എടിഎം കൗണ്ടറുകളിലൂടെ വ്യാജ കാര്‍ഡുകള്‍ ഉപയോഗിച്ച് വിദേശ രാജ്യങ്ങളിലെ വന്‍കിട കമ്പനികളുടെ പണം തട്ടിയെടുക്കുന്ന 3 മലയാളികള്‍ ഉള്‍പ്പെടെയുള്ള 4 അംഗസംഘത്തെ അറസ്റ്റ് ചെയ്തു.

കാസര്‍ഗോഡ് ടൗണ്‍ പൊലീസ് സ്റ്റേഷനു സമീപത്തെ കാനറ ബാങ്കിന്റെ എടിഎം കൗണ്ടറില്‍ എത്തിയ സംഘം വ്യാജ കാര്‍ഡുകള്‍ ഉപയോഗിച്ച് പണം പിന്‍വലിക്കാന്‍ ശ്രമിക്കുന്നതിനിടെ സംശയം തോന്നിയ പരിസരവാസികള്‍ പൊലീസില്‍ വിവരം അറിയിക്കുകയായിരുന്നു. തുടര്‍ന്നു പൊലീസ് എത്തി കൗണ്ടറിന്റെ അകത്ത് നിന്ന് ഒരാളെയും സമീപത്ത് നിര്‍ത്തിയിട്ടിരുന്ന കാറില്‍ നിന്നു 3 പേരെയും പിടികൂടി ചോദ്യം ചെയ്തപ്പോഴാണ് തട്ടിപ്പ് തെളിഞ്ഞത്.

തമിഴ്‌നാട് തൃശ്ശിനാപള്ളി ഇനാംദാര്‍ തോപ്പിലെ പി.ജയറാം (30), കോട്ടയം രാമപുരം ഏഴാച്ചേരിയിലെ സന്തു എസ്. നെപ്പോളിയന്‍ (21), കോഴിക്കോട് കോഴഞ്ചേരി താമരശ്ശേരി ചെമ്പക്കടവ് ആശാരി കുടിയില്‍ ഹൗസില്‍ അഖില്‍ ജോര്‍ജ് (27), കണ്ണൂര്‍ ആലക്കോട് കാരിക്കയം മണക്കടല് കാപ്പില്‍ ഹൗസില്‍ കെ.ബി. ആല്‍ബിന്‍ (25) എന്നിവരെയാണ് സിഐ സി.എ. അബ്ദുല്‍റഹീമിന്റെ നേതൃത്വത്തില്‍ അറസ്റ്റ് ചെയ്തത്. പ്രതികളെ ഇന്നു കോടതിയില്‍ ഹാജരാക്കും. ഇവര്‍ സഞ്ചരിച്ച കാറും 17 എടിഎം കാര്‍ഡുകളും ലാപ്‌ടോപും സൈ്വപ്പിങ് മെഷീനും മൊബൈല്‍ ഫോണും10,000 രൂപയും പിടിച്ചെടുത്തു.

്‌കേസ് അന്വേഷിക്കുന്ന എസ്‌ഐമാരായ ഷേയ്ഖ് അബ്ദുല്‍റസാഖ്, കെ.അജിത എന്നിവര്‍ പറഞ്ഞത് സംഘത്തിന്റെ സൂത്രധാരനായ ജയറാമിനെതിരെ സമാനരീതിയിലുള്ള രണ്ടു കേസുകള്‍ തമിഴ്‌നാട്ടിലുണ്ടെന്നാണ്. വ്യാജ കാര്‍ഡ് ഉപയോഗിച്ച് 50 ലക്ഷത്തിലേറെ രൂപ ഇതിനകം ബാങ്കുകളില്‍ നിന്നു പിന്‍വലിച്ചിട്ടുണ്ട്. ഇതിനു പുറമെ സ്വര്‍ണം, ഇലക്ട്രോണിക് ഉപകരണങ്ങള്‍ ഉള്‍പ്പെടെയുള്ള സാധനങ്ങള്‍ വ്യാജ കാര്‍ഡ് ഉപയോഗിച്ച് കടകളില്‍ നിന്നു വാങ്ങിയിട്ടുണ്ട്.

കൂടുതലും തട്ടിപ്പിനിരയായത് വിദേശികളാണെന്നാണ് കണ്ടെത്തിയിട്ടുള്ളത്. പ്രതികള്‍ ഗോവയിലേക്ക് പോകുന്ന വഴിയാണ് പണം പിന്‍വലിക്കാന്‍ കാനറ ബാങ്കിന്റെ എടിഎം കൗണ്ടറിലെത്തിയതെന്നും പൊലീസ് പറഞ്ഞു. കാനഡയിലുള്ള ബന്ധുവാണ് വന്‍കിട കമ്പനികളുടെയും വ്യക്തികളുടെയും ബാങ്ക് വിവരങ്ങള്‍ ചോര്‍ത്തി ജയറാമിന് നല്‍കുന്നത്.