പന്തളം രാജകൊട്ടാര പ്രതിനിധി ശശികുമാര്‍ വര്‍മ്മക്കെതിരെ മന്ത്രി ജി.സുധാകരന്‍ ”ശശികുമാറിന് മോഷണ സ്വഭാവമുണ്ട്, കള്ളനാണ്. അതുകൊണ്ടാണ് തിരുവാഭരണം തിരികെ കിട്ടുമോ എന്നറിയില്ല. അയ്യപ്പനെ കൊല്ലാന്‍ കാട്ടിലയച്ചവരാണ് ഈ രാജ കുടുംബം. ശശി ഇപ്പോള്‍ രാജാവാന്നെന്ന് പറഞ്ഞ് നടക്കുകയാണ്. പഴയ എസ്എഫ്‌ഐ നേതാവായിരുന്നു. അന്ന് ഇറച്ചിയും മീനുമെല്ലാം തട്ടി വിട്ടിട്ടുണ്ട്.”-മന്ത്രി ജി.സുധാകരന്‍ പറഞ്ഞു.

”ശബരിമലയില്‍ പോകുന്ന സ്ത്രീകളുടെ ഭൂതവും വര്‍ത്തമാനവുമൊന്നും പരിശോധിക്കണ്ട കാര്യമില്ല. ഭക്തയാണങ്കില്‍ പോകാം. ഇതെല്ലാം ചികയുന്നവരുടെ ഭൂതകാലം അന്വേഷിച്ചാല്‍ അത് വളരെ മോശമായിരിക്കും.” ”സ്ത്രീകള്‍ ശബരിമലയിലെത്തിയാല്‍ അയ്യപ്പന് ഒരു പ്രശ്‌നവുമില്ല. സ്ത്രീകളെ ശബരിമലയില്‍ കണ്ടാല്‍ പ്രശ്‌നമുള്ളവര്‍ അങ്ങോട്ട് പോകേണ്ട.” തന്ത്രി അയ്യപ്പനെ കാത്ത് സൂക്ഷിക്കേണ്ടവനാണ്. പക്ഷെ, ഈ തന്ത്രി ഭക്തനല്ല, ഭൗതികവാദിയാണ്. അതുകൊണ്ടാണ് നടയടച്ച് പോകുമെന്ന് പറഞ്ഞത്. പുണ്യാഹം തളിച്ചത് ഭരണഘടനാവിരുദ്ധം.”-മന്ത്രി ജി.സുധാകരന്‍ പറഞ്ഞു.

അതേ സമയം നിരന്തരമായി ഭീഷണി ലഭിച്ചതിനെ തുടര്‍ന്നാണ് തിരുവാഭരണഘോഷയാത്രയ്ക്ക് പോലീസ് സംരക്ഷണം ആവശ്യപ്പെട്ട് ഹൈക്കോടതിയെ സമീപിച്ചതെന്ന് പന്തളം കൊട്ടാരം പ്രതിനിധി ശശികുമാര വര്‍മ. തിരുവാഭരണം കൊണ്ടുപോയതു പോലെ തിരികെയെത്തില്ലെന്ന് കത്തുകള്‍ ലഭിച്ചതായും ശശികുമാര വര്‍മ മാധ്യമങ്ങളോട് പറഞ്ഞു.

തിരുവാഭരണങ്ങളുടെ സുരക്ഷയെ സംബന്ധിച്ച് തുടക്കം മുതല്‍ തന്നെ ആശങ്കയുണ്ടായിരുന്നുവെന്നും പോലീസ് ഉദ്യോഗസ്ഥരുമായി നടത്തിയ ചര്‍ച്ചയുടെ അടിസ്ഥാനത്തില്‍ വേണ്ട സുരക്ഷ നല്‍കാമെന്ന് അവര്‍ ഉറപ്പ് നല്‍കിയതായും ശശി കുമാരവര്‍മ പറഞ്ഞു. എങ്കിലും കൂടുതല്‍ സുരക്ഷ ഉറപ്പു വരുത്തുന്നതിന് വേണ്ടിയാണ് കോടതിയെ സമീപിച്ചതെന്നും അദ്ദേഹം കൂട്ടിച്ചേര്‍ത്തു.

കോടതിയുടെ ഭാഗത്ത് നിന്ന് സമയോചിതമായ നടപടിയുണ്ടായത് ആശ്വാസകരമാണെന്നും പോലീസ് അത് കൃത്യമായി പാലിക്കുകയാണെങ്കില്‍ ഇക്കൊല്ലവും മകരവിളക്കുത്സവം ഭംഗിയായി നടത്താമെന്നും ശശികുമാരവര്‍മ പറഞ്ഞു. തിരുവാഭരണഘോഷയാത്രക്കിടെ തിരുവാഭരണം തട്ടിയെടുക്കാനുള്ള സാധ്യതയുണ്ടെന്ന് കാണിച്ച് ജനുവരി ഏഴിനാണ് പന്തളം കൊട്ടാരം ഹൈക്കോടതിയെ സമീപിച്ചത്. അതേ സമയം തിരുവാഭരണത്തിന് മതിയായ സുരക്ഷ നല്‍കുന്നുണ്ടെന്നും ആവശ്യമെങ്കില്‍ സുരക്ഷ കൂടുതല്‍ ശക്തമാക്കുമെന്നും പത്തനംതിട്ട ജില്ലാകളക്ടര്‍ പി ബി നൂഹ് അറിയിച്ചിരുന്നു.

പന്തളം കൊട്ടാരത്തില്‍ നിന്ന് കൊണ്ടുവരുന്ന തിരുവാഭരണം തിരിച്ചികിട്ടുമോ എന്ന ആശങ്കയെത്തുടര്‍ന്ന് ദേവസ്വം ബോര്‍ഡില്‍ നിന്നും കഴിഞ്ഞ ദിവസം കൊട്ടാരം ഉറപ്പ് വാങ്ങിയിരുന്നു.തിരുവാഭരണം അതേപോലെ തിരിച്ച് ഏല്‍പ്പിക്കുമെന്ന് ദേവസ്വം കമ്മിഷണര്‍ ഉറപ്പ് നല്‍കുകയും ചെയ്തിരുന്നു. ദേവസ്വ പ്രസിഡണ്ടും ഇക്കാര്യത്തില്‍ ഉറപ്പ് നല്‍കിയിരുന്നു. തിരുവാഭരണ ഘോഷ യാത്ര പൂര്‍ണ സായുധ പൊലീസ് സുരക്ഷയില്‍ ആയിരിക്കുമെന്ന് സര്‍ക്കാര്‍ ഹൈക്കോടതിയെ കഴിഞ്ഞ ദിവസം അറിയിച്ചിരുന്നു.

പന്തളം കൊട്ടാരത്തിന് വേണ്ടി കൊട്ടാരം മാനേജ്‌മെന്റ് കമ്മിറ്റി ഹൈക്കോടതിയില്‍ നല്‍കിയ ഹരജി പരിഗണിക്കുന്നതിനിടെയായിരുന്നു സര്‍ക്കാര്‍ നിലപാട് വ്യക്തമാക്കിയത്. സര്‍ക്കാരിനോട് വിഷയത്തില്‍ റിപ്പോര്‍ട്ട് നല്‍കാന്‍ കോടതി ആവശ്യപ്പെട്ടിരുന്നു. തിരുവാഭരണ യാത്രയെ അനുഗമിക്കുന്ന കൊട്ടാരം പ്രതിനിധിക്കും സുരക്ഷ ഏര്‍പ്പെടുത്തുമെന്നും സര്‍ക്കാര്‍ പറഞ്ഞു.

നേരത്തെ നാമജപ ഘോഷയാത്രയില്‍ പങ്കെടുത്തവരെ ഉള്‍പ്പടെ ഘോഷയാത്രയില്‍ പങ്കെടുപ്പിക്കില്ലെന്ന വിവാദ ഉത്തരവ് പത്തനംതിട്ട എസ്പി പുറപ്പെടുവിച്ചിരുന്നു. കേസുള്ളവരെ ഒഴിവാക്കണമെന്ന പോലിസ് നിര്‍ദ്ദേശം പാലിക്കാനാവില്ലെന്നും, അങ്ങനെ എങ്കില്‍ ഘോഷയാത്ര നടക്കില്ലെന്നും പന്തളം കൊട്ടാരം ഉറച്ച് നിലപാട് എടുത്തു. അതോടെ പോലിസ് വഴങ്ങുകയായിരുന്നു.