രാഹുല്‍ഗാന്ധിയുടെ വയനാടന്‍ അങ്കത്തിന് പിന്നില്‍ കളിച്ചത് കെ.സി വേണുഗോപാലാണെന്ന രഹസ്യം കോണ്‍ഗ്രസില്‍ അങ്ങാടിപ്പാട്ടാണെന്ന് ഗ്രൂപ്പിന് അതീതരായ പല നേതാക്കളും സൂചിപ്പിക്കുന്നു. വയനാട് സീറ്റിനെ ചൊല്ലി രമേശും ഉമ്മന്‍ചാണ്ടിയും തമ്മിലുണ്ടായ തര്‍ക്കവും കേന്ദ്ര തെരഞ്ഞെടുപ്പ് സമിതിയോട് ആലോചിക്കാതെ വടകരയിലും വയനാട്ടിലും സ്ഥാനാര്‍ത്ഥികളെ നിര്‍ത്തിയതില്‍ കെ.സി വേണുഗോപാലിന് അടക്കം കടുത്ത എതിര്‍പ്പുണ്ടായിരുന്നു. രാഹുല്‍ ഗാന്ധി അന്ന് വടക്കുകിഴക്കന്‍ സംസ്ഥാനങ്ങളില്‍ പര്യടനത്തിലായിരുന്നു. കുറേ നാളായി കേരളത്തില്‍ പോരടിച്ചും അധികാരം പങ്കിട്ടും മറ്റ് പലരെയും ഒതുക്കിയും എ, ഐ ഗ്രൂപ്പുകള്‍ നടത്തിവന്ന കളികള്‍ക്ക് തടയിടാന്‍ സംഘടനാ ചുമതലയുള്ള കെ.സി തീരുമാനിച്ചു. അതിന്റെ ഭാഗമായാണ് രാഹുലിനെ വയനാട്ടില്‍ മത്സരിപ്പിക്കാന്‍ കെ.സി പദ്ധതിയിട്ടത്. ഇക്കാര്യം കെ.പി.സി.സി മുല്ലപ്പള്ളി രാമചന്ദ്രന്‍ അറിയാമായിരുന്നു.

സ്ഥാനാര്‍ത്ഥികളെ പ്രഖ്യാപിച്ച് പ്രചാരണ പരിപാടികളുമായി മുന്നോട്ട് പോയ ഉമ്മന്‍ചാണ്ടിയും ചെന്നിത്തലയും ഇങ്ങനെയൊരു തിരിച്ചടി പ്രതീക്ഷിച്ചില്ല. എ.ഐ.സി.സിയുടെ അഭിപ്രായം വന്നുടനെ ഇരുവര്‍ക്കും പിന്തുണയ്ക്കുകയല്ലാതെ മറ്റ് മാര്‍ഗമില്ലായിരുന്നു. കെ.സിയാകാട്ടെ ഇത് സംബന്ധിച്ച് ഇവരുമായി ആശയവിനിമയം നടത്തിയില്ലെന്നാണ് അറിയുന്നത്. എ.കെ ആന്റണി ഇതേ കുറിച്ച് മുസ്്‌ലിംലീഗ് നേതാക്കളുമായി ആശയവിനിമയം നടത്തിയിരുന്നു. കാരണം ലീഗിന്റെ നിയമസഭാ മണ്ഡലങ്ങളാണ് വയനാടിന് കീഴില്‍ കൂടുതലുള്ളത്. രാഹുലിന്റെ സ്ഥാനാര്‍ത്ഥിത്വം ലീഗിന് ഏറെ സന്തോഷമായിരുന്നു. രാഹുല്‍ എത്തുന്നതോടെ കേരളത്തിന്റെ മൊത്തം ചിത്രം മാറുമെന്ന് കുഞ്ഞാലിക്കുട്ടി പറഞ്ഞതും അതുകൊണ്ടാണ്.

കര്‍ണാടക നിയമസഭാ ഭരണം തന്ത്രപരമായ നീക്കത്തിലൂടെ കെ.സി വേണുഗോപാല്‍ തിരിച്ച് പിടിച്ചതോടെയാണ് രാഹുല്‍ ഗാന്ധിക്ക് പ്രിയപ്പെട്ടവനായത്. യെദ്യൂരപ്പയുടെ നേതൃത്വത്തില്‍ പല തവണ കര്‍ണാടകത്തിലെ സര്‍ക്കാരിനെ താഴെയിറക്കാന്‍ ശ്രമിച്ചപ്പോഴെല്ലാം കെ.സി ഇടപെട്ട് തടയിട്ടു. അങ്ങനെയാണ് സംഘടനാ ചുമതലയുള്ള ജനറല്‍സെക്രട്ടറിയുടെ ചുമതല കെ.സിക്ക് നല്‍കിയത്. കേരളത്തില്‍ നിന്ന് ഒരു നേതാവ് ആദ്യമായാണ് ഈ പദവിയിലെത്തുന്നത്. അതോടെ കേരളത്തിലെ പല നേതാക്കള്‍ക്കും കെ.സിയോട് അസൂയമൂത്തു. അവരൊക്കെ കാല്‌വാരുമെന്ന് ഉറപ്പായതോടെയാണ് ആലപ്പുഴയില്‍ മത്സരിക്കില്ലെന്ന് കെ.സി തീരുമാനിച്ചതെന്ന് സൂചനയുണ്ട്. അങ്ങനെയ കെ.സിയെ വയനാട് മത്സരിപ്പിക്കാന്‍ കെ.പി.സി.സി ആലോചിച്ചെങ്കിലും അദ്ദേഹം പിന്‍മാറി.

സംഘടനാ ചുമതലയുള്ള ജനറല്‍സെക്രട്ടറിയായ കെ.സിയാണ് മറ്റ് പല സംസ്ഥാനങ്ങളിലേയും കാര്യങ്ങള്‍ തീരുമാനിക്കുന്നത്. ഇത് കേരളത്തിലെ അടക്കം നേതാക്കള്‍ക്ക് തലവേദനയായിരിക്കുകയാണ്. ചെന്നിത്തലയ്ക്ക് ഒപ്പം ഉണ്ടായിരുന്ന പല നേതാക്കളും കെ.സിക്കൊപ്പം അണിനിരക്കുകയാണ്. പാലക്കാട് സ്ഥാനാര്‍ത്ഥി വി.കെ ശ്രീകണ്ഠന്‍ ഉത്തമഉദാഹരണം. ഇങ്ങിയെയാണ് പോക്കെങ്കില്‍ അടുത്ത നിയമസഭാ തെരഞ്ഞെടുപ്പിന് ശേഷം കെ.സി കേരളാ മുഖ്യമന്ത്രി കസേരയില്‍ എത്താനുള്ള സാധ്യതയും തള്ളിക്കളയാനാവില്ല. ഇതെല്ലാം മുന്‍കൂട്ടി കണ്ട് ഉമ്മന്‍ചാണ്ടിയും ചെന്നിത്തലയും കണ്ണ്തള്ളിയിരിക്കുകയാണ്.