര 126 വോട്ടിനു എല്‍.ഡി.എഫ് ജയിച്ചു . കാസറഗോഡ് ബേഡകത്ത് 543 വോട്ട് ലീഡില്‍ എല്‍.ഡി.എഫ് വിജയിച്ചു. വട്ടംകുളം ഗ്രാമപഞ്ചായത്ത് ഉപതെരഞ്ഞെടുപ്പില്‍ 61 വോട്ടിന്റെ ഭൂരിപക്ഷത്തില്‍ എല്‍.ഡി.എഫ് സ്ഥാനാര്‍ഥി കെ.വി കുമാരന്‍ വിജയിച്ചു. കയ്യൂര്‍ ചീമേനി പഞ്ചായത്തിലെ ചെറിയാക്കര വാര്‍ഡില്‍ എല്‍.ഡി.എഫ് സ്ഥാനാര്‍ത്ഥി പി.ഇന്ദിര 306 വോട്ടിന്റെ ഭൂരിപക്ഷത്തില്‍ വിജയിച്ചു.

പേരാമ്പ്ര ബ്ലോക്ക് ഉപതിരഞ്ഞെടുപ്പ് എല്‍.ഡി.എഫിന് വന്‍ വിജയം. ഭൂരിപക്ഷം അഞ്ചിരട്ടിയായി. പേരാമ്പ്ര ബ്ലോക്ക് പഞ്ചായത്ത് പാലേരി ഡിവിഷനില്‍ നടന്ന ഉപതിരഞ്ഞെടുപ്പില്‍ എല്‍.ഡി.എഫ് സ്ഥാനാര്‍ത്ഥി എന്‍.സി.പിയിലെ കിഴക്കയില്‍ ബാലന്‍ 1212 വോട്ടിന്റെ ഭൂരിപക്ഷത്തിന് വിജയിച്ചു. എന്‍.സി.പി സംസ്ഥാന കമ്മിറ്റിയംഗവും ബ്ലോക്ക് പഞ്ചായത്ത് വൈസ് പ്രസിഡന്റുമായിരുന്ന പി.പി കൃഷ്ണാനന്ദന്റെ മരണത്തെ തുടര്‍ന്നാണ് ഉപതിരഞ്ഞെടുപ്പ് നടന്നത്. പി.പി കൃഷ്ണനാന്ദന്‍ 229 വോട്ടിന്റെ ഭൂരിപക്ഷത്തിന് വിജയിച്ച വാര്‍ഡിലാണ് നിലവിലെ രാഷ്ട്രീയ സാഹചര്യങ്ങളില്‍ കഴിഞ്ഞ തവണത്തേക്കാള്‍ ഭൂരിപക്ഷം അഞ്ചിരട്ടി വര്‍ദ്ധിപ്പിച്ച് കിഴക്കയില്‍ ബാലന്‍ 1212 വോട്ടിന്റെ ഭൂരിപക്ഷത്തിന് മുസ്ലിംലീഗ് സ്ഥാനാര്‍ത്ഥിയെ പരാജയപ്പെടുത്തിയത്.

അതിനിടെ ചെങ്കോട്ടയില്‍ കോണ്‍ഗ്രസിന് അട്ടിമറി വിജയം. കഴിഞ്ഞ ത്രിതല പഞ്ചായത്ത് തെരഞ്ഞെടുപ്പില്‍ വിളക്കുടി പഞ്ചായത്തിലെ ഒന്നാം വാര്‍ഡില്‍ യുഡിഎഫ് സ്ഥാനാര്‍ത്ഥി മൂന്നാം സ്ഥാനത്തേക്ക് പിന്തള്ളപ്പെട്ട ചെങ്കോട്ടയിലാണ് 146 വോട്ടിന്റെ മിന്നുന്ന വിജയം യു.ഡി.എഫിലെ ലീനാ റാണി സ്വന്തമാക്കിയത്. 23 വര്‍ഷത്തിന് ശേഷമാണ് ഒന്നാം വാര്‍ഡില്‍ എല്‍ഡിഎഫിനെ പരാജയപ്പെടുത്തി യുഡിഎഫ് സ്ഥാനാര്‍ത്ഥി വിജയിക്കുന്നത്. തെക്ക് പഞ്ചായത്ത് 10 വാര്‍ഡ് എസ്.ഡി.പി.ഐ സ്ഥാനാര്‍ഥി സീനത്തിനെ 132 വോട്ടിന്റെ ഭൂരിപക്ഷത്തില്‍ വിജയിച്ചു.

തൃശൂരില്‍ തെരഞ്ഞെടുപ്പ് നടന്ന അഞ്ച് സീറ്റിലും എല്‍.ഡി.എഫ് വിജയിച്ചു.. ഒരു സീറ്റ് ബി.ജെ.പിയില്‍ നിന്ന് എല്‍.ഡി.എഫ് പിടിച്ചെടുത്തു. തിരുവനന്തപുരം അതിയന്നൂര്‍ പഞ്ചായത്തില്‍ നെല്ലിമൂട് എല്‍.ഡി.എഫ് പിടിച്ചെടുത്തു. യു.ഡി.എഫില്‍ നിന്നാണ് സീറ്റ് എല്‍.ഡി.എഫ് പിടിച്ചെടുത്തത്. ഇവിടെ യു.ഡി.എഫ് കഴിഞ്ഞ തവണ 250 ലേറെ വോട്ടിന്റെ ഭൂരിപക്ഷത്തിലാണ് ജയിച്ചത്. തിരുവനന്തപുരം നഗരസഭ കിണവൂര്‍ വാര്‍ഡ് യു.ഡി.എഫ് നിലനിര്‍ത്തി.