നടി മീനയുടെ ചെന്നൈയിലെ കുടുംബവീടുമായി ബന്ധപ്പെട്ടൊരു വാര്‍ത്തയാണ് സമൂഹ മാധ്യമ ലോകത്ത് ചര്‍ച്ച. ഏകദേശം പത്ത് കോടി ചെലവഴിച്ച് പൂര്‍ത്തിയാക്കിയ വീടും സ്ഥലവും 100 കോടി രൂപയ്ക്ക് വിറ്റുപോയെന്നാണ് വാര്‍ത്ത. അമേരിക്കയിലുള്ള വിദേശ ദമ്പതികളാണ് വീട് കണ്ട് ഇഷ്ടപ്പെട്ട് ഇത്ര വലിയ തുക മുടക്കി സ്വന്തമാക്കിയതെന്നും കേള്‍ക്കുന്നു.

എക്‌സ് പ്ലാറ്റ്‌ഫോമുകളിലും ചില തമിഴ് മാധ്യമങ്ങളിലും ഇതു സംബന്ധിച്ച് വാര്‍ത്ത പ്രചരിക്കുന്നുണ്ട്. എന്നാല്‍ മീന എവിടെയും സ്ഥിരീകരണം നല്‍കിയിട്ടില്ല. നടിയുടെ സോഷ്യല്‍ മീഡിയ പേജിലും ഇതേക്കുറിച്ച് ഒരു ചെറിയ സൂചന പോലുമില്ല. മീന, ഭര്‍ത്താവ് സാഗര്‍, മകള്‍ നൈനിക എന്നിവര്‍ ഒന്നിച്ചു താമസിച്ച വീടാണിത്.

വലിയ ഗേറ്റുകളുളള കോമ്പൗണ്ടിനുള്ളില്‍ സുരക്ഷിതമായി സ്ഥിതി െചയ്യുന്ന വീടാണിത്. ചെന്നൈ നഗരത്തിലെ മീനയുടെ വീട് കേരള ശൈലിയിലാണ് നിര്‍മിച്ചിട്ടുള്ളത്. ഇവിടുത്തെ കാലാവസ്ഥയും മറ്റും കണക്കാക്കിയാല്‍ തന്നെ വീടിന്റെ ഉള്ളില്‍ നല്ല നിലയില്‍ കാറ്റും വെളിച്ചവും കടക്കുന്ന രീതിയിലെ നിര്‍മിതിയാണ്. മീനയുടെ അമ്മ രാജമല്ലിക കണ്ണൂര്‍ സ്വദേശിനിയാണ്. ഈ വീട് നിര്‍മിക്കുമ്പോള്‍ വേണ്ട നിര്‍ദേശങ്ങള്‍ അമ്മ തന്നിരുന്നതായി നടി പറഞ്ഞിരുന്നു.

20 വര്‍ഷം മുന്‍പ് ബാങ്ക് വായ്പ്പ എടുത്താണ് മീന വീട് പൂര്‍ത്തിയാക്കുന്നത്. 10 കോടിക്കടുത്ത് രൂപ വായ്പയായി തന്നെ എടുത്തിരുന്നു. തടിയില്‍ കൊത്തിയെടുത്ത തൂണുകള്‍, വിശാലമായ അങ്കണം, കൊട്ടാരത്തിനു സമാനമായ ഡിസൈന്‍, തഞ്ചാവൂര്‍ ശില്‍പ്പങ്ങള്‍ എന്നിവയാണ് വീടിന്റെ പ്രധാന സവിശേഷത.

അതേസമയം 'ദൃശ്യം 3' ആണ് മീനയുടേതായി ഉടന്‍ റിലീസിനൊരുങ്ങുന്ന ചിത്രം. ജീത്തു ജോസഫ് അവതരിപ്പിക്കുന്ന 'റോസ്‌ലിന്‍' എന്നൊരു വെബ് സീരിസിലും അടുത്തിടെ മീന അഭിനയിച്ചിരുന്നു. ജിയോ ഹോട്ട്സ്റ്റാറിലൂടെയാണ് വെബ് സീരിസ് റിലീസ് ചെയ്തത്.