സാമൂഹികനീതി- വനിത ശിശുക്ഷേമ വകുപ്പുകള് പരിഷ്കരിക്കുവാന് തീരുമാനം
വകുപ്പുകളുടെ കാര്യക്ഷമതാവര്ധനക്കൊപ്പം സേവനങ്ങളുടെ വേഗവും ലക്ഷ്യമിട്ട് സാമൂഹികനീതി വകുപ്പും (എസ്.ജെ.ഡി) അതില്നിന്ന് വിഭജിച്ച വനിത ശിശുക്ഷേമ വകുപ്പും (ഡബ്ല്യു.സി.ഡി) അടിമുടി പരിഷ്കരിക്കാന് തീരുമാനം. അതിലേക്ക് ജീവനക്കാരുടെ പുനഃക്രമീകരണം, പുനഃസംഘടന ഉള്പ്പെടെ മാറ്റങ്ങളാണ് കൊണ്ടുവരുന്നത്. അതിന്റെ അടിസ്ഥാനത്തില് ഇരുവകുപ്പുകളും സംയുക്തമായി തയാറാക്കിയ മാര്ഗനിര്ദേശങ്ങള് സര്ക്കാര് പരിഗണനക്ക് നല്കിയിട്ടുണ്ട്.
ഇതിനെ തുടര്ന്ന് പല തസ്തികകളുടെയും പേരുകള് മാറുകയും ചില തസ്തികകള് ഒഴിവാക്കുകയും ചെയ്യും. പുതിയ ചില തസ്തികകള്ക്ക് അംഗീകാരവും ചിലതിന്റെ യോഗ്യതയുടെ അടിസ്ഥാനത്തില് പ്രമോഷന് സാധ്യതയും നിര്ദേശിക്കുന്നുണ്ട്. ചില തസ്തികകളില് യോഗ്യതകള് പുനര്നിര്ണയിച്ചിട്ടുണ്ട്.
തുടര് ചര്ച്ചകള്ക്കും നയപരമായ തീരുമാനങ്ങള്ക്കും ശേഷമായിരിക്കും നിര്ദേശം വകുപ്പില് നടപ്പാവുകയെന്ന് സാമൂഹികനീതി വനിത ശിശുക്ഷേമ വകുപ്പ് സ്പെഷല് സെക്രട്ടറി ബിജു പ്രഭാകര് പറഞ്ഞു. ഇതിന് ധനവകുപ്പിന്റെ അംഗീകാരംകൂടി വേണമെന്നും അദ്ദേഹം ചൂണ്ടിക്കാട്ടി.വനിത-ശിശുക്ഷേമ വകുപ്പ് രൂപവത്കരിച്ചപ്പോള് കാര്യമായി ഒരു മുന്നൊരുക്കവും നടത്തിയിരുന്നില്ല. സാമൂഹിക നീതി വകുപ്പിലെ ജീവനക്കാരെ പുനര്വിന്യസിച്ച് വകുപ്പ് ആരംഭിക്കുകയായിരുന്നു. ഇതോടെ രണ്ടു വകുപ്പുകളുടെയും പ്രവര്ത്തനങ്ങള് താളംതെറ്റി. അതൊഴിവാക്കുകയാണ് പ്രധാന ലക്ഷ്യം.
എസ്.ജെ.ഡിയില് ഒമ്പത് അധിക തസ്തികകളും ഡബ്ല്യു.സി.ഡിയില് 24 തസ്തികകളുമാണ് പുതുതായി സൃഷ്ടിച്ചിരിക്കുന്നത്. 12 തസ്തികകള് എസ്.ജെ.ഡിയില് നിന്ന് ഒഴിവാക്കി.ഡബ്ല്യു.സി.ഡിയില് ഡയറക്ടറുടെ മേല്നോട്ടത്തില് വരുന്ന സ്ട്രീം-എ വിഭാഗത്തില്നിന്ന് 26 തസ്തികകളും ബി വിഭാഗത്തില്നിന്ന് 27 തസ്തികകളും ഒഴിവാക്കി. പ്രമോഷനുകളെല്ലാം യോഗ്യതയുടെയും വകുപ്പുതല പരീക്ഷയുടെ അടിസ്ഥാനത്തിലായിരിക്കും.
അംഗന്വാടി വര്ക്കറുടെ യോഗ്യത ഇനിമുതല് പ്ലസ് ടു ആയും നിശ്ചയിച്ചിട്ടുണ്ട്. കൂടാതെ, ശിശുവികസന പദ്ധതി ഓഫിസര് (സി.ഡി.പി.ഒ)-ക്ക് ബ്ലോക്ക് വിമണ് ഡെവലപ്മെന്റ് ഓഫിസര് എന്ന അധിക ചുമതല കൂടി നല്കും. സംയോജിത ശിശുവികസന പദ്ധതി (ഐ.സി.ഡി.എസ്) സൂപ്പര്വൈസര്ക്ക് പഞ്ചായത്ത് വിമണ് ആന്ഡ് ചൈല്ഡ് ഓഫിസറുടെ ചുമതല കൂടി ഉണ്ടായിരിക്കും.
https://www.facebook.com/Malayalivartha
