കോട്ടയം ഏറ്റുമാനൂര്‍ പട്ടിത്താനം സ്വദേശി ചെരുവില്‍ ജയകുമാര്‍ അറസ്റ്റിലാകുമ്പോള്‍ പുറത്താകുന്നത് വലിയൊരു തട്ടിപ്പാണ്. ഒരു കോടി രൂപ കൊടുത്താല്‍ ഒന്ന് മുപ്പതാക്കി തിരിച്ചുതരുന്ന മാന്ത്രിക വിദ്യയാണ് ജയകുമാറിനെ പ്രശസ്തിയിലാക്കിയത്. ഇത് വിശ്വസിച്ച് ജയകുമാറിന്റെ പട്ടിത്താനത്തെ വീട്ടിലെത്തിയ പണച്ചാക്കുകള്‍ അന്ധാളിക്കുന്ന കാഴ്ചകളാണ് കാണുന്നത്. വീട്ടുമുറ്റത്ത് ബെന്‍സ് കാറുകളുടെ നീണ്ട നിര.
ചൈതന്യം നിറയുന്ന ചെറിയൊരു അമ്പലം. വീടും അമ്പലവുമെല്ലാം ടിന്‍ ഷീറ്റുകൊണ്ട് 15 അടി ഉയരത്തില്‍ മറച്ചിട്ടുണ്ട്. ചുറ്റിലും സി.സി ടി.വി നിരീക്ഷണവും. മലയാളവും ഇംഗ്ലീഷും തമിഴും പച്ചവെള്ളം പോലെ സംസാരിക്കുന്ന വെറും ഒന്‍പതാം ക്ലാസുകാരനായ ജയകുമാര്‍ നിറപുഞ്ചിരിയോടെ ആള്‍ക്കാരെ സ്വീകരിക്കും. ആറ് അടി പൊക്കം. പൊലീസ് ഓഫീസറെ വെല്ലുന്ന ആകാരവടിവ്. സിനിമാനടനെ വെല്ലുന്ന മേക്കപ്പ്. വിലകൂടിയ വസ്ത്രങ്ങള്‍. 40 പവന്റെ സ്വര്‍ണ്ണമാല. ആരും വീണുപോകുമെന്ന് സാരം.

എന്നാല്‍ ഈ പകിട്ടുകാണിച്ച് പലരില്‍ നിന്നായി ജയകുമാര്‍ തട്ടിയത് കോടികളെന്നാണ് പുറത്തുവരുന്ന റിപ്പോര്‍ട്ട്. എറണാകുളം സ്വദേശിനിയുടെ പരാതിയാണ് എല്ലാം മാറ്റി മറിച്ചത്. ക്രൈം ഡിറ്റാച്ച്‌മെന്റ് ഡിവൈ.എസ്.പി ഗിരീഷ് പി. സാരഥിയും സംഘവും ഇയാളുടെ പട്ടിത്താനത്തെ വീട്ടിലെത്തുമ്പോള്‍ ജയകുമാറിനെ മുഖംകാണിക്കാന്‍ എത്തിയവരുടെ നീണ്ട നിരയായിരുന്നു. പൊലീസിനെ കണ്ടിട്ടും ഒട്ടും പതറാതെ നിന്ന ജയകുമാര്‍ എന്തുണ്ട് വിശേഷങ്ങള്‍ എന്നു ചോദിച്ചായിരുന്നു ഡിവൈ.എസ്.പിയെ എതിരേറ്റത്. ഡിവൈ.എസ്.പിയും ജയകുമാറിനെ കാണാനാണ് എത്തിയതെന്നാണ് കൂടിനിന്നവര്‍ കരുതിയത്. എന്നാല്‍ ജയകുമാറിന്റെ കൈയില്‍ വിലങ്ങുവീഴാന്‍ അധികനേരം വേണ്ടിവന്നില്ല. വിലങ്ങുമായി ജീപ്പില്‍ കയറ്റുമ്പോള്‍ കാര്യമെന്തന്നറിയാതെ അവര്‍ പകച്ചുനിന്നു. പിന്നീടാണ് അറിയുന്നത് ഇയാള്‍ ലോക തട്ടിപ്പുകാരനാണെന്ന്.

തമിഴ്‌നാട്ടിലെ ചില മന്ത്രിമാരുടെയും ഗവ.സെക്രട്ടറിമാരുടെയും പക്കല്‍ കണക്കില്‍പ്പെടാത്ത കോടിക്കണക്കിന് പണമുണ്ടെന്നും ഇത് വെളുപ്പിക്കലാണ് ലക്ഷ്യമെന്നും പറഞ്ഞാണ് ബിസിനസുകാരില്‍ നിന്നും ഐ.ടി മേഖലയിലുള്ളവരില്‍ നിന്നും പണം സ്വീകരിച്ചിരുന്നത്. എറണാകുളം സ്വദേശിനിയില്‍ നിന്ന് 1.30 കോടി രൂപ വാങ്ങിയത് തിരികെ നല്കാമെന്ന വാഗ്ദാനത്തിലാണ്. പണവുമായി സ്ത്രീ പട്ടിത്താനത്തുള്ള വസതിയില്‍ എത്തി. അത് വാങ്ങി വച്ചശേഷം കൊടുക്കാനുള്ള 1.3 കോടി രൂപ എടുത്തുകൊണ്ടു വരാന്‍ അവിടെയുണ്ടായിരുന്ന കിങ്കരനോട് പറഞ്ഞു. അകത്തേക്ക് പോയ ഇയാള്‍ തിരിച്ചെത്തി പണം തികയില്ലെന്നും ഉത്തമപാളയത്തിലെ ഗോഡൗണില്‍ നിന്ന് പണം കൊണ്ടുവരാമെന്നും പറഞ്ഞു. ഇതേതുടര്‍ന്ന് ജയകുമാറും സംഘവും ഒരു കാറിലും സ്ത്രീയും ഒപ്പമുണ്ടായിരുന്നവരും മറ്റൊരു കാറിലും യാത്രപുറപ്പെട്ടു. ഞങ്ങളുടെ വാഹനത്തെ പിന്തുടര്‍ന്നാല്‍ മതിയെന്നായിരുന്നു സ്ത്രീയോട് ജയകുമാര്‍ പറഞ്ഞിരുന്നത്.ഇതനുസരിച്ച് സംഘം യാത്ര പുറപ്പെട്ടു.

ഉത്തമപാളയത്തെത്തിയപ്പോള്‍ വാഹനം നിറുത്തി. സ്ത്രീയെയും കൂട്ടരേയും ഒരു ഹോട്ടല്‍ കാണിച്ചിട്ട് അവിടെ വിശ്രമിക്കാന്‍ പറഞ്ഞു. തുടര്‍ന്ന് ഗോഡൗണില്‍ നിന്നും പണമെടുക്കാന്‍ ജയകുമാറും സംഘവും പോയി. മണിക്കൂറുകള്‍ കഴിഞ്ഞിട്ടും അവര്‍ തിരികെ വന്നില്ല. ഇതേത്തുടര്‍ന്ന് സ്ത്രീയും സംഘവും ഏറ്റുമാനൂരിലെ വീട്ടിലെത്തി കാര്യങ്ങള്‍ ചോദിച്ചപ്പോള്‍ ജയകുമാറിന്റെ ഗുണ്ടകള്‍ ഭീഷണിപ്പെടുത്തി പറഞ്ഞുവിട്ടു. ജീവനില്‍ ഭയംതോന്നിയ സ്ത്രീ ജില്ലാ പൊലീസ് മേധാവി പി.എസ്. സാബുവിന് പരാതി നല്‍കി. തുടര്‍ന്നാണ് െ്രെകം ഡിറ്റാച്ച്‌മെന്റ് ഡിവൈ.എസ്.പി കേസ് അന്വേഷിച്ചതും ജയകുമാറിനെ കൈയോടെ പൊക്കിയതും. നാട്ടിലും മറുനാട്ടിലും ഏജന്റുമാര്‍തമിഴ്‌നാട്ടിലും കേരളത്തിലും ഏജന്റുമാരെ നിയമിച്ചാണ് ജയകുമാര്‍ തട്ടിപ്പിന് കളമൊരുക്കിയത്.

കമ്പം, ഉത്തമപാളയം എന്നിവിടങ്ങളിലെ ഗോഡൗണുകളില്‍ കോടിക്കണക്കിന് പണം സ്വരൂപിച്ച് വച്ചിട്ടുണ്ടെന്നും തമിഴ്‌നാട്ടിലെ ചില മന്ത്രിമാരുടെ കണക്കില്‍പ്പെടാത്ത പണമാണ് ഇങ്ങനെ പെരുപ്പിച്ചുതരുന്നതെന്നുമാണ് അവര്‍ പറഞ്ഞിരുന്നത്. പണവുമായി എത്തുന്നവരെ കാണാന്‍ ആദ്യമൊന്നും ജയകുമാര്‍ കൂട്ടാക്കിയിരുന്നില്ല. പിന്നീട് വരാന്‍ പറഞ്ഞ് തിരിച്ചയ്ക്കും. ഇതോടെ ഇവരുമായി എത്തുന്ന ഏജന്റുമാര്‍ എങ്ങനെയും പണം വാങ്ങണമെന്നും ഒരാഴ്ച കഴിഞ്ഞ് കൊടുത്താല്‍ മതിയെന്നും ജയകുമാറിനോട് കേണപേക്ഷിക്കും. ഇതോടെ ജയകുമാറിന്റെ മനസ് മാറും പട്ടിത്താനത്തെ വീട്ടില്‍ എത്ര പണമുണ്ടെന്നാവും അടുത്തചോദ്യം. പണം തികയില്ല, ഉള്ളപണം നല്കിയിട്ട് പോ. അടുത്തയാഴ്ച പണം തമിഴ്‌നാട്ടിലെ ഗോഡൗണില്‍ നിന്ന് കൊണ്ടുവന്ന് തരാം എന്നുപറഞ്ഞ് തിരിച്ചയയ്ക്കും. പറ്റിക്കപ്പെട്ട പലരും നല്‍കിയ പരാതിയിലാണ് ഇപ്പോള്‍ കുടുങ്ങിപ്പോയത്.

42 വയസായെങ്കിലും വിവാഹം കഴിച്ചിട്ടില്ല. യുവതിയായ ഒരു സ്ത്രീ ഇയാളോടൊപ്പം പട്ടിത്താനത്തെ വീട്ടിലുണ്ട്. തമിഴ്‌നാട്ടിലെ കോളേജ് പ്രൊഫസറാണ് ഈ സ്ത്രീയെന്നാണ് ജയകുമാര്‍ പലരോടും പറഞ്ഞിരിക്കുന്നത്. കൂടാതെ തമിഴ്‌നാട്ടിലെ മറ്റു ചില സ്ത്രീകളുമായും ഇയാള്‍ക്ക് ബന്ധമുണ്ട്. ഇയാളുടെ വീട്ടുമുറ്റത്ത് ഉണ്ടായിരുന്ന കാറുകളെല്ലാം വാടകയ്ക്ക് എടുത്തവയാണെന്നും കഴുത്തിലെ മാല മുക്കുപണ്ടമാണെന്നും പൊലീസ് കണ്ടെത്തിയിട്ടുണ്ട്. ജയകുമാറിനെ റിമാന്‍ഡ് ചെയ്ത് കോട്ടയം സബ് ജയിലിലാക്കി.