എഴുപതുകളിലും എൺപതുകളിലും തെന്നിന്ത്യയിലെ തന്നെ ഏറ്റവും തിരക്കുള്ള നായികയായിരുന്നു അംബിക. ബാലതാരമായി സിനിമയിലെത്തിയ അംബിക 200 ലേറെ ദക്ഷിണേന്ത്യൻ സിനിമകളിലാണ് നായികയായി അഭിനയിച്ചത്. അംബിക മാത്രമല്ല, ഇളയ സഹോദരി രാധയും സിനിമാപ്രേമികൾക്ക് സുപരിചിതയാണ്.

ഇപ്പോഴിതാ മലയാളികൾ ഉൾപ്പെടെയുള്ള ദക്ഷിണേന്ത്യൻ സിനിമാപ്രേമികളുടെ പ്രിയപ്പെട്ട നടിമാരായ സഹോദരിമാർക്കിടയിൽ വലിയൊരു സാമ്പത്തിക വിവാദം ഉടലെടുത്തിരിക്കുകയാണ്. നടി അംബികയ്ക്കും സഹോദരൻ മല്ലികാർജുന കുഞ്ചൻ നായർക്കുമെതിരെ ഗുരുതര ആരോപണങ്ങളുമായി നടി രാധ ചെന്നൈ സിറ്റി പൊലീസ് കമ്മീഷണർ ഓഫീസിൽ പരാതി നൽകി.

ബിസിനസ് ആവശ്യങ്ങൾക്കായി വീട്ടിൽ സൂക്ഷിച്ചിരുന്ന ഒപ്പിട്ട ബ്ലാങ്ക് ചെക്കുകൾ അനുമതിയില്ലാതെ കൈക്കലാക്കി 46 കോടി രൂപ തട്ടിയെടുത്തു എന്നാണ് രാധയുടെ പ്രധാന പരാതി. അഞ്ച് ചെക്കുകളിലായി 11 ലക്ഷം മുതൽ 27 ലക്ഷം രൂപ വരെയാണ് ഇവർ മാറിയെടുത്തതെന്നും, സഹോദരനായ മല്ലികാർജുനാണ് ഈ ചെക്കുകൾ പൂരിപ്പിച്ച് നൽകിയതെന്നും പരാതിയിൽ വ്യക്തമാക്കുന്നുണ്ട്.

'ARS ഗാർഡൻ സ്റ്റുഡിയോ' എന്ന പേരിലുള്ള ബിസിനസ്സിനായി ഉപയോഗിച്ചിരുന്ന IDBI ബാങ്ക് കറന്റ് അക്കൗണ്ടിന്റെ ചെക്കുകളാണ് നഷ്ടപ്പെട്ടത്. ശമ്പളം, ബില്ലുകൾ തുടങ്ങിയ അത്യാവശ്യ കാര്യങ്ങൾക്കായി ഒപ്പിട്ട് വീട്ടിൽ സൂക്ഷിച്ചിരുന്ന ഈ ചെക്കുകൾ, 2025 ജനുവരിയിൽ ബിസിനസ്സിന്റെ പേര് 'RR ഗാർഡൻസ്' എന്ന് മാറ്റിയതോടെ ഉപയോഗിക്കുന്നത് നിർത്തിയിരുന്നു.

പഴയ ചെക്ക് ബുക്കിനെക്കുറിച്ച് പിന്നീട് മറന്നുപോയെന്നും, എന്നാൽ ഈ ചെക്കുകളിൽ അഞ്ചെണ്ണം അംബികയുടെ പേരിൽ പണമാക്കാൻ നൽകിയതായി കാണിച്ച് സെപ്റ്റംബർ 17-ന് ബാങ്കിൽ നിന്നും സന്ദേശം ലഭിച്ചപ്പോഴാണ് തട്ടിവിവരം അറിയുന്നതെന്നും രാധ പറയുന്നു. തന്റെ അറിവോ സമ്മതമോ ഇല്ലാതെയാണ് സഹോദരങ്ങളും ഈ കബളിപ്പിക്കൽ നടത്തിയതെന്നും പരാതിയിൽ ചൂണ്ടിക്കാണിക്കുന്നു.

ചെക്ക് തട്ടിപ്പിന് പുറമെ, തനിക്ക് അവകാശപ്പെട്ട സ്വത്ത് സംബന്ധമായ രേഖകൾ, സ്വർണാഭരണങ്ങൾ, വിലപിടിപ്പുള്ള മറ്റ് വസ്തുക്കൾ എന്നിവ കൈകാര്യം ചെയ്യുന്നതിൽ നിന്നും അംബികയും മല്ലികാർജുനും തന്നെ ബോധപൂർവ്വം തടയുന്നുണ്ടെന്നും രാധ പൊലീസിന് നൽകിയ പരാതിയിൽ ആരോപിക്കുന്നുണ്ട്. സിനിമാ ലോകത്തെയും ആരാധകരെയും ഒരുപോലെ ഞെട്ടിച്ചിരിക്കുകയാണ് ഈ പുതിയ വാർത്ത.