അരൂരില്‍ കോണ്‍ഗ്രസ് പാളയത്തില്‍ പട, പാര്‍ട്ടി സ്ഥാനാര്‍ത്ഥി ഷാനിമോള്‍ ഉസ്മാന് റിബലായി പ്രതിപക്ഷനേതാവ് രമേശ് ചെന്നിത്തലയുടെ തട്ടകമായ ഹരിപ്പാട്ട് നിന്നൊരു യുവതി രംഗത്തെത്തി
അരൂരില്‍ കോണ്‍ഗ്രസ് പാളയത്തില്‍ പട. പാര്‍ട്ടി സ്ഥാനാര്‍ത്ഥി ഷാനിമോള്‍ ഉസ്മാന് റിബലായി പ്രതിപക്ഷനേതാവ് രമേശ് ചെന്നിത്തലയുടെ തട്ടകമായ ഹരിപ്പാട്ട് നിന്നൊരു യുവതി രംഗത്തെത്തി. യൂത്ത് കോണ്‍ഗ്രസ് സംസ്ഥാന സെക്രട്ടറി ഗീത അശോകനാണ് റിബലായി മത്സരിക്കുന്നത്. ഇത് സംബന്ധിച്ച പ്രഖ്യാപനം താമസിക്കാതെ ഉണ്ടാകും. കോണ്‍ഗ്രസ് മണ്ഡലത്തിലെ സ്ഥാനാര്‍ത്ഥി നിര്‍ണയത്തില്‍ യുവാക്കളെ അവഗണിച്ചതിലും സാമുദായിക രാഷ്ട്രീയത്തിന് അടിയറവ് പറഞ്ഞതിലും പ്രതിഷേധിച്ച് യൂത്ത് കോണ്‍ഗ്രസില്‍ നിന്ന് രാജിവച്ചാണ് ഗീത അശോകന്‍ റിബലായി മത്സരിക്കുന്നത്. ഗീതയ്ക്ക് പിന്തുണ പ്രഖ്യാപിച്ച് രണ്ട് യൂത്ത് കോണ്‍ഗ്രസ് മണ്ഡലം സെക്രട്ടറിമാര്‍ രാജിവച്ചു കഴിഞ്ഞു.
കെ.എസ്.യുവിലൂടെയാണ് ഗീത അശോകന്‍ രാഷ്ട്രീയത്തിലെത്തിയത്. 2011ല്‍ രാഹുല്‍ ഗാന്ധി നടത്തിയ ടാലന്റ് ഹണ്ടില്‍ അഖിലേന്ത്യാ സെക്രട്ടറിമാരുടെ മത്സരത്തില്‍ പങ്കെടുക്കാന്ഡ കേരളത്തില്‍ നിന്ന് തെരഞ്ഞെടുത്ത മൂന്ന് വനിതകളില്‍ ഒരാളായിരുന്നു ഗീത. യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ് നടത്തിയ യുവകേരള യാത്രയിലെ അംഗമായിരുന്നു. സേവ് ചാരിറ്റബിള്‍ സൊസൈറ്റിയുമായി സഹകരിച്ച് ഭൂ രഹിതര്‍ക്ക് വീട് പണിത് കൊടുക്കുന്നുമുണ്ട്. സാമുദായിക സമവാക്യങ്ങള്‍ക്ക് മുന്‍തൂക്കം നല്‍കുന്നതിനാണ് ഷാനിമോളെ സ്ഥാനാര്‍ത്ഥിയാക്കിയത്. അതേസമയം ഗീതയുടെ പ്രതിഷേധം തണുപ്പിക്കാന്‍ മറ്റ് ചില ഫോര്‍മുലകളുമായി നേതൃത്വം മുന്നോട്ട് വരുമെന്നാണ് അറിയുന്നത്.
സി.പി.എമ്മിന്റെ സിറ്റിംഗ് സീറ്റായ അരൂരില്‍ കോണ്‍ഗ്രസ് ഇത്തവണ വലിയ വെല്ലുവിളിയാണ് നേരിടുന്നത്. ഈഴവ വോട്ടുകള്‍ ഏറെ നിര്‍ണായകമായ മണ്ഡലത്തില്‍ എസ്.എന്‍.ഡി.പി , ബി.ഡി.ജെ.എസ് വോട്ടുകള്‍ നിര്‍ണായകമാണ്. കോണ്‍ഗ്രസുമായും ബി.ജെ.പിയുമായും എസ്.എന്‍.ഡി.പി നേതൃത്വം അകന്ന് നില്‍ക്കുകയാണ്. ബി.ഡി.ജെ.എസ് ആകട്ടെ സ്ഥാനാര്‍ത്ഥിയെ പോലും നിര്‍ത്താന്‍ തയ്യാറായില്ല. അതിനാല്‍ ആ വോട്ടുകളെല്ലാം ഇടത് പെട്ടിയില്‍ വീഴുമെന്ന ആശങ്ക കോണ്‍ഗ്രസിനും ബി.ജെ.പിക്കും ഉണ്ട്. യു.ഡി.എഫിന്റെ പാലായിലെ പരാജയത്തിന് പ്രധാന കാരണം എസ്.എന്‍.ഡി.പിയും ബി.ഡി.ജെ.എസുമാണ്. അവരുടെ വോട്ടുകള്‍ മാണി സി.കാപ്പന്റെ പെട്ടിയില്‍ വീണതോടെ കേരളാ കോണ്‍ഗ്രസ് അരനൂറ്റാണ്ട് ഭരിച്ച പാലായില്‍ പരാജയത്തിന്റെ പടുകുഴിയിലേക്ക് വീഴുകയായിരുന്നു.
പാലായിലും അരൂര്‍ മോഡല്‍ ഓപ്പറേഷനാണ് എസ്.എന്‍.ഡി.പിയും ബി.ഡി.ജെ.എസും പയറ്റുന്നത്. അതിനെ മറികടക്കാന്‍ നന്നായി അദ്വാനിച്ചേ പറ്റൂ. അതിനിടെ പിന്നോക്ക സമുദായത്തില്‍ പെട്ട ഗീത റിബലായി എത്തുന്നതോടെ കൂടുതല്‍ പ്രതിസന്ധികളുണ്ടാകും. സാമുദായിക സമവാക്യങ്ങള്‍ മാറിമറിയും. കോന്നിയില്‍ ഇതേ രീതിയിലാണ് കാര്യങ്ങള്‍ പോയത്. എന്നാല്‍ ഡി.സി.സിയും കെ.പി.സി.സിയും ഇടപെട്ട് പ്രശ്‌നം പരിഹരിക്കുകയായിരുന്നു. മോഹന്‍രാജിന് പകരം റോബിന്‍ പീറ്ററെ സ്ഥാനാര്‍ത്ഥിയാക്കിയിരുന്നെങ്കില്‍ പരാജയം ഇരന്ന് വാങ്ങുന്ന സ്ഥിതിയാകുമായിരുന്നു. സമാനമായ സാഹചര്യമാണ് അരൂരിലും ഉയര്‍ന്ന് വരുന്നത്. നേതൃത്വം ഇടപെട്ട് വിഷയം പരിഹരിച്ചില്ലെങ്കില്‍ കാര്യങ്ങള്‍ കൂടുതല്‍ കുരുക്കിലേക്ക് നീങ്ങും. കാരണം പാലായില്‍ നിന്ന് അരൂരിലേക്ക് അധികം ദൂരമില്ല.
https://www.facebook.com/Malayalivartha
