കായംകുളം കെഎസ്ആര്‍ടിസി ബസ് സ്റ്റാന്‍ഡില്‍ ഇന്നലെ 2 തവണ തീപിടിത്തം ഉണ്ടായി. തീ സമീപത്തേക്കു പടരാതിരുന്നതുമൂലമാണ് വലിയ ദുരന്തമായി മാറാതിരുന്നത് .

തീ അണയ്ക്കാന്‍ ശ്രമിച്ച സുരക്ഷാ ജീവനക്കാരന്‍ കരുനാഗപ്പള്ളി സ്വദേശി സിയാദിന്(58) പൊള്ളലേറ്റു. മുഖത്തും നെഞ്ചിലും പൊള്ളലേറ്റ സിയാദിനെ കായംകുളത്തെ താലൂക്ക് ആശുപത്രിയില്‍ പ്രവേശിപ്പിച്ചു.

കായംകുളം ഡിപ്പോയുടെ ഗാരിജിനു സമീപത്തെ വളപ്പില്‍ ഉപേക്ഷിച്ചിട്ടുള്ള വാഹനങ്ങളുടെ ഉപയോഗശൂന്യമായ ഭാഗങ്ങള്‍ക്കും മറ്റു വസ്തുക്കള്‍ക്കുമാണ് തീ പിടിച്ചത്.

ഇന്നലെ രാവിലെ പതിനൊന്നോടെ ആയിരുന്നു ആദ്യം തീ പിടിച്ചത്. തീ അണയ്ക്കാന്‍ ശ്രമിക്കുമ്പോള്‍ ഇതിനുള്ളില്‍ ഉണ്ടായിരുന്ന വസ്തുക്കളില്‍ എന്തോ പൊട്ടിത്തെറിച്ചപ്പോഴാണ് സിയാദിന് പൊള്ളലേറ്റത്.

സ്ഥലത്തുണ്ടായിരുന്ന ഇന്റലിജന്‍സ് എസ്‌ഐ അലി അക്ബര്‍ അഗ്‌നിശമന സേനയെയും പൊലീസിനെയും വിവരമറിയിച്ചു. സ്ഥലത്തെത്തിയ അഗ്‌നിശമന സേന തീ അണച്ചിട്ടുപോയി.

എന്നാല്‍. ഒന്നരയോടെ വീണ്ടും തീപിടിത്തമുണ്ടായി. സ്റ്റേഷന്‍ ഓഫിസര്‍ ജോസിന്റെ നേതൃത്വത്തിലുള്ള അഗ്‌നിശമന സേന തീ അണച്ച്, പരിസരം നനച്ച ശേഷമാണ് പിന്നീടു പോയത്. 12,000 ലീറ്റര്‍ ഡീസല്‍ ഉള്‍ക്കൊള്ളുന്ന ടാങ്ക് അടങ്ങുന്ന പമ്പ് വളപ്പില്‍ ഉണ്ടായിരുന്നു. 250 ജീവനക്കാരും 70-ല്‍ അധികം ബസുകളും സര്‍വീസ് നടത്തുന്ന കായംകുളം കെഎസ്ആര്‍ടിസി ബസ് സ്റ്റാന്‍ഡില്‍ തീപിടിത്തം ഉണ്ടായാല്‍ അടിയന്തരമായി നേരിടാനുള്ള സംവിധാനങ്ങളൊന്നുമില്ല.