ഇരിങ്ങാലക്കുടയിലെ കൊലപാതകം; ഒന്നര മാസം കഴിഞ്ഞിട്ടും കൊലയാളിയെ കണ്ടെത്താനാകാതെ പൊലീസ്
ഒന്നര മാസം മുമ്പ് ഇരിങ്ങാലക്കുടയില് ആലിസ് എന്ന വീട്ടമ്മയെ പട്ടാപകല് കഴുത്തറത്ത് കൊല്ലപ്പെടുത്തിയ കേസില് ഇതുവരേയും കൊലയാളിയെ തിരിച്ചറിയാന് പൊലീസിന് കഴിഞ്ഞില്ല. മുന്നൂറോളം പേരെ ചോദ്യംചെയ്തെങ്കിലും കൊലയാളി ആരാണെന്ന് കണ്ടെത്താന് കഴിയാത്തത് പൊലീസിന് വെല്ലുവിളിയായി.
ഇരിങ്ങാലക്കുട ഈസ്റ്റ് കോമ്പാറയിലെ വീട്ടമ്മയെ കൊന്ന കൊലയാളിയെക്കുറിച്ച് പലതരത്തിലുള്ള ഊഹാപോഹങ്ങളാണ് നാട്ടില് പ്രചരിച്ചത്. ഇതരസംസ്ഥാന തൊഴിലാളിയാകാം കൊലയാളിയെന്ന് ഭൂരിഭാഗം പേരും പൊലീസും സംശയിച്ചു. എന്നാല് സൈബര് സെല്ലിന്റെ അന്വേഷണത്തില് ഇതരസംസ്ഥാന തൊഴിലാളിയുടെ സാന്നിധ്യം കണ്ടെത്താനായില്ല. സ്വര്ണം തട്ടിയെടുക്കാന് നടത്തിയ കൊലപാതകമാണെന്ന് സംശയിക്കുന്നു.
രണ്ടു ലക്ഷം ഫോണ് കോളുകള് പൊലീസ് പരിശോധിച്ചു. കൊലയാളിയുടേതെന്ന് സംശയിക്കുന്ന ഒരു നമ്പറും കിട്ടിയില്ല. സംശയിക്കുന്ന എട്ടു പേരെ പ്രത്യേക കൗണ്സിലര്മാരെ വരുത്തി ചോദ്യംചെയ്തുവെങ്കിലും വഴിത്തിരിവുണ്ടായില്ല.
ആരും അന്ന് പകല് സമയത്ത് അപരിചിതരെ ആ പ്രദേശത്ത് കണ്ടിട്ടില്ല. ആകെ, ആ സമയത്തു കണ്ടതാകട്ടെ ഒരു കര്ട്ടണ് പണിക്കാരനെ. ഈ കര്ട്ടണ് പണിക്കാരനെ പൊലീസ് വിളിച്ചുവരുത്തി ചോദ്യംചെയ്ത് വിട്ടയച്ചു. ഇതരസംസ്ഥാന തൊഴിലാളികള്ക്കു പുറമെ പരിചയക്കാര് , നാട്ടുകാര് തുടങ്ങി ഒട്ടേറെ പേരെ മണിക്കൂറുകളോളം ചോദ്യംചെയ്തു.
ഒറ്റയ്ക്കു താമസിച്ചിരുന്ന ആലീസിനെ കരുതിക്കൂട്ടി വകവരുത്തിയ ശേഷം സ്വര്ണം തട്ടിയെടുത്തെന്നാണ് സംശയം. ഈ സ്വര്ണം തൃശൂര് ജില്ലയിലെ ഏതെങ്കിലും ധനകാര്യ സ്ഥാപനത്തില് പണയപ്പെടുത്തുകയോ ജ്വല്ലറികളില് വില്ക്കുകയോ ചെയ്തിട്ടില്ല. പരമ്പരാഗത രീതിയില് പൊലീസ് അന്വേഷണം നടത്തി. എന്നിട്ടും, കൊലയാളിയെ തിരിച്ചറിഞ്ഞില്ല. ശാസ്ത്രീയമായ അന്വേഷണങ്ങള് നടത്തി നോക്കി. എന്നിട്ടും രക്ഷയില്ല. ഇനി ക്രൈംബ്രാഞ്ചിന് കേസ് കൈമാറാനുള്ള ആലോചനയിലാണ് ലോക്കല് പൊലീസ്.
https://www.facebook.com/Malayalivartha