വിദ്യാര്ത്ഥിനിയെ ഹോംസ്റ്റേയിലെ മുറിയില് മരിച്ച നിലയില് കണ്ടെത്തിയ സംഭവത്തില് സുഹൃത്ത് അറസ്റ്റില്
ഗോഹട്ടിയില് വിദ്യാര്ത്ഥിനിയെ ഹോംസ്റ്റേയിലെ മുറിയില് മരിച്ച നിലയില് കണ്ടെത്തിയ സംഭവത്തില് 26കാരനായ ആണ് സുഹൃത്ത് പൊലീസ് കസ്റ്റഡിയില്. ഗോഹട്ടി സര്വകലാശാലയിലെ 22കാരിയായ സോഷ്യോളജി വിദ്യാര്ത്ഥിനി നിമിഷ ഠാക്കൂറാണ് മരിച്ചത്. സംഭവത്തില് യുവതിയുടെ സുഹൃത്തായ ആസിഫ് അലിയെയാണ് പൊലീസ് കസ്റ്റഡിയിലെടുത്തത്.
ഇന്ന് പുലര്ച്ചെയാണ് നഗരത്തിന്റെ പ്രാന്തപ്രദേശമായ ഗരാലിലെ ഹോംസ്റ്റേയില് ഇരുവരും താമസിച്ചിരുന്ന മുറിയില് നിമിഷയെ അവശനിലയില് കണ്ടെത്തിയത്. യുവതി ആത്മഹത്യ ചെയ്തതാണെന്നാണ് ആസിഫ് പൊലീസിനോട് പറഞ്ഞത്. എന്നാല് ഈ മൊഴി പൊലീസ് പൂര്ണമായി വിശ്വസിച്ചിട്ടില്ലെന്നും കൊലപാതകമാണോയെന്ന സംശയത്തില് അന്വേഷണം തുടരുകയാണെന്നും ഗോഹട്ടി വെസ്റ്റ് ഡെപ്യൂട്ടി കമ്മിഷണര് ഒഫ് പൊലീസ് (ഡി.സി.പി) ബോലിന് ദേവോരി പറഞ്ഞു.
യുവതിയുടെ മൃതദേഹത്തില്നിന്നോ മുറിയിലെ തറയില്നിന്നോ രക്തത്തിന്റെ പാടുകള് കണ്ടെത്തിയിട്ടില്ലെന്നും പൊലീസ് വ്യക്തമാക്കി. പോസ്റ്റുമോര്ട്ടം റിപ്പോര്ട്ട് ലഭിച്ച ശേഷമേ മരണകാരണം സംബന്ധിച്ച് കൂടുതല് വ്യക്തത ലഭിക്കൂ. സംഭവത്തില് ഹോംസ്റ്റേ ഉടമ, ജീവനക്കാര്, കെയര്ടേക്കര്മാര് എന്നിവരില്നിന്ന് പൊലീസ് മൊഴിയെടുക്കുകയാണ്. മരണത്തിന്റെ യഥാര്ത്ഥ കാരണം കണ്ടെത്തുന്നതിനായി അന്വേഷണം തുടരുകയാണെന്ന് പൊലീസ് അറിയിച്ചു.
സംഭവത്തില് നിര്ണായകമായേക്കാവുന്ന ചില വിവരങ്ങള് കുടുംബസുഹൃത്ത് പൊലീസിനെ അറിയിച്ചിട്ടുണ്ട്. വീട്ടില്നിന്ന് സുഹൃത്തിന്റെ വീട്ടിലേക്ക് പോകുന്നുവെന്നാണ് നിമിഷ കുടുംബത്തോട് പറഞ്ഞിരുന്നത്. രാത്രി രണ്ടുമണിയോടെ അമ്മയെ ഫോണില് വിളിച്ച് നിമിഷ കരഞ്ഞുകൊണ്ട് 'അവര് എന്നെ കൊല്ലും, അമ്മേ' എന്ന് പറഞ്ഞതായാണ് കുടുംബസുഹൃത്ത് ഗൗതം ദാസ് പറയുന്നത്.
തുടര്ന്ന് നിമിഷയുടെ ഫോണ് മറ്റാരോ പിടിച്ചെടുത്തിരിക്കാമെന്നും അദ്ദേഹം ആരോപിച്ചു. എന്നാല് ഇക്കാര്യം പൊലീസ് അന്വേഷിച്ചുവരികയാണ്. നിമിഷയുടെ മാതാപിതാക്കള് പിന്നീട് സമീപത്തെ അസാര പൊലീസ് സ്റ്റേഷനിലെത്തി വിവരം അറിയിച്ചതായും ഗൗതം ദാസ് പറഞ്ഞു. ഇതിനിടെ ഒരു ആരോഗ്യകേന്ദ്രത്തില് പെണ്കുട്ടിയെ അബോധാവസ്ഥയില് പ്രവേശിപ്പിച്ചെന്ന വിവരം പൊലീസിന് ലഭിച്ചു. തുടര്ന്ന് ഗോഹട്ടി മെഡിക്കല് കോളേജിലേക്ക് മാറ്റിയെങ്കിലും ഡോക്ടര്മാര് മരണം സ്ഥിരീകരിച്ചു.
അതേസമയം ഹോംസ്റ്റേയിലെ പാചകക്കാരനും കെയര്ടേക്കറുമായ ബിപുല് ബൈലുംഗ് ഒരു പുരുഷന് രാത്രി നിലവിളിക്കുന്ന ശബ്ദം കേട്ടതായി പൊലീസിനോട് പറഞ്ഞിട്ടുണ്ട്. 'ദാദാ, ഉഠോ, ഉഠോ' (സഹോദരാ, എഴുന്നേല്ക്കൂ, എഴുന്നേല്ക്കൂ) എന്ന് ഒരാള് വിളിച്ചുപറയുന്നതാണ് കേട്ടതെന്നാണ് ബൈലുംഗ് പറയുന്നത്. തുടര്ന്ന് സഹപ്രവര്ത്തകരെ വിളിച്ച് പുറത്തേക്ക് പോയെങ്കിലും ആരെയും കണ്ടില്ലെന്നും അദ്ദേഹം പറഞ്ഞു.
പിന്നീട് മടങ്ങിയെത്തിയപ്പോള് കരച്ചില് കേട്ടതായും ശബ്ദം കേട്ട മുറിയിലേക്ക് പോയപ്പോള് യുവാവ് യുവതിയെ കൈയില് പിടിച്ചുനില്ക്കുന്നതും യുവതി തറയില് കിടക്കുന്നതുമാണ് കണ്ടതെന്നും ബൈലുംഗ് വ്യക്തമാക്കി. തുടര്ന്ന് ഹോംസ്റ്റേ ഉടമകളെ വിവരമറിയിക്കുകയും ആംബുലന്സ് വിളിക്കുകയും ചെയ്തു. ഇരുവരും പത്താം നമ്പര് മുറിയാണ് ബുക്ക് ചെയ്തിരുന്നതെന്നും ഒമ്പതാം നമ്പര് മുറി ഒഴിഞ്ഞുകിടന്നതിനാല് അതും ഉപയോഗിച്ചിരുന്നതായും ഹോംസ്റ്റേ ജീവനക്കാര് പറഞ്ഞു. ഇരുവരും മുമ്പും ഇവിടെ താമസിച്ചിട്ടുണ്ടെന്നും ജീവനക്കാര് വ്യക്തമാക്കി.
https://www.facebook.com/Malayalivartha
