ടൂറിന് പോയ വിദ്യാര്ത്ഥികള്ക്ക് വിദഗ്ധ ചികിത്സ ലഭ്യമാക്കാന് മന്ത്രി കെ.കെ. ശൈലജ ടീച്ചര് നിര്ദേശം നല്കി
കണ്ണൂരിലെ ഒരു കോളേജില് നിന്നും ചിക്മംഗലുരുവിലേക്കും ബംഗലരുവിലേക്കും ടൂറിന് പോയി തിരികെയെത്തിയ വിദ്യാര്ത്ഥികള്ക്ക് വിദഗ്ധ ചികിത്സ ലഭ്യമാക്കാന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് ആരോഗ്യ വകുപ്പ് ഡയറക്ടര്ക്ക് നിര്ദേശം നല്കി. ആശങ്കപ്പെടേണ്ട ഒരു സാഹചര്യവുമില്ലെന്നും ചികിത്സയിലുള്ളവര്ക്ക് സാധാരണ പനി മാത്രമാണുള്ളതെന്നും മന്ത്രി പറഞ്ഞു. എങ്കിലും മുന്കരുതലിന്റെ ഭാഗമായാണ് നിരീക്ഷണം ശക്തമാക്കാന് നിര്ദേശം നല്കിയത്. അതിനാല് തന്നെ ആശങ്കപ്പെടേണ്ട സാഹചര്യമില്ലെന്നും മന്ത്രി വ്യക്തമാക്കി.
54 വിദ്യാര്ത്ഥികളാണ് കോളേജില് നിന്നും ടൂര് പോയത്. ഇതില് ഒരു കുട്ടി മരണമടയുകയും മറ്റുള്ള ചില കുട്ടികള്ക്ക് പനി അനുഭവപ്പെടുകയും ചെയ്തതിനെ തുടര്ന്നാണ് ആരോഗ്യ വകുപ്പ് ഇടപെട്ടത്. മരണകാരണം വൈറല് മയോകാര്ഡൈറ്റിസ് മൂലമാണെന്ന് കണ്ണൂര് ആംസ്റ്റര് മിംസിലെ ഡോക്ടര് എഴുതിയിരുന്നത്. ഇത് ഏതുതരം വൈറസാണെന്ന് കണ്ടുപിടിക്കാന് വൈറോളജി ഇന്സ്റ്റിറ്റിയൂട്ടിലേക്ക് ആ കുട്ടിയുടെ രക്തസാമ്പിള് അയച്ചിട്ടുണ്ട്. വൈറോളജി ഇന്സ്റ്റിറ്റിയൂട്ടില് നിന്നും റിപ്പോര്ട്ട് ലഭിക്കാന് 3 ദിവസം വേണം. അത് കഴിഞ്ഞാല് മാത്രമേ ഏത് തരം വൈറസാണെന്ന് അറിയാന് കഴിയുകയുള്ളൂ.
ടൂറിന് പോയ 54 വിദ്യാര്ത്ഥികളില് 7 കുട്ടികള്ക്ക് ചെറിയ പനിയും ചെറിയ തലവേദനയുമുണ്ടായിരുന്നു. അത് ഒരു പക്ഷെ ടൂറിന് പോയത് കൊണ്ടുണ്ടാകുന്ന സാധാരണ വൈറല് ഫീവര് ആകാനാണ് സാധ്യത. എങ്കിലും ഏത് വൈറല് ഫീവറായാലും മയോകാര്ഡൈറ്റിസ് ഉണ്ടാകാന് സാധ്യതയുള്ളതിനാല് ആരോഗ്യ വകുപ്പ് വളരെ ശ്രദ്ധയോടെയാണ് ഇത് കാണുന്നത്. അതിനാല് പനിയുള്ള 7 കുട്ടികളേയും കണ്ണൂര് ജില്ലാ ആശുപത്രിയില് അഡ്മിറ്റാക്കുകയും രക്തസാമ്പിള് ആലപ്പുഴ, മണിപ്പാല് വൈറോളജി ഇന്സ്റ്റിറ്റിയൂട്ടില് അയയ്ക്കുകയും ചെയ്തിട്ടുണ്ട്. റിസള്ട്ട് വരുന്നതുവരെ ഈ വിദ്യാര്ത്ഥികളെ സൂക്ഷ്മമായി നിരീക്ഷിക്കാനും തീരുമാനിച്ചിട്ടുണ്ട്. ടൂറിന് പോയ മറ്റെല്ലാ വിദ്യാര്ത്ഥികളേയും പരിശോധിച്ചെങ്കിലും അവര്ക്കൊന്നും ഒരു കുഴപ്പവും കണ്ടെത്താന് കഴിഞ്ഞില്ല. കൂടാതെ മരണകാരണം വ്യക്തമാകാന് മരണമടഞ്ഞ കുട്ടിയുടെ മൃതദേഹം പോസ്റ്റുമോര്ട്ടം ചെയ്യാനും തീരുമാനിച്ചിട്ടുണ്ട്.
https://www.facebook.com/Malayalivartha