അടിയന്തര ശസ്ത്രക്രിയ... ബിലീവേഴ്സ് ചര്ച്ച് മെത്രാപ്പോലീത്ത കെ.പി യോഹന്നാന് വാഹനാപകടത്തില് ഗുരുതര പരുക്ക്; അപകടം അമേരിക്കയിലെ പ്രഭാത നടത്തത്തിനിടെ; അടിയന്തര ശസ്ത്രക്രിയയ്ക്കായി ഡാലസ് മെത്തഡിസ്റ്റ് ആശുപത്രിയില് പ്രവേശിപ്പിച്ചു
വിശ്വാസികളെ ഏറെ വേദനിപ്പിക്കുന്ന വാര്ത്തയാണ് പുറത്ത് വരുന്നത്. ബിലീവേഴ്സ് ചര്ച്ച് മെത്രാപ്പോലീത്ത അത്തനാസിയസ് യോഹാന് (കെ.പി യോഹന്നാന്) അപകടത്തില് ഗുരുതര പരുക്ക്. അമേരിക്കയില് പ്രഭാത നടത്തത്തിനിടെ വാഹനമിടിക്കുകയായിരുന്നു. അദ്ദേഹത്തെ അടിയന്തര ശസ്ത്രക്രിയയ്ക്കായി ഡാലസ് മെത്തഡിസ്റ്റ് ആശുപത്രിയില് പ്രവേശിപ്പിച്ചിരിക്കുകയാണ്.
സഭാ വക്താവാണ് അപകടവിവരം അറിയിച്ചത്. നാല് ദിവസം മുന്പാണ് അദ്ദേഹം അമേരിക്കയിലെത്തിയത്. സാധാരണ ഡാലസിലെ ബിലീവേഴ്സ് ചര്ച്ചിന്റെ ക്യാമ്പസിനകത്താണ് പ്രഭാത നടത്തം. ഇന്ന് രാവിലെ പള്ളിയുടെ പുറത്ത് റോഡിലേക്ക് നടക്കാന് ഇറങ്ങിയപ്പോഴാണ് വാഹനം ഇടിച്ച് പരുക്കേറ്റത്.
ബിലീവേഴ്സ് ഈസ്റ്റേണ് ചര്ച്ചിന്റെ ടെക്സാസിലെ ആസ്ഥാനമന്ദിരം സ്ഥിതി ചെയ്യുന്ന കാമ്പസാണ് സാധാരണഗതിയില് പ്രഭാതസവാരിക്കായി അദ്ദേഹം തിരഞ്ഞെടുക്കുക. എന്നാല് ചൊവ്വാഴ്ച രാവിലെ പ്രഭാതസവാരിക്കായി കാമ്പസിന് പുറത്തേക്കാണ് പോയത്. നാല് ദിവസം മുമ്പാണ് അദ്ദേഹം അമേരിക്കയിലേക്ക് തിരിച്ചത്.
ഏഷ്യയെയും പ്രത്യേകിച്ച് ഇന്ത്യയെയും കേന്ദ്രീകരിച്ച് പ്രവര്ത്തിക്കുന്ന മതസംഘടനയായ ഗോസ്പല് ഫോര് ഏഷ്യയുടെ സ്ഥാപകനും പ്രസിഡന്റുമാണ് മൊറാന് മോര് അത്തനാസിയസ് യോഹാന് എന്ന കെ.പി.യോഹന്നാന്. ബിലീവേഴ്സ് ഈസ്റ്റേണ് ചര്ച്ചിന്റെ സ്ഥാപകനും നിലവിലെ മെട്രോപൊളിറ്റന് ബിഷപ്പും കൂടിയാണ് അദ്ദേഹം. ഇന്ത്യയിലെ ഏറ്റവും വലിയ ശിശു സംരക്ഷണ പദ്ധതികളിലൊന്നായ ബ്രിഡ്ജ് ഓഫ് ഹോപ്പ് സ്ഥാപിക്കുന്നതില് അദ്ദേഹം മുന്ഗണന നല്കി. ക്രിസ്ത്യന് ജീവിതത്തെക്കുറിച്ചും ദൗത്യങ്ങളെക്കുറിച്ചും 200 ലധികം പുസ്തകങ്ങള് രചിച്ചിട്ടുണ്ട്.
തിരുവല്ലയ്ക്കടുത്ത് അപ്പര്കുട്ടനാട്ടിലെ നിരണത്ത് മാര്ത്തോമ്മാ വിശ്വാസികളായ കടപ്പിലാരില് വീട്ടില് ചാക്കോ പുന്നൂസിന്റെ മകനായി 1950ലാണ് യോഹന്നാന് ജനിച്ചത്. ശരാശരിയില് താഴെയുള്ള ഒരു സാധാരണ കുടുംബത്തില് ജനിച്ച കടപ്പിലാരില് പുന്നൂസ് യോഹന്നാന് എന്ന കെ.പി. യോഹന്നാന് ശതകോടികളുടെ ആസ്തിയുള്ളയാളായി വളര്ച്ച പ്രാപിച്ചു. മെഡിക്കല് കോളേജുകള്, വിദ്യാഭ്യാസ സ്ഥാപനങ്ങള് തുടങ്ങി കേരളത്തില് മാത്രം ശതകോടികളുടെ ആസ്തിയാണ് ബിലീവേഴ്സ് ചര്ച്ചിനുള്ളത്. അദ്ദേഹത്തിനു കീഴിലുള്ള ഗോസ്പല് ഏഷ്യയ്ക്ക് വിദേശരാജ്യങ്ങളിലും ആസ്തിയുണ്ട്.
കുട്ടനാട്ടില് അക്കാലത്ത് വ്യാപകമായ താറാവ് കൃഷിയിലേര്പ്പെട്ടു വരികയായിരുന്നു കുടുംബം. കുട്ടിക്കാലത്ത് യോഹന്നാനും ആ പണി ചെയ്തിരുന്നു.എന്നാല് കൗമാര കാലത്തുതന്നെ അദ്ദേഹം ബൈബിള് പ്രഘോഷണത്തിലേക്ക് തിരിഞ്ഞു. കവലകളില് സുവിശേഷം പ്രസംഗിച്ച് നടന്ന വെറും ഒരു പാസ്റ്റര് മാത്രം ആയിരുന്നു അക്കാലത്ത് യോഹന്നാന്.
16ാമത്തെ വയസ്സില് ഓപ്പറേഷന് മൊബിലൈസേഷന് എന്ന തിയോളജിക്കല് സംഘടനയില് ചേര്ന്നത് യോഹന്നാന്റെ ജീവിതത്തില് വഴിത്തിരിവായി മാറി. ഡബ്ലു.എ ക്രിസ്വെല് എന്ന വിദേശിയ്ക്കൊപ്പം അമേരിക്കയില് വൈദിക പഠനത്തിന് ചേര്ന്നു. 1974ല് അമേരിക്കയിലെ ഡള്ളാസില് ദൈവശാത്ര പഠനം ആരംഭിച്ചു. ചെന്നെ ഹിന്ദുസ്ഥാന് ബൈബിള് കോളജില്നിന്ന് ഡിഗ്രി കരസ്ഥമാക്കിയ യോഹന്നാന് നേറ്റീവ് അമേരിക്കന് ബാപ്പിസ്റ്റ് ചര്ച്ചില് പാസ്റ്ററായും പിന്നീട് വൈദിക ജീവിതം നടത്തുകയുണ്ടായി. ഓപ്പറേഷന് മൊബിലൈസേഷന് യോഹന്നാനൊപ്പം സേവനം ചെയ്ത ഗിസല്ലയെ യോഹന്നാന് അവരുടെ ജന്മദേശമായ ജര്മ്മനിയില്വെച്ച് വിവാഹം കഴിച്ചു. ഇതും യോഹന്നാന്റെ ജീവിതത്തില് നിര്ണ്ണായകമായ വഴിത്തിരിവായി. ഇവര്ക്ക് രണ്ട് മക്കളുമുണ്ട്. 1978ല് ഭാര്യയുമായി ചേര്ന്ന് ടെക്സാസില് ഗോസ്പല് ഫോര് എഷ്യ എന്ന സ്ഥാപനം സ്ഥാപിച്ചു.
ഭാര്യയോടൊപ്പം സുവിശേഷ പ്രവര്ത്തനം ആരംഭിച്ച കെ.പി യോഹന്നാന് വര്ഷങ്ങള് നീണ്ട വിദേശവാസത്തിനുശേഷം 1983ല് തിരുവല്ല നഗരത്തിനു ചേര്ന്ന മാഞ്ഞാടിയില് ഗോസ്പല് ഏഷ്യയുടെ ആസ്ഥാനം നിര്മ്മിച്ച് കേരളത്തിലെ പ്രവര്ത്തനം ആരംഭിച്ചു. ആത്മീയയാത്രയെന്ന പ്രതിദിന സുവിശേഷ പ്രഘോഷണം റേഡിയോയിലൂടെ അവതരിപ്പിച്ചു. സവിശേഷമായ ശൈലിയിലൂടെ അദ്ദേഹം സുവിശേഷ വേലയിലേര്പ്പെട്ടു.
2003ല് ആത്മീയ യാത്ര ബിലീവേഴ്സ് ചര്ച്ച് എന്ന പേരില് ഒരു എപ്പിസ്ക്കോപ്പല് സഭയായി മാറി. അപ്പോള് ബിലീവേഴ്സ് ചര്ച്ചില് മെത്രാനില്ലായിരുന്നു. പിന്നീട് നിരവധി രാജ്യങ്ങളില് ശാഖകളുള്ള സഭയുടെ തലവനായി മാര് അത്തനേഷ്യസ് യോഹാന് മെത്രാപൊലീത്ത പ്രഥമന് എന്ന പേരില് യോഹന്നാന് സ്വയം അഭിഷിക്തനായി. 2017 ല് ബിലീവേഴ്സ് ഈസ്റ്റേണ് ചര്ച്ച് ആയി മാറി. ഇതിന് ഇന്ത്യയിലെ വടക്കു കിഴക്കന് സംസ്ഥാനങ്ങളിലും നേപ്പാളിലും ശക്തമായ സാന്നിധ്യമുണ്ട്. നിലവില് സഭയില് 30 ബിഷപ്പുമാരുണ്ട്.
ബിലീവേഴ്സ് ചര്ച്ചിന് ഇപ്പോള് ശതകോടികളുടെ ആസ്തിയുണ്ട്. പത്തനംതിട്ട ജില്ലയിലെ തിരുവല്ലയില് സ്ഥിതി ചെയ്യുന്ന ബിലീവേഴ്സ് സൂപ്പര് സ്പെഷ്യാലിറ്റി മെഡിക്കല് കോളേജാണ് സ്ഥാപനങ്ങളില് പ്രധാനമായത്.
"
https://www.facebook.com/Malayalivartha