ഹെല്മറ്റില്ലാതെ യാത്ര, വാഹനം തടഞ്ഞ ഗതാഗതവകുപ്പ് ഉദ്യോഗസ്ഥര് ഞെട്ടി... സ്കൂട്ടറോടിക്കുന്ന യാത്രക്കാരിയ്ക്ക് മുന്നില് ഉള്ള, സ്കൂട്ടറിന്റെ പ്ലാറ്റ്ഫോമില് ഒരു കൊച്ചുകുഞ്ഞ്...!
ഓടിക്കുന്നയാളുടെ ബാലന്സില് മാത്രം മറിയാതെ ഓടുന്ന ഇരുചക്ര വാഹന യാത്ര വാസ്തവത്തില് ഒരു ഞാണിന്മേല്കളി തന്നെയാണ്. അപ്പോള് ഇത്തിരിപ്പോന്ന സ്കൂട്ടറിന്റെ മുന്നിലെ പ്ലാറ്റ്ഫോമില് ഒരുകൊച്ചുകുഞ്ഞിനെ ഇരുത്തി യാത്ര ചെയ്താലോ! ഇത്തരത്തിലൊരു ഞെട്ടിക്കുന്ന കാഴ്ച മോട്ടോര്വാഹനവകുപ്പ് ഉദ്യോഗസ്ഥര്ക്ക് കാണേണ്ടിവന്നു. കോട്ടയത്തു നിന്നാണ് ഈ കാഴ്ച.
ഹെല്മറ്റില്ലാതെ വന്ന യാത്രക്കാരിയെ മോട്ടോര്വാഹന വകുപ്പിന്റെ പ്രത്യേകസംഘം തടഞ്ഞുനിര്ത്തി. നഗരത്തിലെ സ്കൂളില് കുട്ടിയെ വിട്ടിട്ട് വരുന്ന ആ യാത്രക്കാരിയുടെ സ്കൂട്ടറില് കണ്ട കാഴ്ച അവരെ ഞെട്ടിച്ചുകളഞ്ഞു. ആക്ടീവ സ്കൂട്ടറിന്റെ പ്ലാറ്റ്ഫോമില് ഒരു കൊച്ചു കുഞ്ഞ് ഇരിക്കുന്നു. നിയമങ്ങള് കാറ്റില്പറത്തി ഹെല്മറ്റ് പോലും ധരിക്കാതെ യാത്രചെയ്തതിനു പുറമേയാണ് കുഞ്ഞിന്റെ ജീവന് പോലും അപകടത്തിലാക്കുന്ന തരത്തിലുള്ള ഈ സാഹസികത!
സ്കൂട്ടര് ഒന്നു വെട്ടിക്കുകയോ വളവില് തിരിയുകയോ ചെയ്താല് നിലത്തിരിക്കുന്ന കുഞ്ഞ് തെറിച്ചുവീഴാനുള്ള സാധ്യത ഏറെയാണ്. നാലുവയസുള്ള കുഞ്ഞിനെ പോലും ഹെല്മറ്റ് ധരിപ്പിച്ച് സുരക്ഷിതമാക്കാന് അധികൃതര് ആവശ്യപ്പെടുമ്പോഴാണ് അതിലും ചെറിയ കുഞ്ഞിനെ യാതൊരു സുരക്ഷാ മാനദണ്ഡങ്ങളും പാലിക്കാതെ അപകടകരമായ രീതിയില് ഇവര് കൊണ്ടുപോയത്. മോട്ടോര് വാഹനവകുപ്പ് ഉദ്യോഗസ്ഥര് തന്നെയാണ് ഈ ചിത്രം പകര്ത്തിയത്.
ഗതാഗതനിയമങ്ങള് പാലിക്കേണ്ടതിന്റെ ആവശ്യകതയെക്കുറിച്ചും അവയുടെ സുരക്ഷാപരമായ പ്രാധാന്യത്തെക്കുറിച്ചും സര്ക്കാരും ഗതാഗതവകുപ്പും പോലീസും നിരവധി ബോധവത്കരണങ്ങളും നടത്തുന്നുണ്ട്. നല്ലൊരു ശതമാനം ജനങ്ങളും റോഡ് നിയമങ്ങള് പാലിക്കുമ്പോഴും കുറച്ചുപേര് അത് കണ്ടില്ലെന്നു നടിക്കുകയാണ്. ഗതാഗത നിയമലംഘനങ്ങളുടെ പിഴ ഉയര്ത്തിയതും ഇരുചക്രവാഹനങ്ങളിലെ പിന്സീറ്റ് യാത്രികര്ക്ക് ഹെല്മറ്റ് നിര്ബന്ധമാക്കിയതും അടുത്തിടെയാണ്.
സ്വന്തം സുരക്ഷ മാത്രമല്ല, ഒപ്പമുള്ളവരുടെ ജീവനുപോലും വില കല്പിക്കാതെയാണ് പലരുടെയും യാത്ര. റോഡ് സുരക്ഷ ഉറപ്പുവരുത്താന് സര്ക്കാരിനും പോലീസിനും മാത്രമല്ല പൊതുജനങ്ങള്ക്കും ബാധ്യതയുണ്ട്. റോഡ് നിയമങ്ങള് നമ്മുടെ സുരക്ഷയ്ക്കു വേണ്ടിയുള്ളതാണ്. അത് കാറ്റില്പറത്തിയുള്ള ഇത്തരം സാഹസികയാത്രകള് നാം ഒഴിവാക്കുക തന്നെ വേണം.
https://www.facebook.com/Malayalivartha
