ബിന്ലാദന്റെ ചിത്രം പതിച്ച കാര് കൊല്ലത്ത് കസ്റ്റഡിയില്
കൊല്ലത്ത് കാണപ്പെട്ട ഒസാമ ബിന്ലാദന്റെ ചിത്രം പതിച്ച കാര് പൊലീസ് കസ്റ്റഡിയില് എടുത്തു. കൊല്ലം പള്ളിമുക്ക് സ്വദേശിയുടെ ഉടമസ്ഥതയിലുള്ള കാര് പശ്ചിമ ബംഗാളില് രജിസ്റ്റര് ചെയ്തതാണ്. കാറിനെ കുറിച്ച് സംസ്ഥാന പൊലീസും കേന്ദ്രരഹസ്യാന്വേഷണവിഭാഗവും അന്വേഷണം ആരംഭിച്ചു.
ഒരു യാത്രക്കാരനാണ്, ഒസാമ ബിന്ലാദന്റെ ചിത്രം പതിച്ച കാര് കൊല്ലം നഗരത്തിലുടെ സഞ്ചരിക്കുന്ന വിവരം പൊലീസിനെ അറിയിച്ചത്. ചിത്രങ്ങള് അടക്കമുള്ള വിവരങ്ങള് ഇയാള് പൊലീസിനു കൈമാറി. തുടര്ന്ന് ഇരവിപുരം പൊലീസ് നഗരത്തില് നിന്നു തന്നെ കാര് കസ്റ്റഡിയിലെടുത്തു. വാഹനം ഓടിച്ചിരുന്ന യുവാവിനെ ചോദ്യം ചെയ്തു.
കൊല്ലം പള്ളിമുക്ക് സ്വദേശിയില് നിന്ന് വിവാഹാവശ്യത്തിനായി വാടകയ്ക്കെടുത്തതാണ് കാറെന്നായിരുന്നു ഇയാളുടെ മൊഴി. തുടര്ന്ന് വാഹന ഉടമയേയും സ്റ്റേഷനിലേക്ക് വിളിച്ചു വരുത്തി ചോദ്യം ചെയ്തു. ഒരു വര്ഷം മുന്പ് പശ്ചിമ ബംഗാളില് നിന്നു വാങ്ങിയതാണ് കാറെന്നാണ് ഇയാളുടെ മൊഴി. കാറിനെ പറ്റിയുള്ള കൂടുതല് വിവരങ്ങള് പൊലീസ് അന്വേഷിക്കുകയാണ്.
കേന്ദ്ര രഹസ്യന്വേഷണ വിഭാഗവും സംഭവത്തെക്കുറിച്ച് അന്വേഷിക്കുന്നുണ്ട്. സംസ്ഥാനത്ത് ആക്രമണത്തിനു ഭീകരസംഘടനകള് പദ്ധതിയിട്ടിരുന്നു എന്ന വിവരം പുറത്തു വന്ന സാഹചര്യത്തില് കാറില് ആഗോള ഭീകരനായിരുന്ന ഒസാമ ബിന്ലാദന്റെ സ്റ്റിക്കര് പതിച്ച സംഭവത്തെ അന്വേഷണ ഏജന്സികള് വളരെ ഗൗരവമായാണ് കാണുന്നത്.
https://www.facebook.com/Malayalivartha
