തൃശൂര്‍ മണ്ണുത്തിയിലെ ഡോക്ടറുടെ വീട്ടില്‍ പുലര്‍ച്ചെ അതിക്രമിച്ചു കയറി, കുടുംബാംഗങ്ങളെ ബന്ദിയാക്കി മുപ്പത്തി രണ്ടു പവന്‍ കവര്‍ന്ന നാലംഗ സംഘത്തിലെ പ്രധാനി രാജശേഖറെ തമിഴ്‌നാട് പൊലീസ് ഈയിടെ പിടികൂടിയിരുന്നു. മണ്ണുത്തി കവര്‍ച്ചാക്കേസ് അന്വേഷിക്കുന്ന പൊലീസ് തമിഴ്‌നാട് കോടതിയില്‍ നിന്ന് രാജശേഖറെ കസ്റ്റഡിയില്‍ വാങ്ങി തൃശൂരില്‍ എത്തിച്ചു.

കവര്‍ച്ച നടന്ന മണ്ണുത്തിയിലെ വീട്ടിലേക്ക് രാജശേഖറെ പൊലീസ് കൊണ്ടുവന്നു. ഇംഗ്ലിഷില്‍ സംസാരിച്ച കള്ളന്‍ ഇതാണെന്ന് ഡോക്ടറും ഭാര്യയും പൊലീസിനോട് വെളിപ്പെടുത്തി. അതേസമയം, ഡോക്ടറുടെ മകന്‍ പേടിച്ചു വിരണ്ടു. ''ഇയാളെ വേഗം വീട്ടില്‍ നിന്ന് കൊണ്ടുപോകൂ''. മകന്‍ പൊലീസിനോട് പറഞ്ഞു.

കവര്‍ച്ച നടത്തിയ നാലംഗ സംഘത്തിലെ പ്രധാനിയാണ് രാജശേഖര്‍. സേലം സ്വദേശി. പത്താം ക്ലാസാണ് വിദ്യാഭ്യാസ യോഗ്യത. ഭംഗിയായി ഇംഗ്ലിഷ് സംസാരിക്കും. ഡോക്ടറോടും ഭാര്യയോടും അമ്മയോടും നല്ല ഇംഗ്ലിഷിലാണ് രാജശേഖര്‍ അന്നു സംസാരിച്ചത്. പൊലീസിനോട് സംസാരിക്കുന്നതും നല്ല ഒഴുക്കുള്ള ഇംഗ്ലിഷ് ഭാഷയിലായിരുന്നു.

2010-ല്‍ ചില്ലറ കളവില്‍ തുടങ്ങി. 2012-ലും 2015-ലും പിടിച്ചുപറി നടത്തി. പത്തു പേര്‍ ചേര്‍ന്ന് 24 ലക്ഷം രൂപ പിടിച്ചുപറി നടത്തിയ കേസില്‍ ശിക്ഷിക്കപ്പെട്ടു. പിന്നെ, വീണ്ടും അടിപിടി കേസില്‍ അകപ്പെട്ടു. അടിപിടി കേസിന്റെ വിചാരണയ്ക്കായി കോടതിയില്‍ വന്നപ്പോള്‍ പഴയൊരു കള്ളനെ കണ്ടു. ജയിലിലെ സഹതടവുകാരനായിരുന്നു മാരിയപ്പന്‍. കവര്‍ച്ച നടത്താന്‍ കഴിവുള്ള മൂന്നു യുവാക്കളെ പരിചയപ്പെടുത്തിയത് മാരിയപ്പനായിരുന്നു. സുരേഷ്, തുള്ളാ സുരേഷ്, പാണ്ഡിദുരൈ എന്നിവരായിരുന്നു അവര്‍. പരിചയപ്പെടുമ്പോള്‍ ബെംഗളൂരുവില്‍ നിന്ന് മോഷ്ടിച്ച കാര്‍ ഇവരുടെ പക്കലുണ്ടായിരുന്നു. ഈ കാറില്‍ നാലു പേരും കൂടി പോയി തമിഴ്‌നാട്ടിലെ തുടിയല്ലൂരില്‍ ഒരു വീട്ടില്‍ക്കയറി. രണ്ടേകാല്‍ കിലോ വെള്ളിയും 150 പവന്‍ സ്വര്‍ണവും ഈ സംഘം തട്ടിയെടുത്തു. പിന്നെ, നേരെ വന്നതാണ് തൃശൂര്‍ മണ്ണുത്തിയിലേക്ക്.

തൃശൂര്‍ മണ്ണുത്തിയിലെ ദേശീയപാതയോരത്തെ വീട്ടുമുറ്റത്ത് രണ്ടു കാറുകള്‍ നിര്‍ത്തിയിട്ടതു കണ്ടു. സ്വര്‍ണവും പണവും വന്‍തോതില്‍ ലഭിക്കുമെന്ന കണക്കുകൂട്ടലിലാണ് കയറിയത്. പക്ഷേ, കിട്ടിയത് 32 പവന്‍. മാത്രവുമല്ല, കവര്‍ച്ച നടത്താന്‍ വീട്ടില്‍ക്കയറിയ സമയത്ത് വണ്ടിയുടെ അരികിലേക്ക് മണ്ണുത്തി പൊലീസ് എത്തിയിരുന്നു. ഈ സമയം, വണ്ടിയിലിരുന്നത് പാണ്ഡിദുരൈ ആയിരുന്നു. ഉറക്കംവന്നപ്പോള്‍ വണ്ടി നിര്‍ത്തിയിട്ടെന്ന് പൊലീസിനോട് പറഞ്ഞാണ് രക്ഷപ്പെട്ടത്. പാണ്ഡിദുരൈ ഇപ്പോള്‍ തമിഴ്‌നാട്ടിലെ ജയിലിലാണ്.

അന്ന്, വീട്ടില്‍ നടന്ന സംഭവങ്ങള്‍ എന്താണെന്ന് രാജശേഖര്‍ വിശദമായി തന്നെ പൊലീസിനോട് പറഞ്ഞു. ഡോക്ടറുടെ ഭാര്യ വിവാഹ മോതിരം തിരികെ കിട്ടാന്‍ കെഞ്ചിയപ്പോള്‍ മനസലിഞ്ഞ് മോതിരം തിരികെ കൊടുക്കുകയും ചെയ്തുവത്രേ.'' ആരും പേടിക്കേണ്ട, എനിക്ക് പണവും സ്വര്‍ണവും മതി. ആരേയും ഉപദ്രവിക്കില്ല'' എന്ന് രാജശേഖര്‍ ഇടയ്ക്കിടെ വീട്ടുകാരോട് അന്ന് പറഞ്ഞുകൊണ്ടിരുന്നു.