ക്ലാസ് മുറികള് പ്ലാസ്റ്റര് ചെയ്യാതെ ഫിറ്റ്നസ് സര്ട്ടിഫിക്കറ്റ് നല്കരുതെന്ന് ബാലാവകാശ കമ്മിഷന് ഉത്തരവിട്ടത് നവംബര് അഞ്ചിന്, അതിന് കാരണമായത് മൂന്നാം ക്ലാസുകാരിയുടെ തലയില് പാമ്പ് വീണത്...!
ബത്തേരിയില് ഒരു ഷെഹ്ല ഷെറിന് കണ്ണീരോര്മ്മയാകുന്നതിന് കുറച്ചുനാള് മുമ്പ് ഒറ്റപ്പാലത്ത് ചുനങ്ങാട് പിലാത്തറ എസ്ഡിവിഎംഎല്പി സ്കൂളിലെ മൂന്നാം ക്ലാസുകാരി സഹ്ലയിലൂടെ മുന്നറിയിപ്പ് ലഭിച്ചതാണ്!
ഷെഹ്ലയുടെ ക്ലാസ് മുറിയില് വിഷപ്പാമ്പുകള്ക്ക് താവളം ഒരുക്കാന് അവസരം ഉണ്ടായത് രണ്ടാഴ്ച മുന്പു ബാലാവകാശ കമ്മിഷന് നല്കിയ നിര്ദേശം സ്കൂള് അധികൃതര് അവഗണിച്ചതിനാലാണ്. ഒറ്റപ്പാലത്തുള്ള, ചുനങ്ങാട് പിലാത്തറ എസ്ഡിവിഎംഎല്പി സ്കൂളിലെ മൂന്നാം ക്ലാസുകാരി സഹ്ലയ്ക്കുണ്ടായ ഒരു ഭീകരാനുഭവമാണ് ആ ഉത്തരവിറങ്ങുന്നതിലേക്കു നയിച്ചത്.
കഴിഞ്ഞ സെപ്റ്റംബര് 27-നായിരുന്നു സംഭവം. ഉച്ചഭക്ഷണത്തിനുശേഷം ക്ലാസ് തുടങ്ങിയ നേരത്താണ് നിഹാല് എന്ന കുട്ടിയുടെ തലയില് മേല്ക്കൂരയില്നിന്നു പാമ്പു വീണത്. സഹപാഠികളുടെ നിലവിളി ഉയര്ന്ന വേഗത്തില് തന്നെ നിഹാല്, തലയില് വീണതിനെ കൈകൊണ്ടു തട്ടിമാറ്റി. ഇതു തെറിച്ചു വീണതു സഹ്ലയുടെ കാലിലേക്ക്. കാലില് ചുറ്റിയ പാമ്പിനെ നിലവിളിയോടെ കുടഞ്ഞെറിഞ്ഞു. ക്ലാസ് മുറിയില് കുട്ടികളുടെ കൂട്ടനിലവിളി. സഹ്ല അടിമുടി വിറച്ചു.
വിവരമറിഞ്ഞു വീട്ടുകാര് സ്കൂളില് ഓടിയെത്തുമ്പോള് തളര്ന്നിരിക്കുകയാണ് കുട്ടി. മുറിവൊന്നും കണ്ടില്ലെങ്കിലും ആശുപത്രിയിലെത്തിച്ച് കുഴപ്പമില്ലെന്ന് ഉറപ്പുവരുത്തി.
സഹ്ലയുടെ അനുഭവം മാതൃപിതാവ് പാലക്കവളപ്പില് അബ്ദുല് ഖാദര് ബാലാവകാശ കമ്മിഷന് മുന്നിലെത്തിച്ചപ്പോഴാണു സുരക്ഷ ഉറപ്പാക്കാന് ഉത്തരവിറക്കിയത്. പിലാത്തറ കുളത്തിങ്ങല് ഹാഷിം-അഫ്സത്ത് ദമ്പതികളുടെ മകളാണു സഹ്ല.
എല്ലാ ക്ലാസ് മുറികളും പ്ലാസ്റ്റര് ചെയ്യണമെന്നും ഇല്ലെങ്കില് ഫിറ്റ്നസ് സര്ട്ടിഫിക്കറ്റ് നല്കരുതെന്നും ബാലാവകാശ കമ്മിഷന് അംഗം കെ. നസീര് ഉത്തരവിട്ടത് നവംബര് അഞ്ചിന്. അതിനു കാരണമായതോ സഹ്ലയ്ക്കുണ്ടായ ഭീകരാനുഭവം!
https://www.facebook.com/Malayalivartha