തളിപ്പറമ്പിനടുത്ത് തൃച്ചംബരം സ്വദേശികളായ വൃദ്ധ ദമ്പതികളുടെ സ്വത്ത് റജിസ്റ്റര്‍ ചെയ്തു നല്‍കണമെന്നാവശ്യപ്പെട്ട് അവരെ പീഡിപ്പിച്ച മകളും മരുമകനും ഒരു മാസത്തിനുള്ളില്‍ വീട്ടില്‍ നിന്നു മാറിത്താമസിക്കണമെന്ന് മെയിന്റനന്‍സ് ട്രൈബ്യൂണല്‍ ഉത്തരവിട്ടു. 

വൃദ്ധ ദമ്പതികളുടെ മകള്‍ക്കും അവരുടെ ഭര്‍ത്താവിനും എതിരെയുള്ള ഉത്തരവ് നടപ്പാക്കാന്‍ തളിപ്പറമ്പ് പൊലീസിനോട് സബ് കലക്ടര്‍ എസ്.ഇലക്യ നിര്‍ദേശിച്ചു.

തങ്ങളുടെ പേരിലുള്ള വസ്തു റജിസ്റ്റര്‍ ചെയ്തു തരണമെന്ന് ആവശ്യപ്പെട്ടു മക്കള്‍ മാനസികവും ശാരീരികവുമായി പീഡിപ്പിക്കുന്നുവെന്നാരോപിച്ചാണ് സബ് കലക്ടറുടെ നേതൃത്വത്തിലുള്ള മെയിന്റനന്‍സ് ട്രൈബ്യൂണലില്‍ പരാതി നല്‍കിയത്.

വര്‍ഷങ്ങളായി ഈ പരാതിയുമായി ഇവര്‍ പൊലീസ് സ്റ്റേഷനും കോടതികളും സര്‍ക്കാര്‍ ഓഫിസുകളും കയറിയിറങ്ങുന്ന അവസ്ഥയായിരുന്നു.