അബ്കാരി നിയമത്തിലെയും 1969 ലെ കേരളാ സ്പിരിറ്റ് പ്രിപ്പറേഷൻസ് (കൺട്രോൾ) നിയമത്തിലെയും ചട്ടങ്ങൾക്കും ലൈസൻസ് വ്യവസ്ഥകൾക്കും വിപരീതമായി മിനിലോറിയിൽ അരിഷ്ടാസവങ്ങൾ കടത്തിക്കൊണ്ട് വന്ന കേസിൽ രണ്ട് പ്രതികൾക്ക് ഇരുപതിനായിരം രൂപ പിഴയും കോടതി പിരിയും വരെ പ്രതിക്കൂട്ടിൽ നിർത്തിയുള്ള തടവും ശിക്ഷ വിധിച്ചു.

തിരുവന്തപുരം രണ്ടാം ജുഡീഷ്യൽ ഫസ്റ്റ് ക്ലാസ്സ് മജിസ്‌ട്രേട്ട് വിവീജാ രവീന്ദ്രനാണ് അരിഷ്ട കടത്ത് കേസിലെ രണ്ടു പ്രതികളെ ശിക്ഷിച്ചത്. അരിഷ്ടാസവങ്ങൾ കള്ളക്കടത്ത് നടത്തി വിൽപനയ്ക്ക് നേതൃത്വം നൽകുകയും ജാമ്യത്തിലിറങ്ങി ഒളിവിൽ പോകുകയും ചെയ്ത ഒന്നാം പ്രതിയായ കൊല്ലം ജില്ലയിൽ കൊട്ടാരക്കര ചക്കുവയ്ക്കൽ വില്ലേജിൽ കൊക്കാട് തടത്തരികത്ത് വീട്ടിൽ പ്രശാന്തിനെ (23) പിടികിട്ടാപ്പുള്ളിയായി പ്രഖ്യാപിച്ച കോടതി ഇയാളെ അറസ്റ്റ് ചെയ്യാനും സ്ഥാവര ജംഗമ സ്വത്തുക്കൾ ജപ്തി ചെയ്യാനുമായി ജാമ്യമില്ലാ അറസ്റ്റ് വാറണ്ടും ജപ്തി വാറണ്ടും പുറപ്പെടുവിച്ചു.

കടത്ത് സംഘത്തിലെ അംഗവും വാഹനം ഓടിക്കുകയും വിൽപനയിൽ ഒന്നാം പ്രതിയെ സഹായിക്കുകയും ചെയ്ത രണ്ടാം പ്രതി പത്തനാപുരം പുനലൂർ വില്ലേജിൽ തൊളിക്കോട് നെടുക്കുന്ന് വീട്ടിൽ സുരേന്ദ്രൻ പിള്ള (56) , സാധുവായ യാതൊരു പ്രമാണങ്ങളുമില്ലാതെ അരിഷ്ടാസവങ്ങൾ വിൽപ്പനയ്ക്കായി കൊടുത്തയച്ച പുനലൂർ വാളക്കോട് എ.ആർ. ഫാർമസ്യൂട്ടിക്കൽസിന്റെ ഉടമയും മൂന്നാം പ്രതിയുമായ വാളക്കോട് കലയനാട് ഷഫീക്ക് മൻസിലിൽ ഷഫീക്ക് (34) എന്നിവരെയാണ് കോടതി ശിക്ഷിച്ചത്.

2008 ആഗസ്റ്റ് 23 ന് തിരുവനന്തപുരം എക്സൈസ് സർക്കിൾ ഇൻസ്പെക്ടർ എ. ശശിശേഖരൻ നായരുടെ നേതൃത്യത്തിൽ നടത്തിയ വാഹന പരിശോധനയിലാണ് കള്ളക്കടത്ത് പിടികൂടിയത്. കഴക്കൂട്ടം - കോവളം ബൈപാസ് റോഡിൽ പെരുനെല്ലി ജംഗ്ഷനിൽ ട്രാഫിക് ലൈറ്റ് ഐലന്റിൽ നിന്ന് ബീമാ പള്ളിക്ക് പോകുന്ന റോഡിൽ വാഹന പരിശോധന നടത്തവേ വൈകിട്ട് 5.15 മണിയോടെ ടാറ്റാ 407 മോഡൽ മിനിലോറിയിൽ കടത്തിയ അരിഷ്ടാസവങ്ങൾ പിടികൂടിയത്.

കെ.എൽ - 25 - 8701 രജിസ്ട്രേഷൻ നമ്പർ വാഹനം പരിശോധിച്ചതിൽ 750 മില്ലി ലിറ്റർ വീതം കൊള്ളുന്ന 12 കുപ്പികൾ വീതം അടങ്ങിയ 44 കാർഡ് ബോർഡ് പെട്ടികളിലായി 528 കുപ്പികളും 500 മി.ലി. കൊള്ളുന്ന 20 കുപ്പികൾ വീതം അടങ്ങിയ മൂന്നു പെട്ടികളിൽ 31 കാർഡ് ബോർഡ് പെട്ടികളിലായി അർജുനാരിഷ്ടം എന്ന ലേബൽ പതിച്ചും 500 മി.ലി. കൊള്ളുന്ന 20 കുപ്പികൾ വീതം അടങ്ങിയ 9 കാർഡ് ബോർഡ് പെട്ടികളിലായി 180 കുപ്പികളിൽ അഭയാരിഷ്ടം എന്ന ലേബൽ പതിച്ചും 500 മി.ലി കൊള്ളുന്ന 20 കുപ്പികൾ വീതം അടങ്ങിയ 3 പെട്ടികളിൽ 60 കുപ്പികളിലായി കുമര്യാസവം എന്ന ലേബൽ പതിച്ചും രേഖകളില്ലാതെ വിൽപ്പനക്കായി കടത്തിക്കൊണ്ടു വന്നതായി കാണപ്പെട്ടു.
തിരുവനന്തപുരം എക്സൈസ് എൻഫോഴ്സ് ആന്റ് ആന്റി നർക്കോട്ടിക് സ്പെഷ്യൽ സ്ക്വാഡ് എക്സൈസ് സർക്കിൾ ഇൻസ്പെക്ടർ വി.രാജാസിംഗാണ് കേസ് അന്വേഷണം നടത്തി കുറ്റപത്രം കോടതിയിൽ സമർപ്പിച്ചത്.
അബ്കാരി നിയമത്തിലെ വകുപ്പ് 56 (ബി) , 1969 ൽ നിലവിൽ വന്ന കേരള സ്പിരിറ്റ് പ്രിപ്പറേഷൻസ് (കൺട്രോൾ) റൂളിലെ 9 , 10 ചട്ടങ്ങൾ എന്നിവ പ്രകാരം കുറ്റക്കാരെന്ന് കണ്ടെത്തിയാണ് പ്രതികളെ കോടതി ശിക്ഷിച്ചത്.