പ്രതിപക്ഷ നേതാവും മുഖ്യമന്ത്രിയും തമ്മിലുള്ള സ്നേഹ ബന്ധത്തിന്റെ വിശദാംശങ്ങൾ കണ്ടെത്താൻ കെ പി സി സി സി ഐ ഡിയെ നിയമിക്കാൻ ആലോചിക്കുന്നു. ഭരണം തീരാൻ ഒന്നര കൊല്ലം അവശേഷിക്കുമ്പോൾ സർക്കാരും പ്രതിപക്ഷവും ഭായ്- ഭായ് കളിക്കുന്നതിന്റെ രഹസ്യം കണ്ടെത്താനാണ് പുതിയ നീക്കം!

ഫലത്തിൽ ഇടതുപക്ഷവുമായി ചേർന്ന് സമരം ചെയ്ത രമേശ് ചെന്നിത്തല യു ഡി എഫിൽ ഒറ്റപ്പെട്ടു. അദ്ദേഹത്തിന്റെ മുഖ്യമന്ത്രി മോഹത്തെ പോലും ബാധിക്കുന്ന തരത്തിലാണ് കാര്യങ്ങൾ നീങ്ങുന്നത്. രക്ഷസാക്ഷി മണ്ഡപത്തിലെ സമരത്തിന് കോൺഗ്രസോ യുഡിഎഫുമായോ യാതൊരു ബന്ധവുമില്ലെന്നും അത് സർക്കാരും നിയമസഭാ കക്ഷികളും നടത്തിയ പ്രക്ഷോഭമാണെന്നും യു ഡി എഫ് കൺവീനർ ബെന്നി ബഹനാൻ പറഞ്ഞത് ചെന്നിത്തലക്കുള്ള താക്കീതാണ്. പിണറായി - രമേശ് ചെന്നിത്തല അച്ചുതണ്ടിനെ തകർക്കണമെന്നാണ് കോൺഗ്രസ് നേതാക്കളുടെ തീരുമാനം.

ഇടതുപക്ഷവുമായി ചേര്‍ന്ന് ഒരു സമരത്തിനും കോണ്‍ഗ്രസ് തയ്യാറല്ലെന്ന് പറഞ്ഞ് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ ക്ഷുഭിതനായി . ദേശീയതലത്തില്‍ ഫാസിസ്റ്റ് ശക്തികളെ ശക്തമായി പ്രതിരോധിക്കുന്ന പ്രസ്ഥാനം കോണ്‍ഗ്രസ് മാത്രമാണ്. ഫാസിസ്റ്റ് ശക്തികള്‍ക്കെതിരെ കോണ്‍ഗ്രസ് നടത്തിയ പോരാട്ടങ്ങളില്‍ നിന്ന് കേരളത്തിലെ സി.പി.എം നാളിതുവരെ ഒളിച്ചോടുകയായിരുന്നു. രാഹുല്‍ ഗാന്ധിയുടെ നേതൃത്വത്തില്‍ ഫാസിസ്റ്റ് വിരുദ്ധ പോരാട്ടത്തിനായി ജനാധിപത്യ മതേതരചേരിയുണ്ടാക്കാന്‍ കഴിഞ്ഞ ലോക്സഭാ തെരഞ്ഞെടുപ്പുകാലത്ത് ശ്രമിച്ചപ്പോള്‍ അതിനെ അട്ടിമറിച്ചത് സി.പി.എം കേരളഘടകത്തിലെ നേതാക്കളാണ്. മുഖ്യമന്ത്രിയുടെ നേതൃത്വത്തില്‍ കേരളത്തിലെ പി.ബി., കേന്ദ്ര കമ്മിറ്റി അംഗങ്ങളാണ് ദേശീയ അടിസ്ഥാനത്തിലുള്ള മതേതര ജനാധിപത്യ വേദി തകര്‍ത്തതെന്ന് മുല്ലപള്ളി പറഞ്ഞു.

സി.പി.എമ്മിന്റെ ന്യൂനപക്ഷ പ്രേമം കാപട്യവും ആത്മാര്‍ത്ഥയില്ലാത്തതുമാണെന്നാണ് കോൺഗ്രസ് നേതാക്കളുടെ കണ്ടെത്തൽ. ന്യൂനപക്ഷ വോട്ടില്‍ കണ്ണുവച്ചുള്ള ഒരു പ്രഹസനം മാത്രമാണിത്. ബീഫ് നിരോധനവുമായി ബന്ധപ്പെട്ട് ബീഫ് മേളകള്‍ നടത്തിയപ്പോള്‍ ന്യൂനപക്ഷവിഭാഗങ്ങള്‍ ഇവരുടെ കള്ളക്കളി തിരിച്ചറിഞ്ഞിട്ടുണ്ട്.

യു.എ.പി.എ കരിനിയമമാണെന്ന് രാജ്യസഭയില്‍ ഘോരഘോരം പ്രസംഗിച്ച നേതാവാണ് സീതാറാം യെച്ചൂരി. ആ കരിനിയമം ഉപയോഗിച്ച് നിയമവിരുദ്ധമായി രണ്ട് മുസ്ലീം യുവാക്കളെ തടങ്കലില്‍ പാര്‍പ്പിച്ചിരിക്കുന്നത് എന്തിനാണെന്ന് മുല്ലപ്പള്ളി ചോദിച്ചു. അവര്‍ ചെയ്ത കുറ്റം എന്താണെന്ന് സര്‍ക്കാരും സി.പി.എമ്മും ഇതുവരെ വിശദീകരിച്ചിട്ടില്ല. ആര്‍.എസ്.എസിനോടും ബി.ജെ.പിയോടും മൃദുഹിന്ദുത്വ സമീപനമാണ് മുഖ്യമന്ത്രി സ്വീകരിക്കുന്നത്. മുസ്ലീം തീവ്രവാദമാണ് കേരളത്തിലെ മുഖ്യപ്രശ്നമെന്ന രൂപത്തില്‍ വിശ്വസ്തരെ കൊണ്ട് മുഖ്യമന്ത്രി കോഴിക്കോട് പ്രസ്താവന നടത്തിയത് അതിന് ഒടുവിലത്തെ ഉദാഹരമാണ്. ഉത്തരമലബാറില്‍ സി.പി.എം. നടത്തിയ രാഷ്ട്രീയ കൊലപാതകങ്ങളിലെ ഇര ഏറിയകൂറും മുസ്ലീം വിഭാഗത്തിലെ യുവാക്കളാണ്. ന്യൂനപക്ഷത്തെ ഉപയോഗിച്ച് നടത്തുന്ന ഈ വോട്ടുബാങ്ക് രാഷ്ട്രീയം ഇനി കേരളത്തില്‍ വിലപ്പോകില്ലെന്നും മുല്ലപ്പള്ളി ചൂണ്ടിക്കാട്ടി.

മാവോയിസ്റ്റ് വിഷയത്തിൽ ഉൾപ്പെടെ പ്രതിപക്ഷ നേതാവിന് സർക്കാരിനെതിരെ ചെറുവിരൽ അനക്കാൻ കഴിഞ്ഞില്ലെന്നാണ് കോൺഗ്രസ് നേതാക്കൾ പറയുന്നത്. പ്രതിപക്ഷ നേതാവ് തീർത്തും പരാജയമാണെന്ന് നേതാക്കൾ ആവർത്തിക്കുന്നു. ഇക്കാര്യം ഇത്രയും കാലം ആരും തുറന്നു പറഞ്ഞിരുന്നില്ല. എന്നാൽ ഇപ്പോൾ ചെന്നിത്തലക്കെതിരെ നീക്കം ശക്തമാക്കുകയാണ് കോൺഗ്രസ് നേതാക്കൾ.

എന്നാൽ ചെന്നിത്തലയെ പോലൊരു ശുദ്ധ ഹൃദയനെ ചിലർ ദുരൂപയോഗം ചെയ്യുകയാണെന്നും അദ്ദേഹം വെട്ടിൽ അറിയാതെ വീഴുകമാണെന്നും വിശ്വസിക്കുന്ന നേതാക്കളും കോൺഗ്രസിൽ ധാരാളമുണ്ട്.