വയനാട് മേപ്പാടിയിലെ തുരങ്കപാത നിര്‍മ്മാണ മേഖലയിലെ മീനാക്ഷിപാലത്തിന് സമീപം ഉണ്ടായ മണ്ണിടിച്ചിലിന്റെ ഭീകരത വ്യക്തമാക്കുന്ന സിസിടിവി ദൃശ്യങ്ങള്‍ പുറത്ത്. പാലത്തിന് സമീപമുള്ള കടയിലെ സിസിടിവി ക്യാമറയില്‍ പതിഞ്ഞ ദൃശ്യങ്ങളാണ് ഇപ്പോള്‍ പുറത്തുവന്നിരിക്കുന്നത്. അപകടത്തിന്റെ വ്യാപ്തി വെളിപ്പെടുത്തുന്നതാണ് ദൃശ്യങ്ങള്‍.

മലമുകളില്‍ നിന്ന് വന്‍തോതില്‍ മണ്ണിടിഞ്ഞ് ശക്തമായി താഴേക്ക് പതിക്കുകയായിരുന്നു. ഇതിന്റെ ആഘാതത്തില്‍ മീനാക്ഷിപ്പാലം പൂര്‍ണമായി മറികടന്ന് മണ്ണും ചെളിയും വെള്ളവും വേഗതയില്‍ താഴേക്ക് കുതിച്ചൊഴുകി. റോഡിലുണ്ടായിരുന്ന വാഹനങ്ങള്‍ മണ്ണിലും ചെളിയിലും പെട്ട് തെന്നിനീങ്ങുന്നത് ദൃശ്യങ്ങളില്‍ കാണാം. പെട്ടെന്നുണ്ടായ ദുരന്തത്തില്‍ നിന്ന് ഓടിരക്ഷപെടാന്‍ ആളുകള്‍ ശ്രമിക്കുന്നതും, ഇതിനിടയില്‍ ചിലര്‍ ശക്തമായ ഒഴുക്കില്‍പ്പെട്ട് ഒഴുകിനീങ്ങുന്നതുമായ ഭീതി ജനിപ്പിക്കുന്ന ദൃശ്യങ്ങളാണ് സിസിടിവിയിലുള്ളത്.

ഇന്ന് ഉച്ചയോടെയാണ് വയനാട് കള്ളാടിയില്‍ മീനാക്ഷിപാലത്തിന് സമീപം മണ്ണിടിഞ്ഞത്. അപകടത്തില്‍ ഒരു വീടും പള്ളിയും പൂര്‍ണമായും തകര്‍ന്നിട്ടുണ്ട്. സ്ഥലത്തെ ബസ് സ്‌റ്റോപ്പും പാലവും മണ്ണിനടിയിലായി. അഞ്ചുപേര്‍ മരിച്ചെന്നാണ് വിവരം. ഏഴ് പേരെ കാണാതായി. പരിക്കേറ്റവരെ ആശുപത്രിയില്‍ പ്രവേശിപ്പിച്ചു. രക്ഷാപ്രവര്‍ത്തനം പുരോഗമിക്കുകയാണ്. മന്ത്രിമാര്‍ ഉള്‍പ്പെടെയുള്ളവര്‍ സ്ഥലത്തേക്ക് തിരിച്ചിട്ടുണ്ട്.