കേരളത്തിലെത്തിയ കശ്മീരി വിദ്യാര്‍ഥികളെ ഉറുദുവില്‍ പ്രസംഗിച്ച് ഗവര്‍ണര്‍ ഞെട്ടിച്ചു!
നെഹ്‌റു യുവകേന്ദ്ര സംഘതന്‍ സംഘടിപ്പിച്ച കശ്മീരി യുവജന സമ്പര്‍ക്ക പരിപാടിയില്‍ സംബന്ധിക്കാന്‍ ജമ്മു കശ്മീരിലെ 6 ജില്ലകളില്‍ നിന്നായി 132 പേരാണ് കേരളത്തിലെത്തിയത്.
പരിപാടി ഉദ്ഘാടനം ചെയ്യാനെത്തിയ ഗവര്‍ണര്‍, പതിവു പോലെ 'പ്രിയപ്പെട്ട സഹോദരീ സഹോദരന്മാരേ' എന്നു പറഞ്ഞുകൊണ്ട് പ്രസംഗം തുടങ്ങി. മലയാളം കേട്ടു കണ്ണുമിഴിച്ച കശ്മീരി വിദ്യാര്‍ഥികളെ ഞെട്ടിച്ചുകൊണ്ട് ബാക്കി പ്രസംഗം ഉറുദുവില്‍. നിറഞ്ഞ കയ്യടിയോടെ വിദ്യാര്‍ഥികള്‍ കേട്ടിരുന്നു.
ശ്രീനാരായണ ഗുരുവിനെപ്പറ്റി പറഞ്ഞാണു ഗവര്‍ണര്‍ ആരംഭിച്ചത്. ഷേഖ് നൂറുദീനെപ്പോലെയാണ് കേരളത്തിന് ശ്രീനാരായണ ഗുരു.
കേരളത്തിന്റെ സംസ്‌കാരവും കാലാവസ്ഥയും ഭക്ഷണരീതികളുമെല്ലാം ഗവര്‍ണര്‍ വിവരിച്ചു. ലോകത്തിലെ സ്വര്‍ഗം കശ്മീരാണെങ്കില്‍ ദൈവത്തിന്റെ സ്വന്തം നാടാണ് കേരളം. ചൂടും മഴയുമുള്ള മനോഹരമായ കാലാവസ്ഥയാണ് ഇവിടുത്തേത്. കശ്മീരിലെ ചട്ണിയുടെ രുചിയെപ്പറ്റി പറഞ്ഞ ഗവര്‍ണര്‍ കേരളത്തിലെ തേങ്ങാച്ചമ്മന്തി കഴിച്ചേ മടങ്ങാവൂ എന്നും ഓര്‍മിപ്പിച്ചു.
കശ്മീരി യുവതികള്‍ നൃത്തമവതരിപ്പിക്കുന്നു/ കശ്മീരി യുവാക്കള്‍ ക്യാമറയില്‍ പകര്‍ത്തുന്നു
സാംസ്‌കാരിക വൈവിധ്യങ്ങള്‍ക്കപ്പുറം ഐക്യബോധമെന്ന സൗന്ദര്യമാണു രാജ്യത്തിന്റെ ആത്മാവ്. വൈവിധ്യങ്ങളുടെ സംസ്‌കാരം മുറിഞ്ഞുപോകാതെ നോക്കുകയാണു വേണ്ടത്. എല്ലാവരോടും സ്‌നേഹവും അനുകമ്പയും ഉണ്ടാകുമ്പോഴാണ് യഥാര്‍ഥ സ്വാതന്ത്ര്യം അനുഭവിക്കാന്‍ കഴിയുന്നതെന്നും ഗവര്‍ണര്‍ പറഞ്ഞു.
മികച്ച പ്രകടനം കാഴ്ചവച്ച കേരളത്തിലെ സാംസ്‌കാരിക വേദികള്‍ക്കു ഗവര്‍ണര്‍ പുരസ്‌കാരങ്ങള്‍ നല്‍കി. ഒ.രാജഗോപാല്‍ എംഎല്‍എ, നെഹ്‌റു യുവകേന്ദ്ര സംഘതന്‍ നാഷനല്‍ വൈസ് ചെയര്‍മാന്‍ എസ്.വിഷ്ണു വര്‍ധന്‍ റെഢി, സംസ്ഥാന ഡയറക്ടര്‍ ഡോ.കുഞ്ഞഹമ്മദ് തുടങ്ങിയവര്‍ പ്രസംഗിച്ചു.
https://www.facebook.com/Malayalivartha
