കോടതി ഉത്തരവുമായി ഭര്തൃവീട്ടില് മടങ്ങിയെത്തിയ കനകദുര്ഗ്ഗ കലിപ്പില്. ഭര്ത്താവും അദ്ദേഹത്തിന്റെ അമ്മയും ചേര്ന്ന് തന്റെ ആഭരണങ്ങളും പണവും മോഷ്ടിച്ചെന്ന് അവര് ആരോപിച്ചു
കോടതി ഉത്തരവുമായി ഭര്തൃവീട്ടില് മടങ്ങിയെത്തിയ കനകദുര്ഗ്ഗ കലിപ്പില്. ഭര്ത്താവും അദ്ദേഹത്തിന്റെ അമ്മയും ചേര്ന്ന് തന്റെ ആഭരണങ്ങളും പണവും മോഷ്ടിച്ചെന്ന് അവര് ആരോപിച്ചു. ശബരിമല ദര്ശനം നടത്തി ശ്രദ്ധേയയായ കനകദുര്ഗ്ഗ കോടതി ഉത്തരവുമായി കഴിഞ്ഞ ദിവസമാണ് പെരിന്തല് മണ്ണയിലെ ഭര്തൃഗൃഹത്തില് പ്രവേശിച്ചത്. പല വീട്ട് സാധനങ്ങളും കാണാത്തതിനെ തുടര്ന്ന് നടത്തിയ പരിശോധനയിലാണ് സ്വര്ണ വളകളും ഒരു ജോഡി കമ്മലും പതിമൂവായിരം രൂപയും കാണാതായതെന്ന് കനകദുര്ഗ്ഗ പറഞ്ഞു. ഇത് സംബന്ധിച്ച് കനകദുര്ഗ്ഗ പരാതി നല്കിയിട്ടില്ലെന്ന് പെരിന്തല്മണ്ണ പൊലീസ് അറിയിച്ചു. ഭര്ത്താവ് കൃഷ്ണനുണ്ണിയും അദ്ദേഹത്തിന്റെ അമ്മയും വീട്ടില് കയറ്റാന് അനുവദിക്കുന്നില്ലെന്ന് കാട്ടിയാണ് കനകദുര്ഗ്ഗ പെരിന്തല്മണ്ണ ഗ്രാമകോടതിയെ സമീപിച്ചത്.
കോടതി ഉത്തരവുമായി വീട്ടിലെത്തിയ കനകദുര്ഗ്ഗയെ ഭര്ത്താവോ വീട്ടുകാരോ തടഞ്ഞില്ല. ആഭരണങ്ങളും പണവും മോഷണം പോയെന്ന് ആരോപിക്കുമ്പോഴും പരാതി നല്കാത്തതിന് പിന്നില് ദുരൂഹതയുണ്ടെന്ന് നാട്ടുകര് ആരോപിക്കുന്നു. ഭര്ത്താവോ, വീട്ടുകാരോ പ്രശ്നമുണ്ടാക്കാതിരിക്കാനാണ് കനകദുര്ഗ്ഗ ഇത്തരത്തിലൊരു തന്ത്രം പ്രയോഗിച്ചതെന്നും ആക്ഷേപമുണ്ട്. പരാതി നല്കിയാല് പൊലീസ് അന്വേഷണം നടത്തും അതുകൊണ്ടാണ് പരാതി നല്കാത്തതെന്നും ആക്ഷേപമുണ്ട്. ജനുവരി രണ്ടിന് ശബരിമലയില് ദര്ശനം നടത്തിയ ശേഷം വീട്ടില് പോകാനാവാത്ത സ്ഥിതിയിലായിരുന്നു കനകദുര്ഗ്ഗയും ബിന്ദുവും. ഇതേ തുടര്ന്ന് പൊലീസ് സംരക്ഷണത്തില് പലയിടങ്ങളില് മാറി മാറി താമസിച്ച ശേഷം വീട്ടിലെത്തിയെങ്കിലും കയറ്റാന് ഭര്തൃമാതാവ് തയ്യാറായില്ല.
അമ്മായി അമ്മയും കനകദുര്ഗ്ഗയും തമ്മിലുണ്ടായ ഏറ്റുമുട്ടലില് ഇരുവര്ക്കും പരിക്കേറ്റിരുന്നു. തലയ്ക്ക് പരിക്കേറ്റ കനകദുര്ഗ്ഗ കോഴിക്കോട് മെഡിക്കല് കോളജില് ചികിത്സതേടിയിരുന്നു. അവിടെ നിന്ന് സഖി കേന്ദ്രത്തില് താമസിച്ച് വരുകയായിരുന്ന കനകദുര്ഗ്ഗ പെരിന്തല്മണ്ണ ഗ്രാമ കോടതിയെ സമീപിക്കുകയായിരുന്നു. തന്റെയോ വീട്ടുകാരുടെയോ അനുമതിയില്ലാതെയാണ് കനകദുര്ഗ്ഗ മലകയറാന് പോയതെന്ന് ഭര്ത്താവ് കൃഷ്ണനുണ്ണി വ്യക്തമാക്കിയിരുന്നു. ദര്ശനം നടത്തിയെന്ന വാര്ത്ത വന്നതിന് പിന്നാലെ ഇവരുടെ വീടിന് മുന്നില് ബി.ജെ.പി പ്രവര്ത്തകര് നാമജപ പ്രതിഷേധം സംഘടിപ്പിച്ചിരുന്നു. പിന്നാലെ സഹോദരന് ഭരത്ഭൂഷണും കനകദുര്ഗയ്ക്കെതിരെ രംഗത്തെത്തി. ആഴ്ചകള്ക്ക് ശേഷം തിരുവനന്തപുരത്ത് നടന്ന അയ്യപ്പഭക്തസംഗമത്തില് പങ്കെടുത്ത ഭരത്ഭൂഷന്, കനകദുര്ഗ്ഗ ദര്ശനം നടത്തിയതിന് ഹൈന്ദവസമൂഹത്തോട് മാപ്പ് പറഞ്ഞു.
സുപ്രീംകോടതി വിധി പുനപ്പരിശോധിക്കരുതെന്ന് ആവശ്യപ്പെട്ട് കനകദുര്ഗ്ഗ ഇന്നലെ സുപ്രീംകോടതിയില് ഹര്ജി നല്കിയിട്ടുണ്ട്. അതോടൊപ്പം കുംഭമാസ പൂജകള്ക്ക് നടതുറക്കുമ്പോള് ദര്ശനം നടത്താന് സുരക്ഷ ഒരുക്കണമെന്നും ആവശ്യപ്പെട്ടു. സുപ്രീംകോടതി നിര്ദ്ദേശപ്രകാരം പൊലീസ് ഇരുപത്തിനാല് മണിക്കൂറും സുരക്ഷ ഏര്പ്പെടുത്തിയിട്ടുള്ളതിനാല് ഇന്നലെ വീടിന് മുന്നിലും കനകദുര്ഗ്ഗ ജോലി ചെയ്യുന്ന സിവില് സപ്ളൈസിന് മുന്നിലും ബി.ജെ.പി- ആര്.എസ്.എസ് പ്രവര്ത്തകര് പ്രതിഷേധം സംഘടിപ്പിച്ചിരുന്നില്ല. ഭര്ത്താവും ഭര്തൃമാതാവും അധ്വാനിച്ചുണ്ടാക്കിയ വീട്ടില് കനകദുര്ഗ കഴിയുന്നതില് അവര്ക്ക് എതിര്പ്പുണ്ട്. അതിനാല് ഭര്ത്താവിനും തനിക്കും കൗണ്സിലിംഗ് വേണമെന്ന് കനകദുര്ഗ്ഗ ആവശ്യപ്പെട്ടിട്ടുണ്ട്.
https://www.facebook.com/Malayalivartha
