യാത്രാസഹായ വെബ്സൈറ്റുകളില് എല്ലാം നേപ്പാളിലെ ആ റിസോര്ട്ടിനെ കുറിച്ച് വന്നത് വളരെ മോശം അഭിപ്രായം
ദമാനിലെ എവറസ്റ്റ് പനോരമ, ഹിമാലയന് പര്വതനിരകളുടെ മാസ്മരിക സൗന്ദര്യം പൂര്ണ്ണമായി ആസ്വദിക്കാന് അവസരം നല്കുന്ന റിസോര്ട്ടാണ്. എന്നാല് 25 വര്ഷത്തോളം പഴക്കമുള്ള ഈ റിസോര്ട്ടിനെക്കുറിച്ച് യാത്രാസഹായ വെബ്സൈറ്റുകളില് വളരെ മോശം അഭിപ്രായമാണ് പല സഞ്ചാരികളും കുറിച്ചിരിക്കുന്നത്.
മലയാളികളായ എട്ടുപേരുടെ മരണത്തിന് കാരണമായ ഹീറ്ററിനെക്കുറിച്ച് തന്നെയാണ് പലരും അഭിപ്രായമെഴുതിയിരിക്കുന്നത് എന്നതും ശ്രദ്ധേയമാണ്.
ഇവിടത്തെ പ്രകൃതി സൗന്ദര്യം മാത്രമാണ് നല്ലത്, ഹോട്ടലിന്റേത് മോശം സേവനമാണ്. ഇവിടെയാരും താമസിക്കരുത്. വൃത്തിഹീനമായ കിടക്കവിരികളും ശൗചാലയവുമാണുള്ളത്. ഇതിന്റെ ഹീറ്റര് പ്രവര്ത്തിക്കുന്നതല്ല. റിസോര്ട്ട് മാനേജരോട് ചോദിച്ചപ്പോള് ഹീറ്റര് പ്രവര്ത്തിക്കില്ലെന്ന് പറഞ്ഞു. രാത്രി തണുപ്പിലാണ് കിടക്കേണ്ടി വന്നത്. ആരും ഇവിടേക്ക് വരരുത്...ഇങ്ങനെ പലരും കുറിച്ചു. ഓസ്ട്രേലിയയിലെ കാന്ബറ സ്വദേശിയാണ് പ്രവൃത്തിക്കാത്ത ഹീറ്ററിനെക്കുറിച്ച് മുന്നറിയിപ്പ് നല്കിയത്.
ജനുവരി 12-ന് നേപ്പാള് സ്വദേശിയായ യാത്രക്കാരനും ഈ ഹോട്ടലിലെ രുചിയില്ലാത്ത ഭക്ഷണത്തെക്കുറിച്ചും ഇത്ര മനോഹരമായ സ്ഥലത്ത് പ്രവൃത്തിക്കുന്നത് മോശം റിസോര്ട്ടാണെന്നും കുറിച്ചു. ഈ പരാതികള് പരിഗണിച്ചായിരിക്കും റിസോര്ട്ട് അധികാരികള് ഹീറ്റര് പിടിപ്പിച്ചത്. എന്നാല് അടച്ചിട്ട മുറിയില് ശരിയായി പ്രവൃത്തിക്കാത്ത ഹീറ്ററുകള് മലയാളികളായ എട്ടുപേരുടെ ജീവനാശത്തിനിടയാക്കി.
https://www.facebook.com/Malayalivartha
