ഒമാനില് മലവെള്ളപ്പാച്ചിലില് പെട്ട് പിഞ്ചു കുഞ്ഞടക്കമുള്ള ആറംഗ ഇന്ത്യന് കുടുംബത്തെ കാണാതായി, കനത്ത മഴയെ തുടര്ന്നുണ്ടായ വെള്ളപ്പൊക്കത്തില് 28 ദിവസം പ്രായമായ പിഞ്ചു കുഞ്ഞടക്കമാണ് ഒലിച്ചു പോയത്
ഒമാനില് മലവെള്ളപ്പാച്ചിലില് പെട്ട് പിഞ്ചു കുഞ്ഞടക്കമുള്ള ആറംഗ ഇന്ത്യന് കുടുംബത്തെ കാണാതായി. കനത്ത മഴയെ തുടര്ന്നുണ്ടായ വെള്ളപ്പൊക്കത്തില് 28 ദിവസം പ്രായമായ പിഞ്ചു കുഞ്ഞടക്കമാണ് ഒലിച്ചു പോയത്. ഇവര് സഞ്ചരിച്ചിരുന്ന കാര് വാദി ബനീ ഖാലിദില് വെച്ച് മലവെള്ളപ്പാച്ചിലില് പെട്ട് ഒലിച്ചു പോവുകയായിരുന്നു. ഒമാനില് ഫാര്മസിസ്റ്റ് ആയി ജോലി ചെയ്യുന്ന ഇന്ത്യക്കാരനായ സര്ദാര് ഫസല് അഹമ്മദും കുടുംബവും സഞ്ചരിച്ച വാഹനമാണ് അപകടത്തില് പെട്ടത്. ഒഴുകിപ്പോവുന്നതിനിടയില് ഒരു മരത്തില് പിടിത്തം കിട്ടിയ സര്ദാര് രക്ഷപ്പെടുകയായിരുന്നു.
എന്നാല് ഇദ്ദേഹത്തിന്റെ ഭാര്യ അര്ഷി, പിതാവ് ഖാന്, മാതാവ് ശബാന, നാല് വയസ്സുകാരി മകള് സിദ്ര, രണ്ട് വയസ്സുകാരന് മകന് സൈദ്, 28 ദിവസം പ്രായമുള്ള മകന് നൂഹ് എന്നിവരാണ് ഒലിച്ചുപോയി. ഇവരെ കുറിച്ച് ഇത് വരെ ഒരു വിവരവും ഇല്ല. ഇന്നലെയും ഇന്നുമായി രക്ഷാപ്രവര്ത്തകര് തിരച്ചില് നടത്തിയെങ്കിലും നിരാശയായിരുന്നു ഫലം. ഒഴുക്കില് പെട്ട ആറ് പേരും മരിച്ചിട്ടുണ്ടാവും എന്നാണ് അധികൃതരുടെ നിഗമനം. പുതുതായി ജനിച്ച കുട്ടിയെ കാണാന് വേണ്ടിയാണ് സര്ദാറിന്റെ മാതാപിതാക്കള് നാട്ടില് നിന്നും ഒമാനിലേക്ക് വന്നത്. ഇന്ന് നാട്ടിലേക്ക് തിരിച്ചു പോവാനിരിക്കെയാണ് ഈ ദാരുണ സംഭവം.
ഇബ്രയില് നിന്ന് കാറില് വാദി ബനീ ഖാലിദിലേക്കാണ് ഇവര് പോയത്. നല്ല ചൂടുണ്ടായിരുന്നു. നല്ല വെളിച്ചമുണ്ടായിരുന്നു. അതിനാല് മഴ പെയ്യുമെന്ന് പ്രതീക്ഷിച്ചിരുന്നില്ല. വാദിയില് എത്തിയപ്പോള് മഴ പെയ്യാന് തുടങ്ങി. ഏതാനും മിനിറ്റുകള്ക്കകം മഴ തീരുമെന്നാണ് പ്രതീക്ഷിച്ചിരുന്നത്. എന്നാല് മഴ കനത്തു. അതുവഴി പോയ പ്രദേശവാസി ഇവരോട് പറഞ്ഞു, അവിടം അപകടം പിടിച്ച സ്ഥലമാണ് പെട്ടെന്ന് പോകണമെന്ന്. എന്നാല് പ്രധാന റോഡിലേക്ക് പോകാന് ഒരു വഴിയേ ഉണ്ടായിരുന്നുള്ളൂ. അതിനാല് കാറിലുള്ളവരെല്ലാം രക്ഷപെടാന് ശ്രമിച്ചു. എന്നാല് മൂടല് മഞ്ഞ് രൂപപ്പെട്ടതിനാല് കാറിനുള്ളിലുള്ളവര്ക്ക് ഗ്ലാസിലൂടെ ഒന്നും കാണാന് സാധിച്ചില്ല. മാത്രമല്ല വായൂ പോലും കാറിലേക്ക് കടക്കാനാകാത്ത സ്ഥിതിയായി. അപ്പോഴേക്കും കാര് മലയുടെ മുകളിലെത്തിയെങ്കിലും മണല് കലര്ന്ന വെള്ളം കുത്തിയൊഴുകാന് തുടങ്ങിയിരുന്നെന്ന് രക്ഷപെട്ട സര്ദാര് ഫസല് പറഞ്ഞു.
കാര് പിന്നോട്ടെടുത്ത് വലിയ മതിലിനോട് ചേര്ത്ത് നിര്ത്തിയെങ്കിലും രക്ഷപെടാനായില്ല. കാര് വെള്ളപ്പാച്ചിലില് ഒഴുകിത്തുടങ്ങിയിരുന്നു. ഉടനെ എല്ലാവരും പുറത്തിറങ്ങാന് നോക്കി. അതിനിടെ ഫസലിന്റെ മകള് വെള്ളത്തില് വീണു. കുഞ്ഞിനെ രക്ഷിക്കാന് ഫസലിന്റെ പിതാവ് ശ്രമിച്ചെങ്കിലും അദ്ദേഹവും മകളും ഒലിച്ചുപോയി. ഇതെല്ലാം കണ്ട് കാറിലിരുന്ന് നിലവിളിക്കാനേ ഫസലിനും ഭാര്യയ്ക്കും മാതാവിനും കഴിഞ്ഞുള്ളൂ. അതിനിടെ കാര് തടാകത്തിലേക്ക് ഒലിച്ച് പോയി. ഫസല് കാറില് നിന്ന് തെറിച്ച് പോയി. ഒരു പാറയില് കയറി ഇരുന്നു. ഇപ്പോഴേക്കും കാര് കാണാനില്ലായിരുന്നു. ഹൈദരാബാദ് സ്വദേശിയാണ് സര്ദാര് ഫസല്.
https://www.facebook.com/Malayalivartha
