സോഷ്യല്‍ മീഡിയയില്‍ അടുത്തിടെ ചര്‍ച്ചാവിഷയമായ സംഭവമായിരുന്നു നടി മഞ്ജു വാരിയരെ ആരാധിക കടന്നുപിടിച്ച് ചുംബിച്ചത്. പാലക്കാട് ഒരു ജ്വല്ലറി ഉദ്ഘാടനത്തിനെത്തിയപ്പോഴായിരുന്നു സംഭവം. ഇതിന്റെ ദൃശ്യങ്ങള്‍ വൈറലായതോടെ വലിയ രീതിയിലുള്ള സൈബര്‍ ആക്രമണമാണ് യുവതി നേരിട്ടത്. എന്നാല്‍ ക്ഷമാപണം നടത്തിയ ആരാധികയായ യുവതിക്ക് മറുപടി നല്‍കി മഞ്ജു വാര്യര്‍.

സെലിബ്രിറ്റികളുടെ സ്വകാര്യതയിലേക്കുള്ള കടന്നുകയറ്റമാണിതെന്നും സുരക്ഷാ വീഴ്ചയാണ് സംഭവിച്ചതെന്നും പലരും ചൂണ്ടിക്കാട്ടി. സ്‌നേഹമാണെങ്കിലും ഇത്തരം പ്രവൃത്തികള്‍ പ്രോത്സാഹിപ്പിക്കാന്‍ കഴിയില്ലെന്നാണ് ഭൂരിഭാഗം ആളുകളുടെയും പക്ഷം. ഇപ്പോഴിതാ സംഭവത്തില്‍ വിശദീകരണവുമായി രംഗത്തെത്തിയിരിക്കുകയാണ് യുവതി. അന്നത്തെ വൈറല്‍ വീഡിയോ പങ്കുവച്ചുകൊണ്ടായിരുന്നു യുവതിയുടെ വിശദീകരണം.

'കുട്ടികാലം മുതല്‍ ഒരുപാട് ഒരുപാട് ഇഷ്ടമുള്ള ചേച്ചിയാണ് അപ്പൊ മുതല്‍ മനസില്‍ ഉള്ളതാണ് ഒന്ന് നേരില്‍കാണാന്‍. ആ ഇഷ്ടവും വളരുന്നതിന് അനുസരിച്ച് ഒരുപാട് വലുത് ആയിരിന്നു. എന്റെ ഫ്രണ്ട്‌സ്, റിലേറ്റീവ്‌സ്, കൂടെ വര്‍ക്ക് ചെയ്യുന്നവര്‍ അവരോടൊക്കെ പറയും ഞാന്‍ മഞ്ജു ചേച്ചിയെ നേരിട്ട് കാണും, കണ്ടാല്‍ കെട്ടിപ്പിടിച്ചു ഉമ്മ കൊടുക്കണം എന്നൊക്കെ. അന്ന് നടക്കില്ല എന്ന് അറിയാം. എന്നാലും അത്രമേല്‍ ഇഷ്ടം ഉള്ളത് കൊണ്ട് പറയുന്നതാണ് പക്ഷെ അത് ലൈഫില്‍ സത്യം ആയപ്പോള്‍ ഞാന്‍ പോലും അറിയാതെ എന്റെ മനസിലെ ആഗ്രഹം അത് കണ്ണുനീരായി, ഞാന്‍ മനസില്‍ ആഗ്രഹിച്ചത് എന്റെ മുന്നില്‍ വന്നപ്പോള്‍ അറിയാതെ സംഭവിച്ചു പോയതാണ്. ലവ്യു മഞ്ജുച്ചേച്ചി' യുവതി കുറിച്ചു.

യുവതിയുടെ തുറന്നുപറച്ചിലിന് ശേഷം മഞ്ജു വാരിയര്‍ പ്രതികരണവുമായെത്തി. 'ഒരുപാട് സ്‌നേഹം, നന്ദി' എന്നായിരുന്നു താരത്തിന്റെ മറുപടി. പാലക്കാട് ജ്വല്ലറി ഉദ്ഘാടനത്തിന് ശേഷം ആരാധകരുമായി സംവദിക്കാന്‍ മഞ്ജു വാര്യര്‍ സ്‌റ്റേജില്‍ നില്‍ക്കുമ്പോഴായിരുന്നു നാടകീയ സംഭവങ്ങള്‍. തിരക്കിനിടയില്‍ നിന്നും ഓടിക്കയറി വന്ന യുവതി മഞ്ജുവിനെ കടന്നുപിടിച്ച് ചുംബിക്കുകയായിരുന്നു. ഇത് ശരിയായ പെരുമാറ്റമല്ലെന്ന് അവതാരക മൈക്കിലൂടെ വിളിച്ച് പറയുന്നുണ്ടായിരുന്നെങ്കിലും, മഞ്ജു വാരിയര്‍ അതീവ സംയമനത്തോടെയാണ് പെരുമാറിയത്. ആ സ്ത്രീയെ കൈപിടിച്ച് ആശ്വസിപ്പിക്കുകയും പിന്നീട് അവര്‍ക്കൊപ്പം സെല്‍ഫി എടുക്കുകയും ചെയ്ത ശേഷമാണ് താരം മടങ്ങിയത്.